អ្នកនាំពាក្យក្រសួងសុខាភិបាល លោកស្រី ឱ វណ្ឌឌីន បានច្រានចោលទាំងស្រុងនូវនូវការចុះផ្សាយរបស់សារព័ត៌មានវៀតណាម ដែលថាមានជនជាតិវៀតណាម៣នាក់ ទើបចេញពីប្រទេសកម្ពុជា ត្រូវបានអាជ្ញាធរវៀតណាមរកឃើញថាមានឆ្លងមេរោគកូវីដ១៩ ។
ក្រៅពីការច្រានចោល លោកស្រីរដ្ឋលេខាធិកាក្រសួងសុខាភិបាលក៍បានលើកឡើងថា ជនជាតិវៀតណាម៣នាក់នោះ គឺពួកគេអាចឆ្លងនៅក្នុងប្រទេសវៀតណាមផ្ទាល់តែម្តង ។
ការច្រានចោលរបស់ក្រសួងសុខាភិបាលខ្មែរនៅថ្ងៃទី១០ កញ្ញានេះ ធ្វើឡើងបន្ទាប់ពីសារព័ត៌មានវៀតណាម VN Express កាលពីថ្ងៃទី០៨ កញ្ញា បានចុះផ្សាយថា ជនជាតិវៀតណាមចំនួន៣នាក់ ដែលត្រឡប់មកពីកម្ពុជា កាលពីថ្ងៃទី២៥ និង២៦ ខែសីហា ឆ្នាំ២០២០ តាមច្រកម៉ុកបៃ ខេត្តតៃនិញ ត្រូវបានរកឃើញមានវីរុស COVID-19 ។
សូមបញ្ជាក់ថា គិតត្រឹមម៉ោង១១និង១១នាទីយប់ថ្ងៃទី១០ កញ្ញា ២០២០នេះ អ្នកឆ្លងមេរោគកូវីដ១៩នៅក្នុងទូទាំងប្រទេសវៀតណាមមានចំនួនសរុប ១០៥៩នាក់និងស្លាប់៣៥នាក់ ខណៈកម្ពុជាមានអ្នកឆ្លងសរុប ២៧៤នាក់ គ្មានអ្នកស្លាប់និង អ្នកកំពុងសម្រាកព្យាបាលមានតែម្នាក់ប៉ុណ្ណោះ ៕