ទីបំផុតទៅ ជនបង្កដែលបើករថយន្តបុកនិងថយកិន បណ្តាលឲ្យជនរងគ្រោះស្លាប់បាត់បង់ជីវិតកាលពីយប់ថ្ងៃទី១៥ តុលានោះ ត្រូវបានសមត្ថកិច្ចឃាត់ខ្លួនបានហើយនៅថ្ងៃសុក្រនេះ ។
បើតាមស្នងការរងរាជធានីភ្នំពេញទទួលផែនចរាចរណ៍ លោកឧត្តមសេនីយ៍ទោ ចេវ ហាក់ បានឲ្យដឹងថា ជនបង្កឈ្មោះ យ៉ាន់ណា លីណា ភេទ ប្រុស អាយុ ៣០ ឆ្នាំ មុខរបរ ពេទ្យធ្មេញ ស្នាក់នៅផ្ទះលេខ៥ អឹម ក្រុមទី៤ ភូមិព្រៃព្រីងខាងត្បូងទី១ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។
គួរបញ្ជាក់ថា គ្រោះថ្នាក់ចរាចរណ៍លោកពេទ្យធ្មេញបើករថយន្តម៉ាក Lexus NX 200 T ស្លាកលេខ ភ្នំពេញ 2BH-8494 ភ្នំពេញ បុកម៉ូតូជនរងគ្រោះពីក្រោយ រួចថយកិនបណ្ដាលអោយស្លាប់នោះគឺ កេីតឡេីងកាលពីម៉ោងប្រមាណ១១និង៣០នាទីយប់ថ្ងៃទី១៥ តុលា ២០២០ នៅចំណុចផ្លូវ ១៧៣ កែងផ្លូវ ៣២៨ សង្កាត់ ទួលស្វាយព្រៃ ១ ខណ្ឌបឹងកេងកង ។
បើតាមលោកផ្កាយ២ ចេវ ហាក់ នៅថ្ងៃស្អែកនេះ សមត្ថកិច្ចនឹងបញ្ជូនសំណុំរឿងនេះទៅអយ្យការអមសាលាដំបូងរាជធានីភ្នំពេញដេីម្បីចាត់ការបន្តតាមច្បាប់ ។
បើតាមវីដេអូដែលត្រូវបានគេចែកចាយបន្តគ្នាលេីបណ្ដាញសង្គមហ្វេសប៊ុក ឃេីញថា ជបង្កពិតជាមានចរិតឃោរឃៅព្រៃផ្សៃណាស់ បន្ទាប់ពីបុកជនរងគ្រោះពីក្រោយមិនស្លាប់ហេីយ ឈ្មោះ យ៉ាន់ណា លីណា បានបេីកថយក្រោយកិនជនរងគ្រោះបន្ថែមរហូតដល់ស្លាប់ពេលបញ្ជូនទៅដល់មន្ទីរពេទ្យ ។ បច្ចុប្បន្នជនរងគ្រោះមិនទាន់ស្គាល់អត្តសញ្ញាណត្រូវបានក្រុមគ្រួសារកំពុងតម្កល់ធ្វេីបុណ្យនៅវត្តសំរោងអណ្ដែត ។
ក្រៅពីមហាជនដែលឃើញវីដេអូឃ្លីបដែលគេបង្ហោះចែកចាយបន្តគ្នា ហើយបានថ្កោលទោសជនបង្កនោះ លោកឧត្តមសេនីយ៍ ទី ចំរើនកុសល ដែលគេស្គាល់ថាជាអ្នកបញ្ចេញមតិរិះគន់រាល់ទង្វើខុសច្បាប់នានានៅលើបណ្តាញសង្គមផេកហ្វេសប៊ុកលោក ក៍បានចាត់ទុកសំណុំរឿងនេះថាជាអំពើមនុស្សឃាតដោយចេតនា និងបានស្នើសុំឲ្យអ្នកអនុវត្តច្បាប់មេត្តាកុំកសាងសំណុំរឿងមួយនេះទៅជាមនុស្សឃាតដោយធ្វេសប្រហែសអោយសោះ។ លោកថា លោកនឹង នឹងតាមដានរឿងមួយនេះ ៕
