អតីតមន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង បានលើកឡើងថា ភរិយារបស់លោក មិនមែនជាអ្នកនយោបាយទេ គ្រាន់តែជាអាជីវករដូរលុយតូចតាចម្នាក់ដើម្បីរកកម្រៃចិញ្ចឹមគ្រួសារប៉ុណ្ណោះ ។
នៅលើបណ្តាញសង្គមហ្វេសប៊ុក អតីតតំណាងរាស្ត្រគណបក្សប្រឆាំងរូបនេះបានសរសេរបង្ហោះនៅព្រឹកថ្ងៃទី២៧ តុលានេះ មានអត្ថន័យទាំងស្រុងថា៖
«ខ្ញុំ ជាអ្នកនយោបាយ តែភរិយាខ្ញុំ មិនមែនជាអ្នកនយោបាយទេ គាត់គ្រាន់តែជាអាជីវករប្រកបមុខរបរ ដូរលុយ តូចតាចម្នាក់ដើម្បីរកកម្រៃចិញ្ចឹមគ្រួសារប៉ុណ្ណោះ ។ រយៈពេលជាងបីឆ្នាំកន្លងមកនេះ ភរិយាខ្ញុំ បានរែកពុនក្រុមគ្រួសារទាំងមូល ដោយដើរតួនាទីជាមេផ្ទះផង និងមេគ្រួសារផង ។ ទោះបីប្រឈមនឹងការលំបាកបែបនេះ ក៏ដោយ ក៏ភរិយាខ្ញុំ មិនដែលកៀបសង្កត់ឬបង្ខិតបង្ខំរូបខ្ញុំ ឲ្យបោះបង់អាជីពជាអ្នកនយោបាយឡើយ ព្រោះគាត់ស្គាល់ច្បាស់ពីឆន្ទៈ និង មនសិការរបស់ខ្ញុំ ។»។
ការលើកឡើងរបស់ លោក អេង ឆៃអ៊ាង ពីក្រៅប្រទេសខាងលើ បានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានថ្លែងព្រមានជាសាធារណៈក្នុងពិធីបើកការដ្ឋានសាសងសង់ស្ពានពីកោះពេជ្រទៅកោះនរា កាលពីព្រឹកថ្ងៃម្សិលមិញឲ្យអ្នកនយោបាយម្នាក់ដែលកំពុងនិរទេសខ្លួននៅក្រៅប្រទេសប្រយ័ត្ន ព្រោះភរិយារបស់អ្នកនយោបាយដែលលោក ហ៊ុន សែន មិនបញ្ជាក់ចំឈ្មោះនោះ កំពុងរកស៊ីមានមុខរបរជាអ្នកដូរលុយនៅភ្នំពេញ ។
ការព្រមានរបស់លោកប្រមុខរាជរដ្ឋាភិបាលទៅលើអ្នកនយោបាយរូបនោះ បានធ្វើឡើងគាប់ជួននឹងលោកកំពុងតែថ្លែងដោយប្រើពាក្យអសុរោះធ្ងន់ៗនិងគំរាមដូចគ្នានេះទៅកាន់លោក ហូរ វ៉ាន់ អតីតតំណាងរាស្ត្រគណបក្សសង្គ្រោះជាតិឲ្យបញ្ឈប់ការបញ្ជាពីក្រៅប្រទេសឲ្យមានការធ្វើបាតុកម្មប្រឆាំងចិន ព្រោះភរិយានិងកូនលោក ហូរ វ៉ាន់ អតីតមន្ត្រីជាន់ខ្ពស់គណបក្សប្រឆាំងក៍កំពុងរស់នៅភ្នំពេញដែរ ៕
155 Comments
