ក្រុមហ៊ុនភូមិវប្បធម៌ ដែលមានទីតាំងស្ថិតនៅក្នុងខេត្តសៀមរាប បានប្រកាសបិទអាជីវកម្មទាំងស្រុងចាប់ពីថ្ងៃទី០៧ វិច្ឆិកា ២០២០ ដោយសារវិបត្តិហិរញ្ញវត្ថុដែលផ្តើមចេញពីជំងឺកូវីដ១៩ ។
នេះបើតាមសេចក្តីជូនដំណឹងចុះថ្ងៃទី១១ តុលា ២០២០ របស់ក្រុមហ៊ុនភូមិវប្បធ៌ម ។
ការប្រកាសបិទអាជីវកម្មទាំងស្រុងរបស់ភូមិវប្បធម៌នៅខេត្តសៀមរាបនេះ គឺដោយសារតែការរីករាលរាលដាលនៃជំងឺកូវីដ-១៩ ធ្វើឲ្យភ្ញៀវចូលទស្សនាមានការថយចុះយ៉ាងគំហុកជាច្រើនខែកន្លងមកនេះ បណ្ដាលឲ្យក្រុមហ៊ុនមានការជួបវិបត្តហិរញ្ញវត្ថុ។
បើតាមសេចក្តីជូនដំណឹងដដែល ការបិទអាជីវកម្មនេះដែរ ក៏បានធ្វើឲ្យមានការបញ្ចប់កិច្ចសន្យាការងារជាមួយបុគ្គលិកគ្រប់ផ្នែកទាំងអស់ ដូច្នេះ គណៈគ្រប់គ្រងនៃក្រុមហ៊ុនភូមិវប្បធម៌កម្ពុជា នឹងធ្វើការទូទាត់ប្រាក់សំណងជូនបុគ្គលិកទាំងអស់ស្របតាមបទប្បញ្ញត្តិច្បាប់ស្ដីពីការងារ។
ភូមិវប្បធម៌មានទំហំ២១ម៉ឺនម៉ែត្រការ៉េ ដែលស្ថិតនៅតាមបណ្តោយផ្លូវជាតិលេខ៦ ចម្ងាយ៣គីឡូម៉ែត្រពីអាកាសយានដ្ឋានអន្តរជាតិសៀមរាប និង៥គីឡូម៉ែត្រពីប្រាសាទអង្គរវត្ត។ វាក្លាយជាគោលដៅមួយផ្នែកដែលបានទាក់ទាញទេសចរណ៍ទៅកាន់ខេត្តសៀមរាប បើគិតចាប់តាំងពីដំណើរពីខែកញ្ញា ឆ្នាំ២០០៣មក។
ភូមិនេះមានសារមន្ទីរក្រមួនដែលបង្ហាញពីរូបប្រវត្តិសាស្ត្រផ្សេងៗ តាំងពីរបៀបសាងសង់ប្រាសាទអង្គវត្ត ជីវភាពរស់នៅរបស់ជនជាតិខ្មែរនាសម័យចេនឡា និង រូបតំណាងឱ្យមនុស្សដែលមានចារក្នុងប្រវត្តិសាស្ដ្រផ្សេងៗទៀត។
លើសពីនេះទៅទៀត នៅទីនោះមានរូបគំរូ ១/២០ នៃផ្សារធំថ្មី ព្រះបរមរាជវាំង វត្តភ្នំ នៅភ្នំពេញ ភ្នំឧត្តុង្គ និង មានសំណង់គម្រូនៃខ្ទម និង ផ្ទះខ្មែរ, ផ្ទះជនជាតិ, វត្ត និង វិហារឥស្លាម ដែលទាក់ទាញភ្ញៀវទេសចរគ្រប់ជនសាសន៍ មកចូលទស្សនាច្រើនកុះករ នាពេលមុនកម្ពុជា និងពិភពលោកជួបប្រទះនូវជំងឺឆ្លងកូវីដ-១៩។
ក្រោមអ្នកតាមដានសង្គមមួយចំនួនបានសម្តែងការសោកស្តាយក្រោយទទួលព័ត៌មានស្តីពីការបិទភូមិវប្បធ៌ម ដែលតែងតែបង្ហាញភ្ញៀវជាតិ និងអន្តរជាតិពីវប្បធ៌ម អរិយធ៌ម មុនសម័យអង្គរ សម័យអង្គរដ៍រុងរឿង និងបានចូលរួមចំណែកដ៍ធំធេងជាមួយរាជរដ្ឋាភិបាលក្នុងការលើកស្ទួយ និងថែរក្សាវប្បធ៌មជាតិដ៍សម្បូរបែបនិងមានវ័យចំណាស់នៅក្នុងតំបន់និងពិភពលោក ។
«អង្រុត» សូមសំណូមពរដល់លោកនាយករដ្ឋមន្ត្រី ហ៊ុន សែន ពិនិត្យលទ្ឋភាពបែបណា ដើម្បីបន្តរក្សានូវភូមិវប្បធ៌មក្នុងខេត្តសៀមរាបឲ្យនៅជានិរន្តរ៍ ទុកជាប្រយោជន៍សម្រាប់កូនខ្មែរជំនាន់ក្រោយៗ ក៍ដូចជាបង្ហាញឲ្យជាតិសាសន៍ដទៃលើលោកស្គាល់ខ្មែរកាន់តែច្បាស់ ៕