អ្នកវិភាគនយោបាយនិងសង្គម លោក គឹម សុខ បានលើកឡើងថា បញ្ហាសំរាមច្រើននៅក្នុងប្រទេសកម្ពុជាបច្ចុប្បន្ន ពិសេសក្នុងរាជធានីភ្នំពេញមិនចោទជាបញ្ហានោះទេ ចំណោទដែលធំនោះគឺខ្លាចបរិមាណសំរាមតិចទៅវិញទេ ។
នៅលើបណ្តាញសង្គមហ្វេសប៊ុក អ្នកវិភាគដែលធ្លាប់រងការចាប់ឃុំខ្លួនពីបទញុះញង់រូបនោះបានសរសេរបង្ហោះនៅព្រឹកថ្ងៃទី១៤ តុលានេះថា លោក គឹម សុខ ផ្តល់យោបល់ឲ្យយកសំរាមទៅប្រើប្រាស់ផលិតជាឋាមពលអគ្គិសនី ក្រោមការទទួលខុសត្រូវរបស់ក្រុមហ៊ុនរដ្ឋបាលក្រុង ។
បើតាមលោក គឹម សុខ ដែលអះអាងថាខ្លួនធ្លាប់សិក្សាយល់ដឹងច្រើនហើយ ពីក្រុមអ្នកជំនាញ និងក៏ជាអ្នកវិនិយោគឥណ្ឌាអំពីបញ្ហាសំរាមនោះ បានបន្តថា «ខ្ញុំ៏(លោក គឹម សុខ)សង្ស័យ គឺបរិមាណសំរាមនៅទូទាំងកម្ពុជា មិនទាន់គ្រប់គ្រាន់ក្នុងការផលិតកម្លាំងអគ្គិសនី ដើម្បីផ្គត់ផ្គង់ទីក្រុងភ្នំពេញទាំងមូលបាន មិនមែនបារម្ភរឿងពិបាកប្រមូលសំរាមសំអាតទីក្រុងទេ ។ ប៉ុន្តែ ទោះបីជាប្រឈមបញ្ហាសំរាមមិនគ្រប់តម្រូវការក្ដី ខ្ញុំវិភាគឃើញថា ក៏នៅអាចផលិតថាមពលអគ្គិសនី បានរហូតអាចជួយសម្រាលអ្នកភ្នំពេញ មួយភាគធំគួរសមដែរ ។» ។
លោកបានពន្យល់ថា រឿងសំរាមនៅភ្នំពេញ និងតាមបណ្ដាខេត្តនានា នឹងលែងក្លាយទៅជាមេរោគស្អុយអសោចពេញក្រុងនិងទីប្រជុំជនទៀតហើយ ហើយនឹងចេញលទ្ធផលចំណេញច្រើនលើសលប់ដូចខាងក្រោម ៖
១. ភ្នំពេញ និងទីប្រជុំជនខេត្តទាំងអស់ ស្អាតគ្រប់កន្លែង ទាំងរៀបរយប្រព័ន្ធសម្អាតទីក្រុង និងទីប្រជុំជន ។
២. អ្នកក្រុងភ្នំពេញ និងអ្នកទីប្រជុំជនខេត្តគ្រប់គ្រួសារ មិនចាំបាច់ចំណាយលុយ ដើម្បីបង់ថ្លៃសេវាប្រមូលសំរាមឡើយ ។ ក្រុមហ៊ុនផលិតថាមពលអគ្គិសនីរបស់រដ្ឋ រ៉ាប់រងប្រមូលសំរាមដោយឥតគិតថ្លៃ រួមទាំងសេវាសំអាតទីក្រុងផង ។
៣. អ្នកភ្នំពេញ នឹងអាចប្រើភ្លើងអគ្គិសនី ក្នុងតម្លៃប្រមាណ ៣០០៛/kwh(គីឡូវ៉ាត់ម៉ោង)[ក្រោម៥០%ធៀបនឹងតម្លៃបច្ចុប្បន្ន] និងតម្លៃហ្កាសចំអិនអាហារ ខ្ទង់១/៣(១ភាគ៣) ធៀបនឹងតម្លៃបច្ចុប្បន្ន ។
