ដូចតាមការគ្រោងទុក នៅព្រឹកថ្ងៃអាទិត្យនេះ ក្រុមបាតុករថៃដែលភាគច្រើនជានិស្សិតនិងយុវជនរាប់ពាន់នាក់ បានបន្តប្រមូលផ្តុំគ្នាតវ៉ាទាមទារឲ្យលោកនាយករដ្ឋមន្ត្រីថៃ ប្រាយុទ្ឋ ចាន់អូចា ចុះចេញពីតំណែង និង ធ្វើវិសោធនកម្មច្បាប់រដ្ឋធម្មនុញ្ញ និងស្ថាប័នព្រះមហាក្សត្រ ។
កាលពីថ្ងៃសៅរ៍ម្សិលមិញ ក្រុមបាតុករបានធ្វើការតវ៉ាដូចគ្នានេះដោយអង្គុយនិងឈរក្រោមដំណក់ទឹកភ្លៀង ដោយខ្លះស្រែក ខ្លះលើកបដា និងខ្លះលើកម្រាមដៃ៣ឡើងលើដែលមានអត្ថន័យ «បណ្តេញលោកប្រាយុទ្ឋ ទាមទារការធ្វើវិសោធនកម្មរដ្ឋធម្មនុញ្ញនិងកំណែទម្រង់ស្ថាប័នព្រះមហាក្សត្រ ក៍ដូចជាធ្វើឲ្យប្រជាធិបតេយ្យមានជីវិតរស់ឡើងវិញ» ។
យ៉ាងណាក៍ដោយ ក្រុមបាតុករបានដកថយក្រោយពីសហមេដឹកនាំបាតុកម្មនៃរណសិរ្ស ថាម៉ាសាត(Thammasat)តំណាងដោយ នាង ប៉ានូសាយ៉ា ស៊ីធិជីរ៉ាវឌ្ឍនាគុល Panusaya Sithijirawattanakul បានជួបចរចាជាមួយស្នងការប៉ូលិសក្រុងបាងកកលោកឧត្តមសេនីយ៍ ប៉ាកាពុង ពុងភីត្រា (Pakapong Pongpetra) នាព្រឹកថ្ងៃអាទិត្យនេះ ។
លោកឧបនាយករដ្ឋមន្ត្រីថៃ ប្រាវីដ វង្សស៊ូវុន (Prawit Wongsuwon) បានថ្លែងអំណរគុណដល់ក្រុមបាតុករចំពោះការតវ៉ាដោយសន្តិវិធីគ្មានអំពើហិង្សាចាប់តាំងពីថ្ងៃសៅរ៍ម្សិលមិញ ។
យ៉ាងណាក៍ដោយ ក្រុមនិស្សិតនិងយុវជន បានប្រកាសថាខ្លួនទទួលបានជោគជ័យក្រោយអាជ្ញាធរថៃទទួលយកសំណើរបស់ពួកគេក្នុងការទាមទារជាថ្មីទៀតនៅមុខរដ្ឋសភាជាតិថៃ នាថ្ងៃទី០៤ តុលា ២០២០ ដែលជាខួបនៃការតវ៉ារបស់និស្សិតកាលពីឆ្នាំ១៩៧៣ និង បានកប់ស្លាកកាក់ចំនួន១០ ដែលមានន័យការទាមទារសេរីភាពប្រជាធិបតេយ្យនិងការកែទម្រង់រដ្ឋរបស់ក្រុមនិស្សិតនិងយុវជនថៃ ៕
