វី​ដេ​អូស្តែង​ៗ កងទ័ព​អា​មេ​នី និង​អា​ហ្សែ​បៃ​ហ្ស​ង់ ប្រយុទ្ធ​គ្នា​យ៉ាង​ក្តៅ​គគុក ស្លាប់​មនុស្ស​៣៩​នាក់​ហើយ

ប្រទេស​អា​ស៊ែ​បៃ​ហ្ស​ង់ និង​អា​មេ​នី កាលពី​ថ្ងៃ​ទី​២៧ កញ្ញា បាន​ផ្ទុះ​សង្គ្រាម​នឹង​គ្នា ខណៈ​ផ្ទុះ​ការ​ប្រយុទ្ធ​គ្នា​ថ្មី​២ ក្នុង​តំបន់​បំបែក​ខ្លួន អា​ស៊ែ​បៃ​ហ្ស​ង់​ណា​ហ្គ័​រ​នី​កា​រ៉ា​បាក់ ដែល​ទទួល​ការ​ទ្រទ្រង់​ដោយ​អា​មេ​នី ។

ការ​ប្រយុទ្ធ​គ្នា​នេះ យ៉ាង​ហោច​ណាស់​ទាហាន និង​ជន​ស៊ី​វិល​សរុប ៣៩​នាក់​បាន​បាត់បង់​ជីវិត និង​ជាង​១០០​នាក់​រង​របួស នៅ​ក្នុង​ការ​ប្រយុទ្ធ​គ្នា​ដ៏​ក្តៅ​គគុក​រវាង​កងទ័ព​អា​មេ​នី និង​អា​ហ្សែ​បៃ​ហ្ស​ង់ នៅ​តំបន់​ជម្លោះ​រវាង​ប្រទេស​ទាំង​ពីរ​នេះ ដែល​មិន​ធ្លាប់​មាន​នោះ​ឡើយ​គិត​ចាប់តាំងពី​ឆ្នាំ​២០១៦ ។

ជម្លោះ​រវាង​ប្រទេស​ទាំង​ពីរ​នេះ បាន​និង​កំពុង​បង្ក​ឲ្យ​មាន​ក្តី​ព្រួយបារម្ភ​ជា​ខ្លាំង ខណៈ​ដែល​ដែនដី​ជម្លោះ​នោះ ស្ថិត​នៅ​ក្នុង​តំបន់​បំពង់​បង្ហូរ​ប្រេង និង​ឧស្ម័ន​ដ៏​សំខាន់ ទៅ​កាន់​ទីផ្សារ​អន្តរជាតិ ។

ប្រទេស​រុ​ស្ស៊ី​ដែល​ជា​បងធំ​ក្នុង​តំបន់ បាន​អំពាវនាវ​ឲ្យ​ប្រទេស​ទាំង​ពីរ​ខាងលើ បញ្ឈប់​ភាព​តានតឹង​រវាង​គ្នា​ជា​បន្ទាន់ ខណៈ​តួ​ក​គី​វិញ ដែល​ជា​ប្រទេស​មាន​ឥទ្ធិពល​មួយ​ដែរ ក្នុង​តំបន់​បាន​អះអាង​ថា ខ្លួន​គាំទ្រ​ប្រទេស​អា​ហ្សែ​បៃ​ហ្ស​ង់ ដែល​ជា​ប្រទេស​មាន​អ្នក​កាន់សាសនា​អ៊ី​ស្លា​ម​ច្រើន ។

ភ្លាម​ៗ ប្រធានាធិបតី​រុ​ស្ស៊ី លោក វ្ល៉ា​ឌី​មៀរ​ពូ​ទី​ន បាន​អំពាវនាវ​ឲ្យ​ចៀសវាង​ការ​បង្កើន​ជម្លោះ
និង​ឲ្យ​បញ្ចប់​ការ​ប្រទូស្ត​រ៉ា​យ​គ្នា ដែល​មាន​លក្ខណៈ​សាហាវ​បំផុត ក្នុង​តំបន់​មាន​ជម្លោះ​នោះ ចាប់តាំងពី​ឆ្នាំ​២០១៦​មក ។

អគ្គលេខាធិការ អ​.​ស​.​ប លោក ANTONNIO GUTERRES ក៏​អំពាវនាវ​ដែរ​ឲ្យ​បញ្ឈប់​ជា​បន្ទាន់ ការ​ប្រយុទ្ធ​គ្នា ហើយ​វិល​ដោយ​ឆាប់រហ័ស​មក​រក​ការ​ចរចា ។ លោក​មាន​បំណង​ពិភាក្សា​ជាមួយ​ប្រ​ធានា​ធិ​តី​អា​ស៊ែ​បៃ​ហ្ស​ង់ លោក LLHAMALIEV និង​នាយក​រដ្ឋមន្ត្រី​អា​មេ​នី លោក NIKOL PACHINIAN ។

សូម​ទស្សនា វី​ដេ​អូ ជាក់ស្តែង ស្តី​ពី​ការ​ប្រយុទ្ធ​គ្នា​រវាង អា​ស៊ែ​បៃ​ហ្ស​ង់​-​អា​មេ​នី ៖