បាញ់ទៀតហើយ ! ចិនបាញ់ចិន ផ្អើលខ្មែរនៅខេត្តព្រះសីហនុ

ស្នូរ​គ្រាប់កាំភ្លើង​ជា​ច្រើន​គ្រាប់ ត្រូវ​បាន​គេ​ឮ​យ៉ាង​កក្រើក​កាលពី​ម៉ោង​ប្រមាណ​២​រំលង​អធ្រាត្រ​ឈាន​ចូល​ថ្ងៃ​ទី​២២ តុលា ២០២០​នេះ នៅ​ខេត្ត​ព្រះ​សីហ​នុ ។​

​បើ​តាម​លោក​ឧត្តមសេនីយ៍ទោ ជួន ណា​រិ​ន្ទ ស្នងការ​នគរបាល​ជាតិ​បាន​ប្រាប់ FN ថា ពិតជា​មាន​ករណី​បាញ់​កើតឡើង​មែន​កាលពី​រំលង​អធ្រាត្រ​ឈាន​ចូល​ថ្ងៃ​ព្រហស្បតិ៍​នេះ ហើយ​ថា​ករណី​បាញ់​នេះ​បង្ក​ឡើង​ដោយ​ជនជាតិ​ចិន​និង​ចិន ប៉ុន្តែ​មិន​ទាន់​ដឹង​ពី​មូលហេតុ​នៃ​ការ​ដែល​ចិន​បាញ់​ចិន​បង្ក​ឲ្យ​ជនជាតិ​ចិន​២​នាក់​រង​របួស​នោះ​នៅឡើយ​ទេ ។​

​យ៉ាងណា​ក៍ដោយ បើ​តាម​លោក​ផ្កាយ​២ ជួន ណា​រិ​ន្ទ ជនសង្ស័យ​ក្នុង​ការ​បាញ់បោះ​សេរី​កណ្តាល​ក្រុង​ទេសចរណ៍​ខាងលើ​នេះ ត្រូវ​បាន​កងកម្លាំង​ព្រហ្មទណ្ឌ​ឃាត់ខ្លួន​បាន​ភ្លាម​ៗ និង កំពុង​សាកសួរ កសាង​សំណុំរឿង​បន្ត​ចាត់ការ​តាម​ច្បាប់ ។

សូម​បញ្ជាក់​ថា ចាប់តាំងពី​ជនជាតិ​ចិន​មាន​វត្ត​មាននៅ​ខេត្ត​ព្រះ​សីហ​នុ​ប៉ុន្មាន​ឆ្នាំ​កន្លង​មកនេះ គេ​សង្កេត​ឃើញ​បញ្ហា​អសន្តិសុខ ករណី​ជួញដូរ​គ្រឿងញៀន ការ​បាញ់បោះ​សេរី អំពើ​ប្លន់ និង​អំពើ​ហិង្សា​បាន​កើតឡើង​ញឹកញាប់ ហើយ​ជនសង្ស័យ​ដែល​ប្រព្រឹត្ត​បទល្មើស ត្រូវ​បាន​សមត្ថកិច្ច​ឃាត់ខ្លួន​បានជា​បន្តបន្ទាប់ និង​ខ្លះ​ក៍​ត្រូវ​បាន​ចាប់​បញ្ជូន​ឲ្យ​ត្រឡប់​ទៅ​កាន់​ប្រទេស​ចិន​វិញ​ផង​ដែរ ៕