អ្នកភូមិមួយចំនួននៅកោះប្រាក់ និង កៀនស្វាយ ដែលរស់នៅតាមបណ្តោយដៃទន្លេមេគង្គ បានរអ៊ូរទាំអំពីទឹកឆ្នាំនេះតូចនិងរាក់ ដែលធ្វើឲ្យពួកគាត់មួយចំនួនដែលប្រកបរបរធ្វើចំការដំណាំផ្សេងពិបាកទាញទឹកមកស្រោចស្រព ។
បើតាមប្រជាពលរដ្ឋបានប្រាប់«អង្រុត» ថា តាមទម្លាប់ទឹកនៅតាមដាំទន្លេមេគង្គ(តំបន់ផ្ទះទឹកកៀនស្វាយ) គឺនៅរៀងរាល់ខែកក្កដានៃឆ្នាំនីមួយៗ ទឹកចាប់ផ្តើមចូលព្រែក ឬដៃទន្លេហើយ ប៉ុន្តែឆ្នាំនេះ ខុសពីបណ្តាឆ្នាំមុនៗ គឺទឹកអត់ទាន់ចូលមកដល់ជាងពាក់កណ្តាលខែ៨(សីហា)ទៅហើយ ។
អ្នកភូមិបន្តថា ក្រៅពីទឹករាក់ខុសប្រក្រតី ពួកគាត់ខ្លះដែលប្រកបរបរនេសាទជាលក្ខណៈគ្រួសារ ឬ សម្រាប់លក់បន្តិចបន្តួច គឺត្រីក៍ខ្សត់អត់មាន ខុសធម្មតាផងដែរ ហើយថាការខ្សត់ត្រីនេះ មានជាច្រើនឆ្នាំមកហើយ ។ ពលលរដ្ឋថា ប្រសិនបើទឹកនៅតែបន្តហក់ឡើងយឺត នោះជីវភាពពួកគាត់នឹងជួបការលំបាក ខណៈបច្ចុប្បន្នជីវភាពខ្សត់ខ្សោយរបស់ពួកគាត់កំពុងប្រឈមនឹងបញ្ហាជំងឺកូវីដ១៩ស្រាប់ ដែលលក់ដូរមិនដាច់ ។
សូមបញ្ជាក់ថា បញ្ហាទឹករាក់ ឬ ទឹកមិនទាន់ចូលគ្រប់ស្ទឹង ព្រែក និងដៃទន្លេនានា គឺបាននិងកំពុងកើតឡើងនៅតាមតំបន់ជាច្រើនក្នុងប្រទេសកម្ពុជា ក្នុងនោះដែរទន្លេសាបដែលជាសមុទ្រទឹកសាបដ៍ធំរបស់កម្ពុជានិងក្នុងតំបន់ ក៍ត្រូវបានប្រជានេសាទរអ៊ូរទាំអំពីបញ្ហាទឹករាក់និងខ្សត់ត្រីផងដែរ ។ ឆ្លើយតបទៅនឹងបញ្ហានេះ កាលពីពេលថ្មីៗនេះ
គណៈកម្មការទន្លេមេគង្គ បានជំរុញឲ្យប្រទេសតាមដងទន្លេមេគង្គទាំង៦ ដែលមានទាំងប្រទេសចិន និងមីយ៉ាន់ម៉ាផងដែរ ដោះស្រាយបញ្ហាលំហូរទឹកទាបក្នុងតំបន់ ខណៈដែលអាងទន្លេមេគង្គក្រោម ប្រឈមនឹងកំណត់ត្រាលំហូរទឹកទាបអស់រយៈពេល២ឆ្នាំជាប់គ្នា។ គណៈកម្មការបញ្ជាក់ថា មូលហេតុនៃទឹកទាបនេះ រួមមានបរិមាណភ្លៀងធ្លាក់តិចតួចខុសប្រក្រតី ដែលបង្កដោយបាតុភូតអាកាសធាតុអែលនីណូ (El Nino) ស្ថានភាពលំហូរទាបរយៈពេលយូរដែលបន្តអូសបន្លាយ ចាប់ពីឆ្នាំ២០១៩មក និងលំហូរទឹកកម្រិតទាបជាងមុនពីដៃទន្លេមេគង្គ។
គណៈកម្មការបញ្ជាក់ក្នុងសេចក្តីប្រកាសព័ត៌មានថា លំហូរទាបបែបនេះបានធ្វើឲ្យបឹងទន្លេសាបរបស់ប្រទេសកម្ពុជាជួបប្រទះស្ថានភាពរាក់ខ្លាំង ដែលបង្កឲ្យបរិមាណលំហូរត្រឡប់ចូលបឹងធ្លាក់ដល់កម្រិតទាបបំផុតនៅក្នុងកំណត់ត្រា គិតចាប់ពីឆ្នាំ១៩៩៧មក៕
