ចប់បាត់! អស់ពីសង់តង់ ឥឡូវវៀតណាមសង់សំណង់រឹងមាំតាមបញ្ជាថ្នាក់លើ

កងកម្លាំង​ទាហាន​ព្រំដែន​វៀតណាម​បាន​សង់​សំណង់​រឹង​មាំ​នៅ​តាម​បណ្តោយ​ព្រំដែន​ដែល​គណៈកម្មការ​ព្រំដែន​កម្ពុជា​វៀតណាម​មិន​ទាន់​ឯកភាព​គ្នា ខណៈ​មុន​នេះ វៀតណាម​បាន​អះអាង​ថា​ខ្លួន​សង់​តង់​បណ្តោះអាសន្ន​ដើម្បី​ធ្វើ​ជាទី​តាំង​ប៉ុស្តិ៍​សុខភាព​ទប់ស្កាត់​ការ​ឆ្លង​មេរោគ​កូ​វី​ដ​១៩ ។​

​បើ​តាម​របាយការណ៍​របស់​ស្នងការដ្ឋាន នគរបាល​ខេត្តកណ្តាល​ដែល​ចុះហត្ថលេខា​ដោយ​លោក​ឧត្តមសេនីយ៍ទោ ឈឿ​ន សុចិត្ត ស្នងការ​នគរបាល​ខេត្តកណ្តាល​កាលពី​ថ្ងៃ​ទី​២៦ សីហា ២០២០ ហើយ​ដែល​របាយការណ៍​នេះ​ត្រូវ​បាន​បែកធ្លាយ​នៅ​លើ​បណ្តាញ​សង្គម​ហ្វេ​ស​ប៊ុ​ក​នៅ​ព្រឹក​ថ្ងៃ​ទី​២៧ សីហា​នេះ បាន​បញ្ជាក់​ថា «​នៅ​ថ្ងៃ​ទី​២៥ ខែសីហា ឆ្នាំ​២០២០ វេលា​ម៉ោង​១៧​ៈល្ងាច កម្លាំង​ប៉ុស្តិ៍​នគរបាល​ការពារ​ព្រំដែន​ក្អម​សំណ​ចំនួន​០៨​នាក់ ដោយ​សហការ​ជាមួយ​កម្លាំងយោធា​ការពារ​ព្រំដែន​កង​៦០១ ចំនួន​០៧​នាក់ និង​លោកនាយ​ប៉ុស្តិ៍​នគរបាល​រដ្ឋបាល​ក្អម​សំណ បាន​ចុះ​ទៅ​ពិនិត្យ​នៅ​ចំណុច​ទីតាំង​តង់​ចាស់​របស់​យោធា​ការពារ​ព្រំដែន​វៀតណាម ប៉ុស្តិ៍ ៩២៥ វិញ​សឿង នៅ​និយាម​កា ៥១៤៥៧៥-១២០៦៩៤៨ ភូមិ ភូ​វី ឃុំ​ភូ​ឡុ​ក ស្រុក​ទិន​ចូ​វ ខេត្ត​អាន​យ៉ាង ទល់​នឹង​ភូមិ​ក្អម​សំណ​ក្រោម ឃុំ​ក្អម​សំណ ស្រុក​លើក​ដែក ខេត្តកណ្តាល បាន​ជួប​ភាគី​វៀតណាម​កំពុង​សាងសង់​តង់​ថ្មី​(​ជា​ជម្រក​រឹង​មាំ​) ដោយ​សាងសង់​អំពី​ឈើ សសរថ្ម កម្ពស់​៣​ម៉ែត្រ ទំហំ​៥​ម៉ែត្រ x ៤​ម៉ែត្រ ដំបូល​ប្រក់​ស័ង្កសី ដោយ​ឃ្លាត​ពី​ខ្សែបន្ទាត់​ព្រំដែន​ដែល​យើង​(​ខ្មែរ​)​គ្រប់គ្រង​បច្ចុប្បន្ន​ចម្ងាយ​ប្រមាណ​១២០​ម៉ែត្រ »​។​

