ស្គាល់​ហើយ នារី​ម្នាក់​លោត​លើ​ស្ពាន​ជ្រោយចង្វារ បន្សល់​បាច់ផ្កា និង​ស្បែកជើង​១​គូរ

រាជធានី​ភ្នំពេញ ៖ ស្គាល់​អត្តសញ្ញាណ​នារី​ម្នាក់ ដែល​លោតទឹក​សម្លាប់​ខ្លួន នៅ​លើ​ស្ពាន​ជ្រោយចង្វារ នា​យប់​ទាប​ភ្លឺ​ឈាន​ចូល​ថ្ងៃ​ទី​១១ ខែកញ្ញា ឆ្នាំ​២០២០​នេះ តាម​រយៈ​ការ​ចែកចាយ​នូវ​សារ​រំលែក​ទុក្ខ និង​ការ​សោកស្ដាយ​ពី​សំណាក់​មិត្ត​ភ័​ក្រ​របស់​នារី​រង​គ្រោះ នៅ​លើ​បណ្ដាញ​សង្គម​ហ្វេ​ស​ប៊ុ​ក​។

តាម​រយៈ​ការ​ចែកចាយ​នៅ​លើ​បណ្ដាញ​សង្គម រហូត​នៅ​ល្ងាច​ថ្ងៃ​ទី​១១ ខែកញ្ញា ឆ្នាំ​២០២០​នេះ បាន​រក​ឃើញ​នូវ​អត្ដសញ្ញាណ​របស់​នារី​រង​គ្រោះ ដែល​ប្រើប្រាស់​គណនី​មួយ​មានឈ្មោះ «Gech Gech» និង​មានឈ្មោះ​ពិត «​ចាន់ ស្រី​មាន​» អាយុ​២២​ឆ្នាំ ស្នាក់​នៅ​ខុន​ដូរ​មួយ​កន្លែង នៅ​រាជធានី​ភ្នំពេញ ។

ប្រភព​ព័ត៌មាន​ដែល​បង្ហាញ​នៅ​លើ​គណនី​របស់​នារី​រង​គ្រោះ​បាន​បង្ហាញ​ថា មុន​ពេល​កើតហេតុ​រូប​នាង បាន​ទៅ​ចូលរួម​កម្មវិធី​ខួបកំណើត របស់​បងស្រី នៅ​ភោជនីយដ្ឋាន​ទន្លេបាសាក់​២ ក្រោយ​ចប់​កម្មវិធី​ខួបកំណើត នាង​បាន​បន្ដ​ទៅ​ញាំ​អី​នៅ​ភោជនីយដ្ឋាន ក្នុង Eden Garden ដែល​មាន​ទីតាំង​ក្នុង​បរិវេណ​បឹង​កក ហើយ​ក៏​បាត់​ដំណឹង​សូន្យឈឹង​។ រហូត​ព្រឹក​ឡើង បាន​មិត្តភក្តិ រក​គេ​ផ្សព្វផ្សាយ​ករណី​នារី​ម្នាក់​លោតទឹក​សម្លាប់​ខ្លួន ដែល​បន្សល់​ទុក​នូវ​ផ្កា​មួយ​បាច់ និង​ស្បែកជើង​មួយគូរ ។

ដោយឡែក​ព័ត៌មាន​នៅ​កន្លែង​កើតហេតុ​វិញ បាន​អះអាង​ថា មុន​ពេល​កើតហេតុ គេ​ឃើញ​នារី​រូប​ស្រស់​សោភា​ម្នាក់ បាន​ចុះ​ពីលើ​រថយន្ត​មួយ​គ្រឿង ដោយ​កាន់​បាច់ផ្កា រួម​ទាំង​ស្ពាយ​កាបូប និង​ពាក់អាវ​ខោ​ប៊​យ​ពី​ក្រៅ​ផង​នោះ ហើយ​រថយន្ត​នោះ​ក៏​បើក​ទៅ​បាត់​បន្សល់​ទុក​តែ​នារី​រូប​ស្រស់​សោភា នៅ​លើ​ស្ពាន​តែ​ម្នាក់ឯង​។ បន្ទាប់​មក​នារី​ខាងលើ​បាន​ដោះ​ស្បែកជើង និង​ផ្កា​មួយ​បាច់​ដាក់​ជាប់​ស្បែកជើង ហើយ​លោត​ចូល​ទៅ​ក្នុង​ទន្លេ​បាត់​ស្រមោល​តែ​ម្ដង ភ្លាម​ៗ​គេ​ក៏​បាន​រាយការណ៍ ទៅ​សមត្ថកិច្ច​ដើម្បី​ជួយ​ជន​រង​គ្រោះ តែ​អកុសល​នារី​រង​គ្រោះ​ត្រូវ​បាន​លិច​ចូល​ទៅ​ក្នុង​ទន្លេ​បាត់​ទៅ​ហើយ​។

យ៉ាងណាមិញ ជុំវិញ​រឿងហេតុ​នេះ មហាជន​ចង់​ឲ្យ​សមត្ថកិច្ច​បើក​ការ​ស្រាវជ្រាវ​បន្ថែម​ទៀត ដើម្បី​ច្បាស់​ថា​តើ ជន​រង​គ្រោះ​លោតទឹក​សម្លាប់​ខ្លួន ឬ​មានរឿង​អ្វី​ផ្សេង​ក្រៅពី​នេះ ដែល​ស្ថិត​ក្នុង​ភាព​អា​ថ​កំបាំង​នៅឡើយ ។

ព័ត៌មាន​ផ្សេង​ទៀត​ដែល​គេ​ទទួល​បាន​នៅ​កន្លែង​កើតហេតុ បាន​បង្ហើប​ថា នារី​រង​គ្រោះ និង​អ្នកបើកបរ​រថយន្ដ​នោះ ដូច​ជា​មានការ​ប្រកែក​គ្នា​មុន​ពេល​រថយន្ដ​នោះ​បើក​ចេញ​ទៅ​។ យ៉ាងណា​ក៏​ដោយ នេះ​គ្រាន់តែ​ជា​ព័ត៌មាន​ដែល​គេ​ទទួល​បាន​ជំ​ហ៊ាន​ដំបូង នៅ​កន្លែង​កើត​ហេតុតែ​ប៉ុណ្ណោះ ដូច្នេះ​ហើយ​ទើប​មហាជន​ចង់​ឲ្យ​សមត្ថកិច្ច​បើក​ការ​ស្រាវជ្រាវ​បន្ថែម​ទៀត​លើ​ករណី​នេះ ៕