លោក វ៉ា គឹមហុង ៖ រាជរដ្ឋាភិបាលការពារទឹកដីមិនឲ្យបាត់សូម្បីតែ១មិល្លីម៉ែត្រ

​ប្រធាន​គណៈកម្មាធិការ​កិច្ចការ​ព្រំដែន លោក​ទេស​រដ្ឋមន្ត្រី វ៉ា គឹ​ម​ហុង បាន​ថ្លែង​ថា​« រាជរដ្ឋាភិបាល​មាន​សុ​ឆន្ទៈ​ដ៍​មុត​ស្រួច​ក្នុង​ការ​ការពារ​បូរណភាព​ទឹកដី​កម្ពុជា ឲ្យ​បាន​ស្ថិតស្ថេរ គង់វង្ស មិន​ឲ្យ​បាត់បង់​សូ​ម្បី​តែ​១​មិល្លីម៉ែត្រ ដូចដែល​សម្តេច​តេ​ជោ​នាយក​រដ្ឋមន្ត្រី បាន​ប្រកាស​ជា​ញយ​ៗ​នោះ​» ។​

​ថ្លែង​នៅ​ទីស្តីការគណៈរដ្ឋមន្ត្រី ក្នុង​វេទិកា​ផ្សព្វផ្សាយ​ពី​ការងារ​ខណ្ឌសីមា និង​ការ​បោះបង្គោល​ព្រំដែន​គោក​កម្ពុជា​-​វៀតណាម កាលពី​ថ្ងៃ​ទី​២៩ កញ្ញា ២០២០ លោក វ៉ា គឹ​ម​ហុង បាន​បង្ហាញ​ការ​ប្តេជ្ញា​ចិត្ត​ដ៏​មោះមុត​របស់​រដ្ឋាភិបាល​កម្ពុជា ដើម្បី​សម្រេច​បាន​ព្រំដែន​រវាង​កម្ពុជា​-​វៀតណាម ដោយ​ឈរ​លើ​មូលដ្ឋាន​គោរព​ឯករាជ្យ អធិបតេយ្យ និង បូរណភាព​ដែនដី​រវាង​គ្នា​និង​គ្នា​។​

​បើ​តាម​លោក វ៉ា គឹ​ម​ហុង បញ្ហា​ព្រំដែន​នេះ មាន​មនុស្ស​មួយ​ចំនួន តែង​ព្យាយាម​បំភ្លៃ​ការ​ពិត​ពី​រឿង​ព្រំដែន ហើយ​ញុះញង់​ឲ្យ​ប្រជាពលរដ្ឋ ស្រែក​តវ៉ា​និង​ចោទ​លើ​រដ្ឋាភិបាល ថា​ធ្វើ​ឲ្យ​បាត់​ដីស្រែ​ទៅ​វៀតណាម ដូច​ជា​ករណី​នៅ​ឃុំ​ត្រពាំង​ផ្លុ​ង ស្រុក​ពញ្ញាក្រែក ខេត្ត​ត្បូងឃ្មុំ ជាដើម​។ លោក​ប្រធាន​គណៈកម្មាធិការ​កិច្ចការ​ព្រំដែន ក៍បាន​អំពាវនាវ​ឲ្យ​អ្នកចូលរួម​ក្នុង​វេទិកា​នោះ ជួយ​ផ្សព្វផ្សាយ​និង​ពន្យល់​ដល់​ប្រជាពលរដ្ឋ ដើម្បី​ឲ្យ​យល់​ដឹង​ច្បាស់​អំពី​ព្រំដែន និង​ចូលរួម​ទប់ស្កាត់​ព័ត៌មាន​ញុះញង់​អំពី​ព្រំដែន​ផង​ដែរ​។

​សូម​បញ្ជាក់​ថា ព្រំដែន​រវាង​កម្ពុជា​និង​វៀតណាម មាន​ប្រវែង​ប្រមាណ​ជា​១២៧០ គីឡូម៉ែត្រ​។ បច្ចុប្បន្ន ការ​បោះបង្គោល​ព្រំដែន​រវាង​ប្រទេស​ទាំង​ពីរ សម្រេច​បាន​៨៤​ភាគរយ​ហើយ ហើយ​ផែនទី​ថ្មី​ខ្នាត ១/២៥ ០០០ ដែល​រាជរដ្ឋាភិបាល​គ្រោង​នឹង​នាំ​យក​ទៅ​តម្កល់​នៅ​អង្គការសហប្រជាជាតិ​នោះ​គឺ​បង្ហាញ​ពី​ការ​កំណត់​ខណ្ឌសីមា​និង​ការ​បោះបង្គោល​ព្រំដែន​រវាង​ប្រទេស​ទាំង​ពីរ ៕