នៅថ្ងៃទី០៤ កញ្ញានេះ សមត្ថកិច្ចបញ្ជូនស្ត្រីម្នាក់ពីខេត្តព្រះវិហារ មកកាន់ស្នងការនគរបាលរាជធានីភ្នំពេញ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់ បន្ទាប់ពីស្ត្រីនេះបានតាំងខ្លួនជាចៅក្រមសាលាឧទ្ធរណ៍ និងយកឈ្មោះថ្នាក់ដឹកនាំមួយចំនួន ដើរឆបោកលុយគេជិត១លានដុល្លារ ។
ស្ត្រីសង្ស័យរូបនេះត្រូវបានសមត្ថកិច្ចអះអាងថាឈ្មោះ អៀង ឆេងហុង ហៅ សារិទ្ធ មុំ អាយុ៤៥ឆ្នាំ មានទីលំនៅបច្ចុប្បន្នស្នាក់នៅផ្ទះលេខ៤អា ផ្លូវលេខ០២ ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ និង ត្រូវបានកម្លាំងនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងនគរបាលខេត្តព្រះវិហារ តាមចាប់ខ្លួននៅស្រុកគូលែន ខេត្តព្រះវិហារ កាលពីថ្ងៃទី០៣ កញ្ញា ២០២០។
បើតាមដីកាបញ្ជាឲ្យចូលខ្លួនរបស់លោក ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ បានចោទស្ត្រីខាងលើពីបទរំលោភលើទំនុកចិត្ត ដោយសារកាលពីថ្ងៃទី១៩ កុម្ភៈ ២០១៦ ស្ត្រីឈ្មោះ អៀង ឆេងហុង បានយកប្រាក់ចំនួន ៨៣៥,០០០ដុល្លារ ពីឈ្មោះ មិន ស្ស័យ ភេទប្រុស អាយុ៥៨ឆ្នាំ មានទីលំនៅបច្ចុប្បន្ន ស្នាក់នៅផ្ទះលេខ៩៩ ផ្លូវលំ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ រឿងទិញដីធ្លី ហើយជនសង្ស័យបានបោកយកលុយពីជនរងគ្រោះទៅទិញដីចូលគ្នា ដោយមានកិច្ចសន្យាផ្ទៃក្នុងជាមួយគ្នាថា ពេលដែលលក់ដីបានចែកគ្នា៥០%ស្មើ នៅពេលដែលស្ត្រីរូបនោះលក់ដីបានគឺចែកគ្នាបានតែដំណាក់កាលកក់ប្រាក់លើកទី១ ពេលដែលអ្នកទិញប្រគល់លុយគ្រប់ចំនួនស្ត្រីរូបនោះមិនបានយកលុយដែលលក់ដីនោះមកចែកគ្នាទេ ។
ក្រោយដឹងថាចាញ់បោកជនសង្ស័យ ជនរងគ្រោះក៍បានដាក់ពាក្យបណ្តឹងទៅកាន់តំណាងអយ្យការរហូតមានដីកាបញ្ជាឲ្យចូលខ្លួន និងទើបចាប់ខ្លួនស្ត្រីខាងលើបាននៅស្រុកគូលែន ខេត្តព្រះវិហារ និងត្រូវបានបញ្ជូនបន្តមកចាត់ការតាមច្បាប់នៅរាជធានីភ្នំពេញ៕
