សោកស្តាយ ចម្លាក់ដីល្បីនៅស្រុកសូទ្រនិគម ត្រូវលុបវិញ

ចម្លាក់​ដី បណ្តុំ​ទៅ​ដោយ​រូបភាព​ចម្លាក់​មាន​ទម្រង់​ជា​បន្ទប់​គេង មាន​គ្រែ តុ កៅអី នាឡិកា រូបចម្លាក់​ផ្កាចន្ទន៍ និង​អាង​ទឹក ស្ថិត​នៅ​តំបន់​ព្រៃ​សហគមន៍​គោក​តឹង ក្នុងស្រុក​សូទ្រនិគម ខេត្តសៀមរាប ដែល​ទទួល​បានការ​ចាប់អារម្មណ៍​ខ្លាំង​ពី​មហាជន​នោះ ត្រូវ​បាន​អ្នក​រចនា​លុប​ចោល​ហើយ ដោយសារ​តែ​ខូចខាត​ដោយ​ទឹកភ្លៀង ។​

​យ៉ាងណា​ក៍ដោយ បើ​តាម​ប្រភព​ព័ត៌មាន​ដែល​គេ​បាន​ចែកចាយ​បន្ត​គ្នា​នៅ​លើ​បណ្តាញ​សង្គម​នៅ​ថ្ងៃ​ទី​១០ តុលា ២០២០ ដោយសារ​មាន​អ្នក​ឧបត្ថម្ភ​នោះ ក្រុម​អ្នក​រចនា​ចម្លាក់​ដី​ខាងលើ គ្រោង​នឹង​ធ្វេ​ី​នៅ​កន្លែង​ផ្សេង​ទៀត ហើយ​ដែល​ការ​ធ្វើ​ក្រោយ​នេះ គឺ​នឹង​មាន​ដំបូល​ដើម្បី​ការពារ​ទឹកភ្លៀង ។​

​សូម​បញ្ជាក់​ថា ចម្លាក់​ដី​ដោយ​ការ​ជីក​ក្រោម​ដី រំលេច​ដោយ​ការ​សូន​រូប និង​ការ​ឆ្លាក់​រូប​ជា​បន្ទប់​គេង មាន​គ្រែ តុ​កៅអី ប្រៀប​ដូច​គេហដ្ឋាន​នៃ​គ្រួសារ​ត្រកូល​អភិជន និង​មាន​រូបភាព​ផ្កា​ភ្ញី​លើ​ជញ្ជាំង​នោះ​មា​នទី​តាំងនៅ​ក្នុងភូមិ​គោក​តឹង ឃុំ​ចាន់​ស ស្រុក​សូទ្រនិគម ខេត្តសៀមរាប កសាង​ឡើង​ដោយ​យុវជន ២ នាក់ ជា​បងប្អូន​នឹង​គ្នា​រស់នៅ​ភូមិ​រកា​កំបុត ឃុំ​ត្រពាំង​ធំ ក្នុងស្រុក​ប្រាសាទបាគង​។​

​បើ​តាម​មន្ទីរ​ព័ត៌មាន​ខេត្តសៀមរាប​បាន​ស្រង់​សម្តី លោក ពា​ញ ស៊ី​ថា ជា​អ្នក​រចនា និង​ដឹកនាំ​កែ​ច្នៃ​រូប ឲ្យ​ដឹង​ថា លោក​ពុំ​មែន​ជា​វិចិត្រករ និង​ធ្លាប់​សិក្សា​ពី​ចម្លាក់​អី​ទេ ប៉ុន្តែ​ការ​ច្នៃ​ឆ្លាក់​រូបភាព​ទាំងនេះ គឺ​ចេះ​ត​ពី​ការ​សង្កេត​ពី​គ្នា​ទៅ​វិញ​ទៅ​មក​ផ្សំ​នឹង​គំនិត​ថ្មី​ៗ​ខ្លួនឯង ទើប​លេច​សមិទ្ធផល​នេះ ហើយ​បច្ចេកទេស​កែ​ច្នៃ​គឺ​កើតឡើង​ពី​កម្លាំង​មនុស្ស​សុទ្ធសាធ​ប្រើ​ឧបករណ៍​សាមញ្ញ​ៗ សម្រាប់​ជីក​កាយ​ដី ប្រើប្រាស់​កម្លាំង​ពលកម្ម​សុទ្ធសាធ​មាន​ចំនួន ៩ នាក់​៕