មិន​ចង់​ឲ្យ​បញ្ហា​សុខភាព ប៉ះពាល់​កិច្ចការ​ជាតិ ទើប​នាយក​រដ្ឋមន្ត្រី​ជប៉ុន សម្រេច​លាលែង​ពី​តំណែង

ជប៉ុន ៖ នៅ​ទីបំផុត​នាយក​រដ្ឋមន្ត្រី​ជប៉ុន​លោក អា​បេ ស៊ី​ន​ហ្សូ Abe Shinzo បាន​ប្រកាស​ដោយ​ផ្ទាល់​ថា សម្រេចលាលែង​ពី​តំណែងហើយ ដោយ​បញ្ជាក់​ហេតុផល​ថា មិន​ចង់ឱ្យ​បញ្ហា​សុខភាព​ផ្ទាល់ខ្លួន​លោក ដែល​កើត​ជំងឺ​រលាក​ពោះវៀន ប៉ះពាល់​ដល់​គោលនយោបាយ​ដឹកនាំ​ប្រទេស​ជាតិ ។

នៅ​ក្នុង​សន្និសីទ​សារព័ត៌មាន នៅ​ថ្ងៃនេះ លោក អា​បេ ស៊ី​ន​ហ្សូ ថ្លែង​ថា ជំងឺ​រលាក​ពោះ​វៀត​របស់​លោក​រើ​ឡើង​វិញ​កាលពី​ពាក់​កណ្តាលខែ​មុន ។ លោក​បញ្ជាក់​ថា ការ​សម្រេច​នេះ ដើម្បី​កុំឱ្យ​ប៉ះពាល់​ដល់​គោលនយោបាយ​ដឹកនាំ​ប្រទេស ។

លោក អា​បេ ស៊ី​ន​ហ្សូ «​ខ្ញុំ​បាន​សម្រេចចិត្ត​លាលែង​តំណែង​ជា​នាយក​រដ្ឋមន្ត្រី ដោយ​ខ្ញុំ​យល់​ថា មិន​អាច​បន្ត​តំណែង​នេះ​ទៀត​បាន នៅ​ពេល​ដែល​ខ្ញុំ​មិន​មាន​ទំនុកចិត្ត​ថា អាច​បំពេញការងារ​ដែល​ប្រជាជន​ផ្តល់​ឱ្យ​ខ្ញុំ​បំពេញ​នេះ​បាន​ល្អ​»​។

គួរ​បញ្ជាក់​ថា លោក អា​បេ ស៊ី​ន​ហ្សូ​អាយុ​៦៥​ឆ្នាំ បាន​ជាប់​ឆ្នោត​ជា​នាយក​រដ្ឋមន្ត្រី​ជប៉ុន នៅ​ឆ្នាំ​២០០៦ និង​កាន់​តំណែង​នេះ​ជា​ថ្មី​ម្ដងទៀត​នៅ​ឆ្នាំ​២០១២ រហូត​មក​ទល់​នឹង​បច្ចុប្បន្ន ដែល​ធ្វើ​ឱ្យ​លោក​ក្លាយជា​នាយក​រដ្ឋមន្ត្រី កាន់​តំណែង​យូរ​ជាងគេ​បំផុត នៅ​ក្នុង​ប្រទេស​ជប៉ុន​។ ទោះជា​យ៉ា​ណា​ពេលវេលា​ជាក់លាក់ នៃ​ការ​លាលែង​ចេញពី​តំណែង​របស់​លោក អា​បេ មិន​ត្រូវ​ត្រូវ​បញ្ជាក់​នោះ​ឡើយ ៕