សិង្ហបុរី ៖ មួយរយៈចុងក្រោយនេះប្រទេសសិង្ហបុរីរកឃើញអ្នកឆ្លងកូវីដ១៩ កើនឡើងយ៉ាងគំហុក ក្រុមគ្រូពេទ្យសិង្ហបុរី សម្រេចប្រើថ្នាំសម្រាប់ប្រឆាំងនឹងជំងឺអេបូឡា (Remdesivir) ដើម្បីព្យាបាលអ្នកជំងឺ កូវីដ-១៩ នៅក្នុងប្រទេស ដែលនេះជាផ្នែកមួយ នៃការសាកល្បងព្យាបាលថ្នាំប្រភេទនេះ ។
វេជ្ជបណ្ឌិត Shawn Vasoo ប្រធានមជ្ឈមណ្ឌលជាតិសម្រាប់ជំងឺឆ្លង (NCID) បានប្រាប់សារព័ត៌មានក្នុងស្រុក CNA ថា មិនមានថ្នាំព្យាបាលដែលបង្ហាញឱ្យឃើញច្បាប់ សម្រាប់សម្លាប់វីរុសកូវីដ១៩នេះទេ ហើយការព្យាបាល ដោយប្រើថ្នាំសម្រាប់ប្រឆាំងនឹងជំងឺអេបូឡានេះ គឺស្ថិតក្នុងចំណោមថ្នាំ ដែលត្រូវបានសាកល្បងរួចហើយ នៅសិង្ហបុរីអាចធ្វើទៅបានសម្រាប់ការព្យាបាលលើអ្នកជំងឺ កូវីដ-១៩ ។
អង្គការសុខភាពពិភពលោក ក៏បានពិពណ៌នាដែរថា វិធីព្យាបាលច្រើនដែលជោគជ័យប្រឆាំងនឹងជំងឺកូវីដ-១៩ ក្រៅពីការព្យាបាលថ្នាំប្រឆាំងវីរុសអេបូឡា(Remdesivir)នេះ ក៏រួមបញ្ចូលទាំងថ្នាំអេដស៍ ចំនួនពីរប្រភេទ និងថ្នាំប្រឆាំងនឹងជំងឺគ្រុនចាញ់ chloroquine និង hydroxychloroquine ផងដែរ ។
ថ្នាំ Remdesivir ត្រូវបានផ្តល់ការអនុញ្ញាតឱ្យប្រើជាបន្ទាន់ ដោយរដ្ឋបាលចំណីអាហារ និងឪសថអាមេរិក (FDA) កាលពីថ្ងៃសុក្រសប្តាហ៍មុន សម្រាប់ព្យាបាលករណីធ្ងន់ធ្ងរនៃជំងឺកូវីដ១៩ ។ រំលងមួយថ្ងៃក្រោយមក ប្រទេសជប៉ុន ក៏បាននិយាយថា ខ្លួននឹងពិនិត្យយ៉ាងលឿននូវថ្នាំ Remdesivir នេះ ដូច្នេះវាអាចត្រូវបានអនុម័តសម្រាប់ការប្រើប្រាស់ក្នុងរយៈពេលមួយសប្តាហ៍ ។
មជ្ឈមណ្ឌលជាតិសម្រាប់ជំងឺឆ្លង (NCID) គឺជាផ្នែកមួយនៃក្រុមការងារ ដែលប្រកាសដោយរដ្ឋមន្ត្រីក្រសួងសុខាភិបាលសិង្ហបុរី កាលពីខែមីនា និងកំពុងពិនិត្យមើលថា តើថ្នាំព្យាបាល និងវិធីព្យាបាលថ្មី អាចត្រូវបានប្រើ ដើម្បីព្យាបាលជំងឺកូវីដ១៩ យ៉ាងដូចម្តេច ។ បន្ទាប់មកក្រុមនេះ នឹងផ្តល់នូវការវាយតម្លៃយ៉ាងខ្ពស់ ទៅលើការព្យាបាល ដែលបានស្នើសុំ និងដោះស្រាយសំណួរណាមួយ អំពីរបៀបព្យាបាល ឬប្រតិកម្មនៃថ្នាំ ដែលមានផលមិនល្អ ។
ជាការតក់សម្គាល់ ថ្នាំប្រភេទនេះ ក៏ត្រូវបាន អង្គការសុខភាពពិភពលោក WHO បញ្ចេញឲ្យប្រទេសម៉ាឡេស៊ី សាកល្បងប្រើក្នុងការព្យាបាលអ្នកជំងឺ កូវីដ-១៩ កន្លងមកនេះ ។
ត្រឹមថ្ងៃទី៥ ឧសភា ២០២០នេះ ប្រទេសសិង្ហបុរី មានអ្នកឆ្លងកូវីដ១៩សរុបចំនួន ១៨,៧៧៨ករណីហើយ និងមានអ្នកស្លាប់ចំនួន១៨ នាក់ ហើយអ្នកជំងឺដែលព្យាបាលជាសះស្បើយមានចំនួន ១,៤៥៧នាក់ផងដែរ ៕
