រាល់តៃកុងឡាន ដែលដឹកអ្នកដំណើរបរទេសចេញពីព្រលានយន្តហោះ ហើយទម្លាក់តាមផ្លូវ ដោយមិនដឹកទៅកាន់សណ្ឋាគារ ឬមណ្ឌលសុខភាព រង់ចាំលទ្ធផលធ្វើតេស្តរកមេរោគកូវី១៩ នឹងត្រូវចាត់វិធានការតាមច្បាប់តែម្តង។
នេះជាការលើកឡើងរបស់លោក ឃួង ស្រេង អភិបាលរាជធានីភ្នំពេញនៅលើបណ្តាញព័ត៌មានអេឡិចត្រូនិក FN នាព្រឹកថ្ងៃទី១៨ តុលា ២០២០នេះ ។
ការព្រមានរបស់លោក ឃួង ស្រេង ខាងលើ បានធ្វើឡើង នៅក្រោយពីសាលារាជធានីភ្នំពេញ ស្រាវជ្រាវដឹងថា មានតៃកុងឡានមួយចំនួន ដែលដឹកអ្នកដំណើរចេញពីព្រលានយន្តហោះ យកទៅដាក់នៅសណ្ឋាគារ ដើម្បីរង់ចាំលទ្ធផលធ្វើតេស្ត២៤ម៉ោងនោះ បានលួចទម្លាក់អ្នកដំណើរបរទេសនៅតាមផ្លូវ ដោយមិនទាន់ដឹងលទ្ធផល ដែលនេះជាការអនុវត្តខុសអំពីវិធានការរបស់រាជរដ្ឋាភិបាល ។
គួរបញ្ជាក់ដែរថា គិតត្រឹមម៉ោង២និង៤៥នាទីរសៀលថ្ងៃទីអាទិត្យនេះ កម្ពុជាមានអ្នកផ្ទុកមេរោគកូវីដ១៩ សរុបចំនួន២៨៣នាក់ (ស្ត្រី៥៦នាក់) ក្នុងនោះករណីជាសះស្បើយចំនួន២៨០នាក់ និងកំពុងសំរាកនៅមន្ទីរពេទ្យ៣នាក់ ខណៈប្រទេសក្នុងតំបន់អាស៊ានមួយចំនួនបាននិងកំពុងហក់ឡើងខ្ពស់ដូចជាភូមា ម៉ាឡេស៊ី ហ្វីលីពីន និងប្រទេសឥណ្ឌូនេស៊ីជាដើម៕