គ្រាន់តែមេឃងងឹត អ្នកភ្នំពេញមួយចំនួនបុកពោះ

នៅ​ប៉ុន្មាន​នាទី​មុន​នេះ ភ្លៀង​បាន​ធ្លាក់​នៅ​តំបន់​ខ្លះ​នៃ​រាជធានី​ភ្នំពេញ បន្ទាប់​ពី​ផ្ទៃមេឃ​ងងឹត​នោះ​រួច​មក ។ យ៉ាងណា​ភ្លៀង​បាន​ធ្លាក់​រយៈពេល​ប៉ុន្មាន​នាទី ក៍បាន​រាំង​វិញ តែ​ផ្ទៃមេឃ​នៅ​តំបន់​ខ្លះ​ក្នុង​រាជធានី​ភ្នំពេញ​ដដែល​នៅ​មាន​សភាព​អាប់អួរ​ងងឹត​នៅឡើយ គិត​ត្រឹម​ម៉ោង​១​និង​៤៥​នាទី​រសៀល​ថ្ងៃ​ទី​២៩ តុលា ២០២០​នេះ ។​

​នៅ​មុន​ភ្លៀង​ប៉ុន្មាន​នាទី ផ្ទៃមេឃ​បាន​ងងឹត ដែល​មាន​ប្រជាពលរដ្ឋ​មួយ​ចំនួន​តូច​ដែល​ធ្លាប់​រង​គ្រោះ​ពី​ជំនន់​ទឹកភ្លៀង​កាលពី​ស​ប្តា​ហ៍​កន្លង​មក​ថ្មី​ៗ​នេះ បាន​សម្តែង​ការ​ព្រួយបារម្ភ ។ បារម្ភ ព្រោះ​ពលរដ្ឋ​ខ្លះ​បាន​លើក​ឡើង​ថា ផ្ទះ​ខ្លួន​ទឹក​ទើបនឹង​ស្រក​មិន​ទាន់​ទាំង​ស្ងួត​ផង ឥឡូវ​មេឃ​ភ្លៀង​មក​ទៀត ហើយ​លើស​ពី​នោះ មាន​ពលរដ្ឋ​មួយ​ចំនួន​តូច​ក៍បានរ​ម្ភ​តាំងពី​ក្រសួង​ធនធានទឹក​និង​ឧតុនិយម​បាន​ប្រកាស​ពី​កម្ពុជា​នឹង​អាច​ទទួល​រង​ពី​ព្យុះ​ទី​១៨ ឈ្មោះ «​ម៉ូ​ឡាវ​(Molave)» មក​ម្ល៉េះ និង​មាន​ពលរដ្ឋ​ខ្លះ​បាន​បួងសួង​ឲ្យ​កម្ពុជា​រួច​ផុត​ពី​ឥ​ទ្ឋិ​ពល​ព្យុះ​ទី​១៨​នោះ​ថែម​ទៀត​។​

​កាលពី​ថ្ងៃ​ទី​២៥ តុលា ក្រសួង​ធនធានទឹក​និង​ឧតុនិយម​បាន​ប្រកាស​ឲ្យ​ដឹង​ថា ចាប់ពី​ថ្ងៃ​ទី​២៨ ដល់​ថ្ងៃ​ទី​២៩ តុលា នៅ​កម្ពុជា​នឹង​អាច​មាន​ភ្លៀង​ធ្លាក់​ច្រើន​និង​ខ្យល់​ខ្លាំង ជា​ពិសេស​នៅ​តំបន់​ជួរ​ភ្នំ​ដងរែក ខ្ពង់រាប​ភាគ​ឦសាន​ដូច​ជា​ខេត្តរតនគិរី ស្តឹង​ត្រែង ព្រះ​វិហារ​និង​ខេត្តឧត្តរមានជ័យ និង​តំបន់​វាលទំនាប​ដូច​ជា​ខេត្តបាត់ដំបង ប៉ៃលិន បន្ទាយ​មាន​ជ័យ កំពង់ធំ និង ខេត្តសៀមរាប ។​

​បើ​តាម​សេចក្តី​ប្រកាស​ព័ត៌មាន​ដដែល​បាន​ពន្យល់​ថា មូលហេតុ​ដែល​តំបន់​និង​ខេត្ត​មួយ​ចំនួន​ខាងលើ​នឹង​ទទួល​រង​នូវ​ទឹកភ្លៀង​ធ្លាក់​ច្រើន​និង​ខ្យល់​ខ្លាំង​ដោយសារ​ក​ម្ពូ​ជា​ទទួល​រង​នូវ​វិ​សម្ពាធ​និង​សម្ពាធ​ទាប ដែល​កើត​ចេញពី​ព្យុះ​ទី​១៨​ឈ្មោះ «​ម៉ូ​ឡាវ (Molave)» ដែល​ចេញពី​មហាសមុទ្រ​ប៉ា​ស៊ី​ហ្វិ​ក ហើយ​ហោះ​ឆ្លងកាត់​ប្រទេស​ហ្វី​លី​ពី​ន វៀតណាម មុន​ពេល​វា​បន្ត​ហោះ​ចូល​តំបន់​ប៉ា​សុង​របស់​ប្រទេស​ឡាវ ។​

​ក្រៅពី​ពន្យល់​អំពី​មូលហេតុ​ខាងលើ ក្រសួង​ធនធានទឹក​និង​ឧតុនិយម ក៍បាន​អំពាវនាវ​ដល់​ប្រជាពលរដ្ឋ​និង​អាជ្ញាធរ​មូលដ្ឋាន​នៅ​តំបន់​ប្រឈម​ខាងលើ បង្កើន​ការ​ប្រុង​ប្រយ័ត្ន​ខ្ពស់​ចៀសវាង​នូវ​គ្រោះថ្នាក់​ផ្សេង​ៗ​ដែល​អាច​កើត​មាន​ឡើងជា​យថាហេតុ ។​

​ដោយឡែក គិត​ត្រឹម​វេលា​ខាងលើ​ដែរ ព្យុះ​«​ម៉ូ​ឡាវ​» បាន​យក​ជីវិត​ពលរដ្ឋ​វៀតណាម​យ៉ាង​ហោច​ណាស់​២៥​នាក់ និង បាត់​ខ្លួន​ជា​ច្រើន​នាក់ ក្នុង​នោះ ព្យុះ​ទី​១៨​នេះ បាន​សម្លាប់​ពលរដ្ឋ​វៀតណាម​១១​នាក់​និង​បាត់​ខ្លួន​៤២​នាក់ នៅ​ក្នុងស្រុក​Nam Tra ខេត្ត Quang Nam ភាគ​កណ្តាល​ប្រទេស​វៀតណាម និងបំផ្លាញផលដំណាំស្រូវ ដំណាំផ្សេងៗរាប់ម៉ឺនហិកតា ក៍ដូចជាហេដ្ឋារចនាសម្ព័ន្ឋជាច្រើនទៀត៕