រាជធានីភ្នំពេញ ៖ អតីតមន្ត្រីជាន់ខ្ពស់គណបក្សសង្គ្រោះជាតិចំនួន ៣រូប បានស្នើក្រសួងមហាផ្ទៃ លើកបម្រាមសិទ្ធិនយោបាយ ដើម្បីផ្តល់នីតិសម្បទាធ្វើនយោបាយឡើងវិញ ។
លិខិតរបស់លោក ស៊ុន ឆ័យ អតីតសមាជិកគណៈកម្មាធិការអចិន្ត្រៃយ៍ និងជាអតីតតំណាងរាស្ត្រគណបក្សសង្គ្រោះជាតិ ផ្ញើជូនលោក ស ខេង រដ្ឋមន្ត្រីក្រសួងមហាផ្ទៃ កាលពីថ្ងៃទី២៧ ខែសីហា បានអោយដឹងថា យោងតាមមាត្រា៤៥ថ្មី នៃច្បាប់ស្តីពីគណបក្សនយោបាយ បានបង្កលក្ខណៈឱ្យអ្នកដែលត្រូវបានហាមឃាត់មិនឱ្យធ្វើសកម្មភាពនយោបាយ អាចទទួលបាននីតិសម្បទាធ្វើនយោបាយឡើងវិញ ។
ត្រង់ចំណុចនេះ លោកបានស្នើរដ្ឋមន្ត្រីក្រសួងមហាផ្ទៃពិនិត្យតាមនីតិវិធី ដើម្បីផ្តល់នីតិសម្បទាធ្វើនយោបាយដល់រូបលោកឡើងវិញ ។
ក្រៅពីលោក សុន ឆ័យ ក៏មានអតីតសមាជិកគណៈកម្មាធិការនាយកដែលមកពីអតីតគណបក្សសង្គ្រោះជាតិ លោក វ៉ា សាម៉ុន និងលោក តាវ គឹមឈន បានដាក់លិខិតស្នើសុំសិទ្ធិធ្វើនយោបាយឡើងវិញទៅក្រសួងមហាផ្ទៃផងដែរ ៕