​របាយការណ៍​ក៍បាន​បញ្ជាក់​ទៀត​ថា ក្រោយ​ពី​ឃើញ​វៀតណាម​សាងសង់​បែប​នេះ ភាគី​ខ្មែរ​ទាំង​៣​អង្គភាព​ខាងលើ បាន​ស្នើ​ឲ្យ​វៀតណាម​បញ្ឈប់​ការ​សាងសង់ តែ​ទាហាន​វៀតណាម​មិន​យល់ព្រម ដោយ​អះអាង​ថា គេ​ធ្វើ​តាម​បញ្ជា​ថ្នាក់លើ​របស់​គេ ។​

​បើ​តាម​របាយការណ៍​ដដែល ក៍បាន​សង្កត់ធ្ងន់​ថា ក្រៅពី​ទាហាន​វៀតណាម​បដិសេធ​មិន​បញ្ឈប់​ការ​សាងសង់ វៀតណាម​ក៍បាន​ប្រាប់​ភាគ​ខ្មែរ​ថា គេ​នឹង​សាងសង់​សំណង់​រឹង​មាំ​០៤​គោលដៅ​លើ​១០​គោលដៅ​ចាស់​ដែល​មាន​ស្រាប់​នោះ​ថែម​ទៀត ហើយ​នៅ​ថ្ងៃ​ទី​២៦ សីហា​ម្សិលមិញ អភិបាលស្រុក​លើក​ដែក​និង​កម្លាំង​ពាក់​ព័​ន្ឋ បាន​ចុះ​ត្រួតពិនិត្យ​ទីតាំង​ខា​លើ​ម្តងទៀត និង បាន​សំណូមពរ​ឲ្យ​ភាគី​វៀតណាម​បញ្ឈប់​ការ​សាងសង់​ជា​បន្ទាន់ តែ​វៀតណាម​នៅ​តែ​មិន​យល់ព្រម​និង​សាងសង់​បន្ត​ទៀត ។​

​ជុំវិញ​របាយការណ៍​ខាងលើ​នេះ​ដែរ នៅ​ព្រឹក​ថ្ងៃ​ទី​២៧ សីហា ២០២០ «​អង្រុត​» បាន​ទាក់ទង​ទៅ​លោក​ឧត្តមសេនីយ៍ទោ ឈឿ​ន សុចិត្ត ស្នងការ​នគរបាល​ខេត្តកណ្តាល ដើម្បី​សុំ​ការ​បញ្ជាក់​បន្ថែម ប៉ុន្តែ​ទូរ​សព្ទ​លោក​ទទួល​ការ​ហៅ​ចូល​បាន​ហើយ តែ​មិន​មាន​អ្នក​លើក​ទទួល ។​

លោកទេសរដ្ឋមន្រ្តី វ៉ា គឹមហុង ប្រធានគណៈកម្មការកិច្ចការព្រំដែន និង លោក ផៃ ស៊ីផាន ប្រធានក្រុមអ្នកនាំ​ពាក្យរាជរដ្ឋាភិបាល មិនអាចរកការសុំអត្ថាធិប្បាយបានទេនៅរសៀលថ្ងៃទី២៧ សីហា ២០២០ ។

​ជា​ការ​កត់សម្គាល់ ការ​សាងសង់​សំណង់​រឹង​មាំ​ពី​សំណាក់​ទាហាន​វៀតណាម​ខាងលើ បាន​ធ្វើ​ឡើង បន្ទាប់​ពី​លោកនាយក​រដ្ឋមន្ត្រី ហ៊ុន សែន បាន​បញ្ជា​ឲ្យ​លោក​ទេស​រដ្ឋមន្ត្រី វ៉ា គឹ​ម​ហុង ប្រធាន​គណៈកម្មការ​កិច្ចការ​ព្រំដែន ចុះ​ទៅ​ជួប​ពលរដ្ឋ​ដែល​អះអាង​ថា​បាត់បង់​ដី​ទៅ​ឲ្យ​វៀតណាម​នៅ​ខេត្ត​ត្បូងឃ្មុំ និង​ប្រាប់​រដ្ឋមន្ត្រី​ទីស្តីការគណៈរដ្ឋមន្ត្រី​រៀបចំ​បើក​សិក្ខាសាលា​មួយ​ដើម្បី​ឲ្យ​ប្រជាពលរដ្ឋ និស្សិត​និង​សិស្ស​ចូល​ស្តាប់​និង​សួរ​ដេញដោល​អំពី​បញ្ហា​ព្រំដែន​ផង​ដែរ ​៕