សៀមរាប និង​កំពត មាន​ភ្ញៀវ​ទេសចរ​ទៅ​លេង​ច្រើន​ជាងគេ

រាជធានី​ភ្នំពេញ ៖ ក្នុង​ថ្ងៃ​ទី​ពីរ នា​ឱកាស​ឈប់​សម្រាក​សង​ថ្ងៃ​ចូល​ឆ្នាំ​ខ្មែរ ដែល​ត្រូវ​នឹង​ថ្ងៃ​ទៅ​១៨ ខែសីហា ឆ្នាំ​២០២០​នេះ មាន​ភ្ញៀវ​ទេសចរ និង​ប្រជាពលរដ្ឋ​ដែល​ចេញ​ដើរ​ទស្សនា​កម្សាន្ត នៅ​ទូទៅ​ប្រទេស មាន​ចំនួន ២៧៧,០៧៨​នាក់ កើនឡើង​១៨.៧៥% ធៀប​នឹង​ថ្ងៃ​ទី​មួយ​ម្សិលមិញ ក្នុង​នោះ​ខេត្តសៀមរាប និង​ខេត្តកំពត​មាន​អ្នក​ទៅ​លេង​ច្រើន​ជាង​រាជធានី​-​ខេត្ត​ដទៃ ។

យោង​តាម​ស្ថិតិ​ភ្ញៀវ​ទេសចរ​ជាតិ និង​អន្តរជាតិ (​ថ្ងៃ​ទៅ​១៨ ខែសីហា ឆ្នាំ​២០២០​នេះ​) បាន​បង្ហាញ​ថា ខេត្ត​ដែល​ទទួល​បាន​ភ្ញៀវ​ទេសចរ តិច​ជាងគេ​នោះ​គឺ​ខេត្តកំពង់ស្ពឺ (​ភ្ញៀវ​សរុប​ចំនួន ៦៩០​នាក់​) និង​ស្វាយ​រៀង (​ភ្ញៀវ​សរុប ៧២៥​នាក់​) ។

បើ​តាម​លោក ថោ​ង ខុន រដ្ឋមន្ត្រី​ក្រសួងទេសចរណ៍ បាន​ឲ្យ​ដឹង​ថា ក្នុង​ចំណោម​ភ្ញៀវ​សរុប មាន​ចំនួន​សរុប ២៧៧,០៧៨​នាក់​នេះ មាន​ភ្ញៀវ​ជាតិ​មាន​ចំនួន ២៧៧,៦៤៩​នាក់ និង​ភ្ញៀវ​អន្តរជាតិ​មាន​ចំនួន ២,៧៧០​នាក់ ។

លោក​រដ្ឋមន្ត្រី​បាន​កត់សម្គាល់​ឃើញ​ថា គោលដៅ​ទេសចរណ៍​សំខាន់​ៗ​មួយ​ចំនួន រួម​មាន ៖
* ខេត្តសៀមរាប​មាន​ចំនួន ៤៤,៣៦៤​នាក់
* ខេត្តកំពត​មាន​ចំនួន ៣៩,៩៨៣​នាក់
* ខេត្តបាត់ដំបង​មាន​ចំនួន ២៦,៩៨៧​នាក់
* ខេត្ត​កែប​មាន​ចំនួន ២៣,២២៩​នាក់
* ខេត្ត​ព្រះ​សី​ហនុមាន​ចំនួន ២៣,១៤៩​នាក់
* ខេត្តរតនគិរី​មាន​ចំនួន ១៤,២៩៤​នាក់
* ខេត្តព្រះវិហារ​មាន​ចំនួន ១២,៤៣០​នាក់
* ខេត្តមណ្ឌលគិរី​មាន​ចំនួន ១០,២៥៤​នាក់ ។

ចំណែក​សភាពការណ៍​សន្តិសុខ សណ្ដាប់​ធ្លាប់​នៅ​តាម​កន្លែង​មាន​ភ្ញៀវ​ទៅ​ទស្សនា​នោះ មិន​មាន​បញ្ហា​អ្វី​ធំដុំ​នោះ​ឡើយ ៕