នៅក្នុងពិធីសម្ពោធដាក់ឲ្យដំណើរការសួនទឹកឯកជនរបស់លោកឧកញ៉ា លី យ៉ុងផាត់ នៅឯសង្កាត់ព្រែកតាសេក ខណ្ឌជ្រោយចង្វារ កាលព្រឹកថ្ងៃម្សិលមិញ លោកនាយករដ្ឋមន្ត្រីហ៊ុន សែន បានថ្លែងថា ផែនទីដែលសម្តេចព្រះសីហនុ យកទៅតម្កល់នៅអង្គការសហប្រជាជាតិកន្លងមក និងជាផែនទីរបស់បារាំងគូនោះ បែរជាដាក់ភូមិកំណើតរបស់ប្រធានរដ្ឋសភាលោក ហេង សំរិន នៅក្នុងទឹកដីវៀតណាមទៅវិញ។
លោកថា នៅពេលនេះ លោកកំពុងពិចារណាជម្រើសចំនួន៣ក្នុងការដោះស្រាយដីភូមិកំណើតរបស់លោក ហេង សំរិន ប្រធានរដ្ឋសភា នៅស្រុកពញាក្រែក ខេត្តត្បូងឃ្មុំ (ពីមុនខេត្តកំពង់ចាម) ដែលផែនទីបង្ហាញថា ទីតាំងដីភូមិនេះស្ថិតនៅក្រោមការគ្រប់គ្រងរបស់វៀតណាម ។
ករណីនេះ លោកនាយករដ្ឋមន្ត្រីហ៊ុន សែន ថ្លែងថា ដើម្បីដោះស្រាយបញ្ហានេះ រដ្ឋាភិបាលពិចារណាលើជម្រើសចំនួន៣ រួមមានទាំងការដូរភូមិ និង ដូរដីជាមួយវៀតណាម។
លោកថ្លែងបញ្ជាក់បែបនេះ «ជម្រើសទី១ កាត់ភូមិបង ហេង សំរិន ឲ្យវៀតណាមគ្រប់គ្រង ដោយរក្សាបន្ទាប់ព្រំដែនចាស់ដដែល ទី២រក្សាខ្សែព្រំដែនដដែល ប៉ុន្តែរើភូមិបង ហេង សំរិន ចេញរកដីឲ្យគាត់ ធ្វើភូមិថ្មី នៅក្នុងដីខ្មែរ។ រីឯជម្រើសទី៣ ដោះដូរដីគ្នា[រវាងភាគីកម្ពុជា និងវៀតណាម] ដោយរៀបចំខ្សែព្រំដែនជាថ្មី គូសភូមិបងហេង សំរិន កន្លែងហ្នឹងត្រូវដូរខ្សែព្រំដែន ដោយគូសខ្សែព្រំដែនថ្មីយកភូមិហេង សំរិន ឲ្យមកនៅក្នុងដីខ្មែរ ថាកន្លែងហ្នឹង ៥០០ហិកតា ត្រូវយកកន្លែងផ្សេងសងទៅវៀតណាម៥០០ហិកតា»។
យ៉ាងណាថ្លែងនៅក្នុងពិធីខាងលើ លោកប្រមុខរាជរដ្ឋាភិបាល មិនទាន់កំណត់ជាក់លាក់ថា នឹងត្រូវជ្រើសរើសយកជម្រើសណាមួយដើម្បីដោះស្រាយបញ្ហានេះនៅឡើយទេ។
ពាក់ព័ន្ឋនឹងដីភូមិកំណើតលោក ហេង សំរិន នេះដែរ កាលពីពេលកន្លងទៅ លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា បានអោយដឹងដែរថា បើតាមផែនទី ភូមិកំណើតរបស់លោក ហេង សំរិន មិនមែនស្ថិតនៅក្នុងទឹកដីរបស់កម្ពុជាទេ គឺស្ថិតនៅក្នុងទឹកដីរបស់វៀតណាម។
បើតាមលោក សុខ ទូច ការគិតថាភូមិកំណើតសម្តេច ហេង សំរិន ស្ថិតក្នុងដីកម្ពុជានោះ គឺយល់ខុសដោយសារតែជំនាន់មុនប្រជាពលរដ្ឋកម្ពុជា-វៀតណាម នៅតាមបណ្តោយព្រំដែនរស់នៅក្នុងភូមិនោះជាយូរមកហើយនៅតំបន់នោះ តែដល់ពេលយកផែនទីមកមើល ទើបដឹងថាវាស្ថិតនៅក្នុងទឹកដីវៀតណាម។
លោកបណ្ឌិត បានបញ្ជាក់យ៉ាងដូច្នេះថា៖ «អ្នកនិយាយហ្នឹងខុសហើយ សម្ដេច ហេង សំរិន ទេ ដែលជាអ្នកយកដីវៀតណាមនៅនោះ…ពីព្រោះ ទម្លាក់ផែនទីទៅ ដីរបស់សម្ដេច ហេង សំរិន បានទៅលើវៀតណាម ប៉ុន្ដែគាត់នៅយូរហើយ»។
កាលពីដើមខែវិច្ឆិកា ឆ្នាំ២០១៨ រដ្ឋសភាបានអនុម័តយល់ព្រមលើការបោះបង្គោលព្រំដែនជាមួយវៀតណាម ដែលរដ្ឋាភិបាលបោះបាន៨៤ភាគរយ ក្រោមសំឡេងគាំទ្រ១១០ លើ១១០ នៃសមាជិកសភារបស់គណបក្សកាន់អំណាចទាំងអស់ដែលមានវត្តមានក្នុងកិច្ចប្រជុំ។
សភាអះអាងថា ការអនុម័តយល់ព្រមនេះ យោងទៅលើសន្ធិសញ្ញាបំពេញបន្ថែមឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម និងត្រូវបានប្រកាសជាការប្រញាប់។
កម្ពុជា-វៀតណាម មានព្រំប្រទល់ដីគោលជាប់គ្នាប្រវែង ១២៧០គីឡូម៉ែត្រ ហើយមកដល់ពេលនេះ នៅសល់១៦ភាគរយទៀត ដែលកម្ពុជាមិនទាន់ឯកភាពជាមួយវៀតណាមឲ្យបោះបញ្ចប់ ដោយរង់ចាំភាគីបារាំងគូសចម្លងផែនមាត្រដ្ឋានផែនទីពីខ្នាត១ លើ១០០ពាន់ ទៅជាខ្នាត១ លើ៥០ពាន់វិញ៕
