ដើមឈើប្រណីតប្រភេទគ្រញូង១ដើម ត្រូវបានគេលួចកាប់ និងត្រូវបានគេដឹងកាលពីព្រឹកថ្ងៃទី១១ សីហា ២០២០ ។
ដើមគ្រញូងដែលគេលួចកាប់នេះ ស្ថិតនៅក្នុងតំបន់អង្គរ ចំណុចគោកបាខែង ក្រុមទី៦ភូមិត្រពាំងសេះ សង្កាត់គោកចក ក្រុង-ខេត្តសៀមរាប ។
អាជ្ញាធរអប្សរាបានទទួលស្គាល់ថា គ្រញូង១ដើម ស្ថិតនៅក្នុងភូមិសាស្ត្រខាងលើ ពិតជាត្រូវបានជនមិនស្គាល់អត្តសញ្ញាណលួចកាប់មែន ដោយបញ្ជាក់ថា ឈើគ្រញូងនេះមានមុខកាត់ ០.២ម៉ែត្រ និងត្រូវមិនស្គាល់មុខនោះលួចយកកំណាត់ពាក់កណ្ដាលអស់ប្រវែងប្រមាណ៣ម៉ែត្រ ដោយបន្សល់ទុកគល់នឹងចុងប៉ុណ្ណោះ។
ពាក់ព័ន្ឋនឹងការលួចកាប់ឈើគ្រញូងក្នុងតំបន់អង្គរខាងលើនេះ លោក ឡុង កុសល អ្នកនាំពាក្យអាជ្ញាធ ជាតិអប្សរា បានបញ្ជាក់ថា អាជ្ញាធរអប្សរា គ្រប់គ្រងនៅក្នុងតំបន់ហ្នឹងគឺតែម៉ោងពេលថ្ងៃទេ ពេលយប់ គឺស្ថិតការគ្រប់គ្រងរបស់នគរបាលការពារបេតិភណ្ឌ ហើយថាគ្រញូងដែលគេកាប់នេះ គឺកាប់នៅពេលយប់។ ដូច្នេះ ខាងនគរបាលការពារបេតិកភ័ណ្ឌជាអ្នកទទួលខុសត្រូវ ។
សូមបញ្ជាក់ថា ដោយសារឈើប្រណីតប្រភេទគ្រញូងមានតម្លៃថ្លៃលើទីផ្សារ គ្រញូងជាច្រើនដើមនៅតំបន់អង្គរដែលគ្រប់គ្រងដោយអាជ្ញាធរជាតិអប្សរា ត្រូវបានគេលួចកាប់ជាបន្តបន្ទាប់ ជាក់ស្តែង គ្រញូងចំនួន០៤ដើម នៅក្នុងព្រៃឧទ្យានអង្គរ ស្ថិតក្នុងភូមិក្រវ៉ាន់ សង្កាត់នគរធំ ក្រុងសៀមរាប ក៍ត្រូវបានជនមិនស្គាល់អត្តសញ្ញាណលួចកាប់កាលពីថ្ងៃទី១៦ មេសា ឆ្នាំ២០២០ ។
ជាការកត់សម្គាល់ រាល់ការលួចកាប់គ្រញូងនៅក្នុងតំបន់អង្គរ គេកម្រឃើញសមត្ថកិច្ចពាក់ព័ន្ឋចាប់ជនសង្ស័យយកមកផ្ទន្ទាទោសតាមច្បាប់នោះឡើយ ផ្ទុយទៅវិញគឺមានតែការបកស្រាយឆ្លើយទម្លាក់កំហុសដាក់គ្នា ដោយគ្មានមន្ត្រីណាចេញមុខទទួលខុសត្រូវឡើយ ៕