ចាប់ខ្លួនអង្គរក្សលោក ហ៊ុន សែន ដែលប្រើអំពើហិង្សាលើប្តីប្រពន្ឋពីរនាក់

លោក​វរៈសេនីយ៍ឯក ម៉ាត់ យូ​សុះ ហៅ ជួប ថា​ន់ ត្រូវ​បាន​សមត្ថកិច្ច​ចាប់ខ្លួនហើយ​ និងបានបញ្ជូន​ទៅ​បញ្ជា​ការ​ដ្ឋាន​​​កង​រាជអាវុធហត្ថ​ខេត្ត​ត្បូងឃ្មុំ ដើម្បី​សាកសួរ​ករណី​ប្រើ​អំពើ​ហិង្សា​និង​ដក​កាំភ្លើង​គំរាមកំហែង​ប្រជាពលរដ្ឋ ។

មកទល់នឹងម៉ោង១១និង១៥នាទីថ្ងៃត្រង់ថ្ងៃទី០៨ កញ្ញា ២០២០នេះ មិនទាន់ដឹងថា សមត្ថកិច្ចចាត់វិធានការ​តាមនីតិវិធីច្បាប់ដល់ណានៅឡើយនោះទេ ។

​ការឃាត់ខ្លួន លោក ម៉ាត់ យូសុះ ដែលគេអះអាងថាជាអង្គរក្សលោកនាយករដ្ឋមន្រ្តី ហ៊ុន សែន កាលពីថ្ងៃម្សិល​មិញ​នេះដែរ បានធ្វើឡើងនៅក្រោយពេលព័ត៌មាននៃការប្រើហិង្សាលើប្រជាពលរដ្ឋពីសំណាក់​លោកស័ក្តិ៥​ខ្មែរឥស្លាមរូបនេះ ត្រូវ​បាន​បែកធ្លាយដឹងដល់លោកនាយ​ឧត្តមសេនីយ៍​កិត្តិ​បណ្ឌិត ហ៊ីង ប៊ុ​ន​ហៀ​ង អគ្គមេបញ្ជា​ការ​រង នៃ​កង​យោធពលខេមរភូមិន្ទ និង ជា​មេបញ្ជាការ​នៃ​បញ្ជាការដ្ឋាន​អង្គរក្ស លោក ហ៊ុន សែន ។​

​សូម​បញ្ជាក់​ថា គណនី​ហ្វេ​ស​ប៊ុ​កមួយ​ឈ្មោះ «Saret Mouslem» បាន​បង្ហោះ​កាលពី​យប់​ថ្ងៃ​ទី​៦ ខែកញ្ញា ឆ្នាំ​២០២០ ថា «​សូម​សម្តេច​តេ​ជោ ហ៊ុន សែន នាយក​រដ្ឋមន្ត្រី​នៃ​កម្ពុជា ជាទី​គោរព​ដ៏​ខ្ពង់ខ្ពស់​បំផុត ជួយ​កូនចៅ​ផង ។ នៅ​ម៉ោង​៦​ល្ងាច ថ្ងៃ​ទី​៦ ខែកញ្ញា ឆ្នាំ​២០២០ អង្គរក្ស​សម្តេច ស័ក្តិ​៥ ឈ្មោះ ម៉ាត់ យូ​សុះ ហៅ ជួប ថា​ន់ បាន​យក​កាំភ្លើង​និង​ដំបង ប្រុង​ធ្វើឃាត​ខ្ញុំ​ពីរ​នាក់​ប្តី​ប្រពន្ធ នៅ​ភូមិ​បេង​ថ្មី ឃុំ​សេ​ដា ស្រុក​តំបែរ ត្បូងឃ្មុំ ធ្វើ​អោយ​ប្រពន្ធ​ខ្ញុំ​មាន​របួស​»​។​

ហេតុការណ៍​នេះ បាន​កើតឡើង​កាលពី​ម៉ោង​៦​ល្ងាច​ថ្ងៃ​ទី​០៦ កញ្ញា ២០២០ នៅ​ក្នុងភូមិ​បេង​ថ្មី ឃុំ​សេ​ដា ស្រុក​តំបែរ ខេត្ត​ត្បូងឃ្មុំ ។​

​គេ​មិនដឹង​ថា ទំនាស់​នេះ​ផ្តើម​ចេញពី​អ្វី​នោះ​ទេ តែបើ​តាម​រូបភាព​ពី​វី​ដេ​អូ​ឃ្លី​ប​ដែល​ម្ចាស់​គណនី​ឈ្មោះ Saret Mouslem បង្ហោះ​នោះ គេ​ឃើញ​បុរស​ម្នាក់​បើកទ្វារ​រថយន្ត​ម៉ាក​ព្រូស ស្ទុះ​ចេញ​ដើរ​សំដៅ​ទៅ​រក​បុរស​ម្នាក់​ប្រុង​ប្រើ​ហិង្សា​នៅ​ក្នុង​ស្ថានីយ៍​ប្រេង​មួយ​កន្លែង តែ​ត្រូវ​បាន​ស្ត្រី​ម្នាក់​(​ជន​រង​គ្រោះ​) ទៅ​ឃាត់ ហើយ​ទំនងជា​កើត​ទំនាស់​ពាក្យ​សម្តី​ថែម​ទៀត ទើប​គេ​ឃើញ​បុរស​ដែល​ស្លៀកពាក់​ឯកសណ្ឋាន​ជា​យោធា​អាវយឺត​ខោ​ប៉ា​រ៉ា​វាយ​និង​អុក​នឹង​ជង្គុង​ទៅ​លើ​ស្ត្រី​រង​គ្រោះ​ដែល​មិន​ទាន់​ស្គាល់​អត្តសញ្ញាណ​នៅឡើយ ។​​

​មជ្ឈដ្ឋាន​ជា​ច្រើនមើលឃើញ​ថាអង្គរក្ស​លោកនាយករដ្ឋមន្រ្តី ហ៊ុន សែន គឺតែងប្រកាន់​ខ្ជាប់ខ្ជួន​នូវ​វិន័យ បទ​បញ្ជា សីលធ៌ម សេចក្តី​ថ្លៃ​ថ្លូ​រ និងមានគុណធ៌ម មិនមែន​ចេះ​តែ​ដើរ​បំផ្លាញ​កេរ្តិ៍ឈ្មោះ​ដូចបុគ្គលមួយចំនួន​តូច​ដូចខាងលើ​នេះ​ទេ ៕