ឡាវប្រាប់ឲ្យខ្មែរប្រយ័ត្នកម្ពស់ទឹកទន្លេសេកុងដោយសារភ្លៀងនិងវៀតណាមបើកបង្ហូរទឹក

រដ្ឋបាល​ខេត្ត​អត្ត​ពឺ នៃ​ប្រទេស​ឡាវ កាលពី​ថ្ងៃ​ទី​១២ តុលា​បាន​ផ្ញើ​លិខិត​ប្រកាស​ជា​មុន​ឱ្យ​រដ្ឋបាល​ខេត្តស្ទឹងត្រែង ប្រុង​ប្រយ័ត្ន​កំណើន​កម្ពស់​ទឹក​ទន្លេសេកុង ដោយសារ​ឥទ្ធិពល​ព្យុះ​លី​ន​ហ្វា​បណ្តាល​ឲ្យ​ទឹកភ្លៀង​ខ្លាំង និង​ក្រុមហ៊ុន​វា​រី​អគ្គិសនី​ភូមិភាគ​កណ្ដាល​របស់​វៀតណាម​នឹង​បើកទឹក​ចេញពី​អាង​ស្តុក​ទឹក​វា​រី​អគ្គិសនី ធ្វើ​ឲ្យ​ទឹក​ហូរ​ចុះ​មក​ទន្លេសេកុង​របស់​កម្ពុជា ។​

​កាលពី​ថ្ងៃ​ទី​១១ តុលា ២០២០ ក្រសួង​ធនធានទឹក និង​ឧតុនិយម​របស់​ប្រទេស​កម្ពុជា ក៍បាន​ធ្វើការ​អំពាវនាវ​ដល់​ប្រជាពលរដ្ឋ​រស់នៅ​តាម​ដង​ទន្លេសេកុង សេ​សាន និង​ទន្លេស្រែពក ក៍​ដូច​ជា​អាជ្ញាធរ​ពាក់​ព័​ន្ឋ​ទាំងអស់​បង្កើន​ការ​ប្រុង​ប្រយ័ត្ន​ចំពោះ​ការ​ហក់​ឡើង​នៃ​ទឹកទន្លេ ដើម្បី​ជៀសវាង​គ្រោះថ្នាក់​ជាយ​ថា​ហេ​ត​។​

​សូម​បញ្ជាក់​ដែរ​ថា នឹង​មាន​ព្យុះ​មួយទៀត​កើតឡើង​នៅ​ភាគ​ខាងកើត​ប្រទេស​ហ្វី​លី​ពី​ន ហើយ​ព្យុះ​ទី​១៧​ឈ្មោះ​«​សូវ​ឌែ​ល​» នឹង​ចេញពី​សមុទ្រ​ចិន​ខាងត្បូង​ហើយ​ចូល​មក​ភាគ​ខាងត្បូង​ប្រទេស​វៀតណាម​នៅ​ថ្ងៃ​ទី​១៥-១៧​តុលា ហើយ​នៅ​ថ្ងៃ​ទី​១៨ តុលា ព្យុះ​ទី​១៧​នេះ នឹង​ចូល​មក​ដល់​ខេត្តរតនគិរី​និង​ខេត្តស្ទឹងត្រែង ៕