ពលករខ្មែរជាង១០ ត្រូវបានទាហានព្រំដែនថៃចាប់ខ្លួន និង ចាប់ឲ្យលុតជង្គង់ក្រាបក្បាលដល់ដី ធ្វើឲ្យអ្នកប្រើប្រាស់បណ្តាញសង្គមមួយចំនួនឃើញរូបភាពនេះអាណោចអាធ័មអាណិតជាតិសាសន៍របស់ខ្លួន ។
បើតាមប្រភពបញ្ជាក់ឲ្យដឹងថា ហេតុការណ៍ចាប់ពលករខ្មែរឆ្លងដែននេះ បានកើតឡើងកាលពីថ្ងៃទី២០ សីហា ២០២០ នៅចំណុចបារ៉ាស់ត្រួតពិនិត្យមួយកន្លែងតាមបណ្តោយផ្លូវលេខ ៣១៩៧ ស្ថិតក្នុងស្រុកវ៉ាត់ថាណាណាក់ខន ខេត្តស្រះកែវ ប្រទេសថៃ ។
មកទល់នឹងរសៀលម៉ោង៤និង២០នាទីថ្ងៃទី២២ សីហានេះ គេមិនទាន់ដឹងថា អាជ្ញាធរថៃចាត់វិធានការតាមច្បាប់របស់គេយ៉ាងណានោះនៅឡើយទេ ។
ចំណែកពលករខ្មែរទាំង១១នាក់(ស្រី០១នាក់) ដែលមុនពេលទាហានថៃចាប់ ពួកគេបានជិះរថយន្ត១គ្រឿង ពាក់ស្លាកលេខថៃ «ក្រុងថេប ៤៥៤១»នោះ ក៍មិនទាន់ស្គាល់អត្តសញ្ញាណនៅឡើយដែរ ។
នៅរសៀលថ្ងៃសៅរ៍ដដែលនេះ «អង្រុត» មិនអាចរកការសុំអត្ថាធិប្បាយបានទេពីលោក កុយ គួង អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិ ជុំវិញការចាប់ខ្លួនពលករខ្មែរពីសំណាក់ទាហានព្រំដែនថៃខាងលើនេះ ។
សូមបញ្ជាក់ថា ព័ត៌មាននៃការចាប់ខ្លួនពលករខ្មែរឆ្លងដែនខុសច្បាប់ពីសំណាក់ទាហាន ឬអាជ្ញាធរព្រំដែនថៃ វាហាក់ដូចជារឿងធម្មតាទៅហើយ ព្រោះករណីនេះតែងកើតឡើងស្ទើររៀងរាល់ថ្ងៃ គ្រាន់តែព័ត៌មានខ្លះត្រូវបានបែកធ្លាយដោយផ្ទាល់ពីពលករ និងខ្លះចេញពីព័ត៌មានរបស់ថៃប៉ុណ្ណោះ ។
ជាងនេះទៀត កាលពីប៉ុន្មានឆ្នាំមុន ពលរដ្ឋខ្មែរជាច្រើនត្រូវបានទាហាន ឬឆ្មាំការពារព្រំដែនថៃបាញ់ ខណៈពួកគេបានឆ្លងដែនខុសច្បាប់ទៅរកកាប់ឈើគ្រញូង ឬ ស៊ីឈ្នួលកាប់ឈើគ្រញូងឲ្យឈ្មួញថៃ តាមមេខ្យល់ ឬចិត្តខ្លួនឯង បណ្តាលឲ្យស្លាប់និងរបួសរាប់សិបនាក់ ។
តាមរយៈនេះ អាជ្ញាធរពាក់ព័ន្ឋ ក៍ដូចជាថ្នាក់ដឹកនាំរាជរដ្ឋាភិបាលខ្មែរ តែងចេញសេចក្តីប្រកាសហាមពលរដ្ឋខ្មែរឆ្លងដែនខុសច្បាប់ ដោយអំពាវនាវឲ្យមានការរកការងារនិងប្រកបមុខរបរក្នុងស្រុក ប៉ុន្តែបើយើងសួរពលករដែលឆ្លងដែនខុសច្បាប់ ពួកគេនឹងឆ្លើយថា នៅថៃកម្លាំងពលកម្មថ្លៃគួរសម តម្លៃទំនិញ(ម្ហូបអាហារ)ថោក ហើយថាបើពួកគេមិនទៅបានអីហូប និងផ្គត់ផ្គង់ក្រុមគ្រួសារដែលក្រលំបាកនៅស្រុក ៕
