លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានថ្លែងថា «រាជរដ្ឋាភិបាលមួយខ្លាំងបាន រដ្ឋាភិបាលនោះ អាស្រ័យដោយប្រជាពលរដ្ឋគាំទ្រ បើរដ្ឋាភិបាលគ្មានប្រជាពលរដ្ឋគាំទ្រ រដ្ឋាភិបាលនោះ មិនខ្លាំងទេ។»។
នៅក្នុងពិធីសម្ពោធដាក់ឲ្យប្រើប្រាស់ ស្ពានដែកបេឡេ ចំនួន០១ខ្សែ ប្រវែង១២៦ម៉ែត្រ និងអគារសិក្សាចំនួន ២ខ្នង នៅក្នុងសាលាបឋមសិក្សាស្វាយព្រៃ និងអនុវិទ្យាល័យកន្ទឺ១ ស្រុកបាណន់ ខេត្តបាត់ដំបង នាព្រឹកថ្ងៃទី១៩ ខែសីហា ឆ្នាំ២០២០នេះ លោក ស ខេង ក៍បានលើកឡើងដែរប្រទេសមានសង្គ្រាមគ្រោះថ្នាក់មុនគេគឺប្រជាពលរដ្ឋ ដូច្នេះប្រជាពលរដ្ឋត្រូវការពារសន្ដិភាព ។
បើតាមលោក ស ខេង កាលណាប្រទេសមានសង្គ្រាមហើយ អ្នកដែលគ្រោះថ្នាក់មុនគេគឺប្រជាពលរដ្ឋ ដូច្នេះប្រជាពលរដ្ឋត្រូវការពារសន្ដិភាពឲ្យបាន ព្រោះសន្ដិភាព មានតម្លៃណាស់។
លោកប្រមុខមហាផ្ទៃក៍បានបន្ថែមទៀតថា «កាលណាមានសង្គ្រាម អ្នកដែលមានគ្រោះថ្នាក់ជាងគេ គឺប្រជាពលរដ្ឋ ប្រទេសណាក៏ដោយ ស្រុកណាក៏ដោយ អ្នកដែលគ្រោះថ្នាក់បាត់បង់ជីវិតរងគ្រោះមុនគេ គឺប្រជាពលរដ្ឋ ទោះបីប្រទេសគោរពសិទ្ធិមនុស្សក៏ដោយ នៅពេលសង្គ្រាមកើតឡើង គឺប្រើគ្រប់មធ្យោបាយ ដើម្បីយកឈ្នះសង្គ្រាម។ ដូច្នេះមិនគិតថា រំលោភសិទ្ធិមនុស្ស ឬមិនរំលោភទេ ? បាញ់គឺបាញ់ហើយ»។
លោក ស ខេង បញ្ជាក់បន្ថែមទៀតថា សព្វថ្ងៃនេះរាជរដ្ឋាភិបាលកម្ពុជា ទោះបីនៅក្នុងតម្លៃណាក៏ដោយ គឺត្រូវរក្សាសន្ដិភាពឲ្យបាន ចង់និយាយបានថា «ដើម្បីសន្ដិភាព យើងហ៊ានចំណាយ ហ៊ានលះបង់ ដើម្បីរក្សាសន្ដិភាព»៕
