រថយន្ត​ដឹក​ជ្រូក ធ្លាក់​ពីលើ​ស្ពាន ស្លាប់​មនុស្ស​ម្នាក់ របួស​១២​នាក់

បន្ទាយ​មាន​ជ័យ ៖ មនុស្ស​១២​នាក់​រង​របួស​(​របួសធ្ងន់​០៦​នាក់ ស្រាល​០៦​នាក់​) ត្រូវ​បាន​បញ្ជូន​ភ្លាម​ៗ​ទៅ​កាន់​មន្ទីរពេទ្យ​ដើម្បី​សង្គ្រោះ​បន្ទាន់ និង​ម្នាក់​ទៀត​បាន​ស្លាប់​នៅ​នឹង​កន្លែង ខណ​:​រថយន្ត​ដឹក​ជ្រូក ខ្នាត​យក្ស​មួយ​គ្រឿង​ជួប​ឧបទ្ទវហេតុ​គ្រោះថ្នាក់​ចរាចរណ៍​ធ្លាក់​ពីលើ​ស្ពាន ។

ហេតុការណ៍​គ្រោះថ្នាក់​នេះ បាន​កើតឡើង​នៅ​វេលា​ម៉ោង​៣​និង​៤០​នាទី​ល្ងាច ថ្ងៃ​ទី​១៨ ខែកញ្ញា ឆ្នាំ​២០២០ លើ​កំណាត់​ផ្លូវជាតិ​៥៨ ចំណុច​ស្ពាន​លេខ​៤ ចន្លោះ​បង្គោលគីឡូម៉ែត្រ លេខ​២៣-២៤ ក្នុងភូមិ​ប្រាសាទ ឃុំ​អូរ​បី​ជាន់ ស្រុក​អូរ​ជ្រៅ ខេត្តបន្ទាយមានជ័យ ។

យោង​តាម​សម្តី​អ្នក​ឃើញ​ហេតុការណ៍​បាន​និយាយ​ថា នៅ​មុន​កើតហេតុ​គេ​បានឃើញ​រថយន្ត​ធុន​យក្ស​មួយ​គ្រឿង បើកបរ​យ៉ាង​លឿន ក្នុង​ទិស​ដៅ​ពី​លិចទៅ​កើត មក​ដល់​ចំណុច​កើតហេតុ រថយន្ត​បាន​រេ​ទៅ​បុក​នឹង​ជញ្ជាំង​បង្កាន់ដៃស្ពាន រថយន្ត​បាន​បុក​ផ្ទុប​ខ្លាំង​ហើយ​ធ្លាក់​ពីលើ​ស្ពាន​ទៅ​ខាងក្រោម បណ្តាល​អោយ​អ្នក​ជិះ​លើ​រថយន្ត​ផ្លោង ធ្លាក់​រប៉ាត់រប៉ាយ​រង​របួសធ្ងន់​ស្រាល និង​ខ្លះ​សង្កត់ជាប់​ក្រោម​កាប៊ី​ន​រថយន្ត ។

លោក សេស វិបុល អធិការ​នគរបាល​ស្រុក​អូរ​ជ្រៅ បានអោយ​ដឹង​ថា អ្នក​រង​របួសធ្ងន់​-​ស្រាល ក្នុង​ហេតុការណ៍​នេះ​មាន​ចំនួន​១២​នាក់ សមត្ថកិច្ច​កំពុង​ដឹក​បញ្ជូន​ទៅ​សង្គ្រោះ​បន្ទាន់​នៅ​មន្ទីរពេទ្យ​ក្រុង​ប៉ោយ​ប៉ែ​ត ក្នុង​នោះ​ស្លាប់​ម្នាក់​សមត្ថកិច្ច​កំពុង​ទាញ​ចេញពី​ក្រោម​ក្បាល​រថយន្ត ។

លោក សេស វិបុល បញ្ជាក់​ថា គ្រោះថ្នាក់​ចរាចរណ៍​នេះ ផ្តើម​ឡើង​ដោយ​រថយន្ត​ម៉ាក​ហ៊ី​យ៉ា​ន់​ដាយ ខ្លួនឯង ពាក់​ស្លាក​លេខ កំពង់ចាម​. MA.8759 ជា​រថយន្ត​ធន់​ធ្ងន់ ដែល​ដឹក​ទ្រុង​ជ្រូក​ពេញ អ្នក​ស្លាប់ និង​អ្នក​រង​របួស​អាច​ជា​កម្មករ​លើក​ជ្រូក​ដាក់​រថយន្ត ៕