ខណៈពេលនេះ ទឹកស្ទឹងព្រែកត្នោតបាននិងកំពុងហក់ឡើងខ្លាំងបង្កឲ្យអាជ្ញាធរមានការព្រួយបារម្ភនិងបានអំពាវនាវដល់ពលរដ្ឋដែលរស់នៅតាមសណ្តរមាត់ស្ទឹងព្រែកត្នោតបង្កើនការប្រុងប្រយ័ត្នខ្ពស់ ។
ការអំពាវនាវរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញខាងលើនេះ បានធ្វើឡើងនៅរសៀលថ្ងៃទី១៣ តុលា ២០២០នេះ ខណៈលោកបានដឹកនាំមន្ត្រីជំនាញ និងអាជ្ញាធរចុះពិនិត្យមើលស្ថានភាពផ្លូវទំនប់សណ្តរស្ទឹង ក្នុងភូមិថ្ម សង្កាត់ទៀន ខណ្ឌដង្កោ ខណៈមានការគំរាមកំហែងដោយជំនន់ទឹកភ្លៀងនៅតាមដងស្ទឹងព្រែកត្នោត ដើម្បីរិះរកមធ្យោបាយធ្វើយ៉ាងណាទប់ស្កាត់ការបាក់ទំនប់ដងស្ទឹង បង្កគ្រោះមហាន្តរាយដល់ប្រជាពលរដ្ឋ។
បើតាមមន្ត្រីអាជ្ញាធរខណ្ឌដង្កោបានអះអាងថា មកដល់ពេលនេះសង្កាត់ចំនួន៧ក្នុងចំណោម១២សង្កាត់នៅទួទាំងខណ្ឌ បានទទួលរងនូវការលិចលង់ដោយជំនន់ទឹកភ្លៀង ។
លោកស្រី គឹម ញឹប អភិបាលខណ្ឌដង្កោ បានឲ្យដឹងទៀតថា ប្រជាពលរដ្ឋចំនួន៦០គ្រួសារ រស់នៅក្នុងភូមិថ្ម សង្កាត់ទៀន កំពុងរងនូវការគំរាមកំហែងពីទឹកជំនន់ ហើយថា ផ្លូវទំនប់ដងស្ទឹងដែលត្រូវបានគំរាមកំហែងនេះមានប្រមាណជា៣គីឡូម៉ែត្រ ចាប់ពីព្រំប្រទល់សង្កាត់គងនយ រហូតដល់សង្កាត់ស្ពានថ្ម ។
សូមបញ្ជាក់ថា ក្រៅពីទឹកស្ទឹងព្រែកត្នោតកំពុងហក់ឡើង និងពលរដ្ឋមួយចំនួនកំពុងទទួលរងផលប៉ះពាល់ លំនៅឋានប្រជាពលរដ្ឋជាច្រើនក្នុងភូមិសាស្ត្ររាជធានីភ្នំពេញ ក៍បានទទួលរងនូវការជន់លិចដោយសារទឹកភ្លៀងផងដែរ ។ ការលិចលង់នេះ ក៍ត្រូវបានប្រជាពលរដ្ឋនិងមជ្ឈដ្ឋានមួយចំនួនបានស្តីបន្ទោសទៅលើអាជ្ញាធរដែលបានលុបបឹងស្តុកទឹកជាច្រើនដូចជាបឹងកក់ បឹងប៉ាយ៉ាប បឹងទំពុននិងពេលនេះ បឹងតោមោកដែលជាបឹងធំចុងក្រោយក៍កំពុងត្រូវបានគេចាក់ដីលុបដើម្បីសាងសង់ផ្សារ និងក្រសួង អង្គភាពស្ថាប័នរាជរដ្ឋាភិបាល ៕
