កំពុងតែស្រែក«២៣តុលានៅឯណា យើងត្រូវការ២៣តុលា»សមត្ថកិច្ចចាប់ខ្លួន៣នាក់

ក្រុម​អ្នក​តវ៉ា​ចំនួន​០៣​នាក់ ត្រូវ​បាន​សមត្ថកិច្ច​ចាប់ខ្លួន​នៅ​មុខ​ស្ថានទូត​ចិន​ប្រចាំ​កម្ពុជា​ខណៈ​ពួក​គេ​រួម​នឹង​អ្នក​តវ៉ា​ប្រមាណ​១០០​នាក់​ទៀត​កំពុង​ស្រែក​«២៣​តុលា​នៅឯណា យើង​ត្រូវការ​២៣​តុលា​»​។​

​នេះ​បើ​យោង​តាម​នាយិកា​មជ្ឈមណ្ឌល​សិ​ទ្ឋិ​មនុស្ស​កម្ពុជា លោកស្រី ចក់ សុភាព ដែល​ប្រាប់ Thmey Thmey នៅ​ព្រឹក​ថ្ងៃ​ទី​២៣ តុលា ២០២០ ។​

​បើ​តាម​សេចក្តីរាយការណ៍​ក៍បាន​បញ្ជាក់​ដែរ​ថា ក្រៅពី​មានការ​ការ​ចាប់ខ្លួន​មនុស្ស​៣​នាក់​(​ស្រី​២​នាក់​) ដែល​មិន​ទាន់​ស្គាល់​អត្តសញ្ញាណ​នៅឡើយ​នោះ នៅ​ក្នុង​ការ​ប្រមូលផ្តុំ​គ្នា​តវ៉ា​មុខ​ស្ថានទូត​ចិន​ដើម្បី​ទាមទារ​ឲ្យ​ចិន​ចូលរួម​គោរព​កិច្ចព្រមព្រៀង​សន្តិភាព​ក្រុងប៉ារីស​នា​ព្រឹក​ថ្ងៃ​ទី​២៣ តុលា ២០២០ ដែល​ជា​ទិវា​រំឮកខួប​២៩​ឆ្នាំ​នៃ​កិច្ចព្រម​ព្រៀង​សន្តិភាព​ទី​ក្រុងប៉ារីស​២៣ តុលា ១៩៩១-២៣ តុលា ២០២០​នេះ​ដែរ ក្រុម​អ្នក​តវ៉ា​ និង​សមត្ថកិច្ច​ដែល​ពាក់​ម៉ាស់​និង​មួក​សុវត្ថិភាពផងនោះ ក៍​មានការ​ប៉ះទង្គិច​គ្នា​ផង​ដែរ ។​

​ប្រភព​បន្ត​ថា ក្រោយ​ចាក​ចេញពី​ស្ថានទូត​ចិន ក្រុម​អ្នក​តវ៉ា​ទាំងនោះ បាន​នាំ​គ្នា​ធ្វើ​ដំណើរ​បន្ត​ទៅ​ស្ថានទូត​នៃ​ប្រទេស​មហាអំណាច​មួយទៀត គឺ​ស្ថានទូត​អា​មេ​រិ​ក ដើម្បី​យក​ញ្ញត្តិ​ទៅ​ដាក់​។ ក្នុង​ញត្តិ​នោះ ពួក​គាត់ សុំ​ឲ្យ​រដ្ឋាភិបាល​អា​មេ​រិ​ក ជំរុញ​ប្រទេស​ទាំងអស់​ជា​ហត្ថលេខី​នៃ​កិច្ចព្រមព្រៀង​សន្តិភាព​ទី​ក្រុងប៉ារីស បើក​កិច្ចប្រជុំ​ជា​ថ្មី លើ​ខ្លឹមសារ​នៃ​កិច្ចព្រមព្រៀង​សន្តិភាព​ទី​ក្រុងប៉ារីស ព្រោះ​ពួក​គាត់ យល់​ថា រដ្ឋាភិបាល​កម្ពុជា បាន​ដើរ​ចេញ​ឆ្ងាយ​ពី​ខ្លឹមសារ​នៃ​កិច្ចព្រមព្រៀង​សន្តិភាព​ទី​ក្រុងប៉ារីស​។​

