ចាប់ពីពាក់កណ្តាលខែកញ្ញា ដល់ចុងខែតុលា ឆ្នាំ ២០២០ ព្រះរាជាណាចក្រកម្ពុជាអាចប្រឈមនឹងការកើតមានជំនន់ទឹកភ្លៀងញឹកញាប់ ។
នេះបើតាមអ្នកនាំពាក្យក្រសួងធនធានទឹកនិងឧតុនិយម លោក ចាន់ យុត្ថា ដែលសរសេរបង្ហោះនៅបណ្តាញសង្គមហ្វេសប៊ុកផ្លូវការរបស់លោក និងបង្ហោះនៅប៉ុន្មាននាទីមុននេះ ។
បើតាមលោក ចាន់ យុត្ថា អាកាសធាតុនៅកម្ពុជា នាពេលខាងមុខ គឺមានសភាពប្រហាក់ប្រហែលកាលពីឆ្នាំ១៩៨១ និង ២០១០ ។
លោកបន្តថា តាមការសង្កេតរបស់ស្ថានីយឧតុនិយមធំៗនៅអាស៊ី អឺរ៉ុប អាមេរិក បានបង្ហាញថា កម្ពុជាអាចនឹងប្រឈមនឹងការកើតមានជំនន់ទឹកភ្លៀងញឹកញាប់ ដោយសារព្រះរាជាណាចក្រកម្ពុជា ក៏ដូចជាបណ្ដាប្រទេសក្នុងតំបន់មួយចំនួននឹងទទួលរងឥទ្ធិពលពីបាតុភូត La Nina ៦០ % និង ៤០ % ទៀត ជាបាតុភូត Enso ដែលបាតុភូតធម្មជាតិទាំងពីរនេះនឹងចាប់ផ្តើមកើតឡើងចាប់ពីពាក់កណ្តាលខែកញ្ញា ដល់ចុងខែតុលា ឆ្នាំ២០២០ ៕
