ស្ត្រីម្នាក់ត្រូវបានសមត្ថកិច្ចមូលដ្ឋានចាប់ខ្លួន ខណៈលួចម៉ូតូគេបានហើយបណ្តើរទៅរកជាងធ្វើសោរ ក៍ត្រូវម្ចាស់តាមទាន់ប្រាប់ប៉ូលិស ។
ហេតុការណ៍នេះ បណ្តាលឲ្យមានការភ្ញាក់ផ្អើលកាលពីម៉ោង៨និង៣០នាទីព្រឹកថ្ងៃទី២២ តុលា ២០២០ នៅចំណុចផ្សារធំតាកែវ ស្ថិតនៅភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ ។
បើតាមសមត្ថកិច្ចបានឲ្យដឹងថា ជនសង្ស័យឈ្មោះ វង់ ស្រីលីន អាយុ ៣២ឆ្នាំ មុខរបរនៅផ្ទះ មានទីលំនៅភូមិអង្គតាសោម ឃុំអង្គតាសោម ស្រុកត្រាំកក់ ខេត្តតាកែវ ។ ចំណែកម្ចាស់ម៉ូតូមានឈ្មោះឈ្មោះ ជា ស្រីរីន អាយុ ១៨ឆ្នាំ មុខរបរសិស្ស មានទីលំនៅភូមិតុំ សង្កាត់រកាក្រៅ ក្រុងដូនកែវ ខេត្តតាកែវ ម៉ូតូដែលត្រូវជនសង្ស័យលួចមិនបានសម្រេចនោះ ម៉ាកហុងដា ZoomerX ពណ៌សលាយក្រហមស៊េរីឆ្នាំ២០១៨ ពាក់ស្លាកលេខ តាកែវ 1Q-8811។
ប្រភពពីប៉ូលិសមូលដ្ឋានបានឲ្យដឹងថា មុនពេលកើតហេតុម្ចាស់ម៉ូតូបានបញ្ឈរទុកចោលនៅមាត់ច្រកចេញ/ចូលផ្សារពីខាងត្បូង រួចក៏ដើរចូលទៅក្នុងផ្សាររកទិញអីវ៉ាន់ ស្រាប់តែពេលចេញមកវិញមិនឃើញម៉ូតូ។ ភ្លាមៗនោះម្ចាស់ម៉ូតូក៏បានជិះដើររកក៏ប្រទះឃើញជនសង្ស័យ កំពុងតែបណ្ដើរម៉ូតូទៅរកកន្លែងជាងធ្វើសោ ហើយក៏បានរាយការណ៍មកសមត្ថកិច្ចក្រុងដូនកែវ ចុះមកឃាត់ខ្លួនតែម្តង ។
បច្ចុប្បន្នជនសង្ស័យកំពុងឃុំខ្លួនបណ្តោះអាសន្ន នៅអធិការដ្ឋាននគរបាលក្រុងដូនកែវ ដើម្បីកសាងសំណុំរឿងបញ្ជូនបន្តទៅសាលាដំបូងខេត្តចាត់ការតាមនីតិវិធីច្បាប់៕