​សូម​បញ្ជាក់​ថា បើ​ទោះបីជា​លោកនាយក​រដ្ឋមន្ត្រី ហ៊ុន សែន និង​មន្ត្រីជាន់ខ្ពស់​រាជរដ្ឋាភិបាល​បាន​ច្រានចោល​ម្តង​ហើយ​ម្តងទៀត​ថា​កម្ពុជា​មិន​អនុញ្ញាត​ឲ្យ​មាន​ទីតាំង​យោធា​បរទេស​នៅ​លើ​ទឹកដី​ខ្លួន​យ៉ាងណា​ក្តី ក៍​នៅ​ក្នុង​ញ្ញត្តិ​ដែល​ក្រុម​អ្នក​តវ៉ា​ដាក់​នៅ​ក្នុង​ស្ថានទូត​អា​មេ​រិ​កក៍​បានសរសេរ​ដែរថា ពួក​គាត់​(​អ្នក​តវ៉ា​) ជា​ប្រជាពលរដ្ឋ​ខ្មែរ ប្រឆាំង​ដាច់ខាត​នឹង​វត្តមាន​កងទ័ព​ចិន ដែល​មាន​បំណង​មក​បោះទីតាំង​នៅ​លើ​ផែ​រាម​ខេត្ត​ព្រះ​សីហ​នុ និង​នៅ​តាម​តារា​សាគរ​ខេត្តកោះកុង​។ តាម​រយៈ​ញ្ញត្តិ ពួក​គាត់​(​អ្នក​តវ៉ា​) ថែម​ទាំង​ស្នើ​ឲ្យ​រដ្ឋាភិបាល​អា​មេ​រិ​ក ធ្វើ​អន្តរាគមន៍​ទៅ​រដ្ឋាភិបាល​ចិន ដើម្បី​ឲ្យ​ឈប់​គាំទ្រ​អំណាច​បុគ្គល ដែល​ពួក​គេ​សំដៅលើ​លោកនាយក​រដ្ឋមន្ត្រី ហ៊ុន សែន ។​

​នៅ​រសៀល​សុក្រ​ដដែល​នេះ អ្នកនាំពាក្យ​រាជរដ្ឋាភិបាល លោក ផៃ ស៊ី​ផា​ន មិន​អាច​រក​ការ​សុំ​អត្ថាធិប្បាយ​បាន​ឡើយ ជុំវិញ​ការ​តវ៉ា​ ការចាប់ខ្លួននិង​ខ្លឹមសារ​ក្នុង​ញ្ញត្តិ​តវ៉ា​របស់​អ្នក​វ៉ា​ខាងលើ​នេះ ។​

​គួរ​រំ​ឮ​កថា ភាគី​ខ្មែរ​ទាំង​៤(​រដ្ឋាភិបាល​នៃ​រដ្ឋ​កម្ពុជា ខ្មែរក្រហម រណសិរ្ស​រំដោះ​ប្រជាពលរដ្ឋ​ខ្មែរ​និង​ហ្វ៊ុ​ន​ស៊ិ​ន​ប៉ិច​) រួម​នឹង​ប្រទេស​១៨​ផ្សេង​ទៀត ក្រោម​ដំបូល​អង្គការសហប្រជាជាតិ​បាន​ចុះហត្ថលេខា​លើ​​កិច្ចព្រមព្រៀង​សន្តិភាព​ទី​ក្រុងប៉ារីស​កាលពី​ថ្ងៃ​ទី​២៣ ខែតុលា ឆ្នាំ​១៩៩១ នៅ​ទី​ក្រុងប៉ារីស ប្រទេស​បារាំង ។​

ប្រទេស​ទាំង​១៨​ដែល​ជា​ហត្ថលេខី​នៃ​កិច្ចព្រមព្រៀង​សន្តិភាព​ក្រុងប៉ារីស​នោះ​រួម​មាន​៖​ប្រទេស​អា​មេ​រិ​ក ចិន អូស្ត្រាលី ព្រុយ​ណេ កា​ណា​ដា បារាំង ឥណ្ឌា ឥណ្ឌូ​នេ​ស៊ី ជប៉ុន ឡាវ ម៉ា​ឡេ​ស៊ី ហ្វី​លី​ពី​ន សិង្ហ​បុរី ថៃ សហភាព​សូ​វៀត អង់គ្លេស វៀតណាម និង សហ​ព័​ន្ឋ​យូ​ហ្គោ​ស្លា​វី ៕