អភិបាលនៃគណៈអភិបាលខេត្តព្រះសីហនុ លោក គួច ចំរើន បានសង់វីឡាដ៏ប្រណីតធំស្កឹមស្កៃមានតម្លៃយ៉ាងហោចណាស់ជាង១០លានដុល្លារសហរដ្ឋអាមេរិក ។
នេះបើយោងតាមការចុះផ្សាយរបស់គេហទំព័រ The Cambodia Daily កាលពីថ្ងៃទី០១ តុលាម្សិលមិញ(https://www.cambodiadaily.com/2020/10/01/16/04/50015/) ។
បើតាម The Cambodia Daily ដដែល វីឡាដែល The Cambodia Daily អះអាងថាជារបស់លោក គួច ចំរើន នោះ គឺ មានទីតាំងនៅតំបន់អូរត្រេះ ស្ថិតក្នុងសង្កាត់៤ ក្រុង-ខេត្តព្រះសីហនុ ។
យ៉ាងណានៅម៉ោង៦និង៥៣នាទីយប់ថ្ងៃទី០២ តុលា ២០២០នេះ «អង្រុត» មិនអាចរកការសុំអត្ថាធិប្បាយតបភ្លាមៗបានទេពីលោក គួច ចំរើន ជុំវិញការចោទប្រកាន់របស់ The Cambodia Daily ខាងលើនេះ ។
សូមបញ្ជាក់ថា លោក គួច ចំរើន ត្រូវបានរាជរដ្ឋាភិបាលតែងតាំងនិងចូលកាន់តំណែងជាអភិបាលនៃគណៈអភិបាលខេត្តព្រះសីហនុកាលពីថ្ងៃទី២៩ មិថុនា ២០២០ ។
លោក គួច ចំរើន ត្រូវបានគេដឹងថាធ្លាប់បម្រើការងារនៅរាជធានីភ្នំពេញ នៅឆ្នាំ១៩៩៨ដល់ថ្ងៃទី១៣ខែកក្កដាឆ្នាំ១៩៩៩ លោកគួច ចំរើនជាបុគ្គលិកចាត់តាំងសាលាខណ្ឌចំការមន រាជធានីភ្នំពេញ។ ពីថ្ងៃទី១៣ខែកក្កដាឆ្នាំ១៩៩៩ដល់ថ្ងៃទី២៣ខែកក្កដាឆ្នាំ២០០៤ ជាអភិបាលរងខណ្ឌចំការមន។ពីថ្ងៃទី២៣ខែកក្កដាឆ្នាំ២០០៤ដល់ថ្ងៃទី១៦ខែឧសភាឆ្នាំ២០១៤ ជាអភិបាលខណ្ឌមានជយ័ ។ ពីថ្ងៃទី១៦ខែឧសភាឆ្នាំ២០១៤ដល់ថ្ងៃទី៦ខែធ្នូឆ្នាំ២០១៦ ជាអភិបាលខណ្ឌដូនពេញ។ពីថ្ងៃទី០១ខែធ្នូឆ្នាំ ២០១៦ដល់ថ្ងៃទី១៦ ខែមិថុនា ឆ្នាំ២០១៧ ជាអគ្គនាយករងរដ្ឋបាលក្រសួងមហាផ្ទៃ និងមុនរាជរដ្ឋាភិបាលផ្លាស់ឲ្យមកកាន់តំណែងជាអភិបាលខេត្តព្រះសីហនុ លោកក៍ជាអភិបាល នៃគណៈអភិបាលខេត្តកំពង់ចាមផងដែរ ៕