៤. បុគ្គលិក និងកម្មករប្រមូលសំរាម/សំអាតទីក្រុង អាចទទួលបានប្រាក់ខែយ៉ាងតិច $300/ខែ មានសេវាធានារ៉ាប់រងសុវត្ថិភាពការងារ មានសេវាថែទាំសុខភាពជាប្រចាំ និងត្រូវបញ្ជូលជាបុគ្គលិករាជការពេញសិទ្ធិផង ។
យ៉ាងណា បើតាមលោក គឹម សុខ គម្រោងដែលលោកធ្លាប់បានសិក្សាជាមួយអ្នកជំនាញខាងលើនេះ ត្រូវបានមន្ត្រីរាជរដ្ឋាភិបាលច្រានចោល ព្រោះបើធ្វើតាមគំនិតនេះបានប្រយោជន៍អ្នកភ្នំពេញ តែបាត់ប្រយោជន៍រាប់លានដុល្លារពីក្រុមអ្នកដឹកនាំ ។
គិតត្រឹមម៉ោង១និង៤៤នាទីរសៀលថ្ងៃពុធដដែលនេះ មិនទាន់ឃើញមានប្រតិកម្មតបណាមួយនៅឡើយទេពីមន្ត្រីជំនាញរាជរដ្ឋាភិបាល ពិសេសមន្ត្រីសាលារាជធានីភ្នំពេញ ។ ចំណែក«អង្រុត» ក៍មិនអាចរកការសុំអត្ថាធិប្បាយភ្លាមៗបាននៅឡើយដែរពីអ្នកនាំពាក្យក្រសួងរ៉ែនិងឋាមពល ក៍ដូចជាអ្នកនាំពាក្យសាលារាជធានីភ្នំពេញ ។
កាលពីថ្ងៃទី២៥ តុលា ២០១៩ លោកនាយករដ្ឋមន្ទ្រី ហ៊ុន សែន ធ្លាប់បានលើកឡើងអំពីបញ្ហា សំរាមក្នុងទីក្រុង ដោយក្នុងនោះលោកបានស្នើទៅក្រសួងរ៉ែ និងថាមពល ធ្វើការសិក្សា និងស្វែងរកដៃសាងសង់រោងចក្រផលិតអគ្គិសនីដោយដុតសំរាម។ លោក បន្តថាវិធីនេះនឹងចូលរួមរក្សាសោភ័ណ្ឌភាពទីក្រុង និងបរិស្ថានស្អាត។
កាលពីថ្ងៃទី២១ សីហា ២០២០ ក្រុមហ៊ុន MIZUDA ដែលជាក្រុមហ៊ុនវិនិយោគរបស់សាធារណរដ្ឋប្រជាមានិតចិនលើប្រតិបត្តិការរក្សាបរិស្ថាន បានស្នើសុំសាងសង់រោងចក្រដុតសំរាម ដើម្បីផលិតនិងផ្គត់ផ្គង់ឋាមពលអគ្គីសនីនៅខេត្តសៀមរាប ក្រោយពេលដែលគម្រោងវិនិយោគនេះ ត្រូវបានសិក្សាប្រកបដោយជោគជ័យ អស់រយៈពេលជាងកន្លះឆ្នាំ ដែលបានបញ្ចប់កាលពីមុនខែធ្នូឆ្នាំ២០១៩កន្លងទៅ ។ យ៉ាងណា មកទល់នឹងពេលនេះ គេមិនដឹងថា ក្រុមហ៊ុនចិនខាងលើបានដំណើរការដល់ណាហើយនោះនៅឡើយទេ ?។
យោងតាមរបាយការណ៍របស់មូលិនិធិអាល្លឺម៉ង់ Konrad Adenauer Stiftung (KAS) ដែលចេញផ្សាយកាលពីខែកញ្ញា ឆ្នាំ២០១៩ នេះបានឲ្យដឹងថា ប្រទេសកម្ពុជាទាំងមូលបង្កើតកាកសំណល់សំរាមជាង១ម៉ឺនតោនជារៀងរាល់ថ្ងៃ ឬជាង៣លាន៦សែនតោនក្នុងមួយឆ្នាំ ដែលក្នុងនោះជាង៩០ភាគរយមិនត្រូវបានយកទៅកែច្នៃវិញនោះទេ៕
