យួនសង់សំណង់រឹងកើនដល់១៦ទីតាំង ឯលោក វ៉ា គឹមហុង ថារង់ចាំរបាយការណ៍ពីខេត្តសិន

កងកម្លាំងព្រំដែន​វៀតណាម​បានបន្តសាងសង់​សំណង់​រឹងបន្ថែមទៀត​ឡើង​ដល់​១៦​ទីតាំងហើយ លើទីតាំង​ដែល​ភាគីទាំងពីរមិនទាន់ឯកភាពគ្នា ខណៈទីតាំង​ប្រក់កៅស៊ូ១១ ទៀត ក៍មិនទាន់បានរុះរើនៅឡើយ ។

នេះបើយោងតាម លោក គង់ សោភ័ណ្ឌ អភិបាលនៃគណៈអភិបាលខេត្តកណ្តាលដែលថ្លែងប្រាប់ VOD នៅថ្ងៃទី២៩ តុលា ២០២០នេះ ។

បើតាមលោកអភិបាលខេត្តកណ្តាលដដែលបានបញ្ជាក់ទៀតថា «សំណង់​រឹង​ទាំង​១៦​ទីតាំង​នេះ ភាគី​វៀតណាម​សង់​នៅ​តាម​បណ្ដា​យ​ព្រំដែន​នៃ​ខេត្ត​អាន​យ៉ាង ប្រទេស​វៀតណាម ទល់មុខ​នឹង​ស្រុក​លើក​ដែក និង​ស្រុក​កោះធំ ខេត្តកណ្តាល ប្រទេស​កម្ពុជា​។»។

លោក គង់ សោ​ភ័​ណ្ឌ បាន​ថ្លែង​ថា​៖ «​វៀតណាម​សង់​សំណង់​រឹង​និង​តង់​កៅស៊ូ សរុប​២៧​ទីតាំង ហើយ​សំណង់​រឹង​១៦ សង់​នៅ​ក្នុងស្រុក​ពីរ [​ស្រុក​លើក​ដែក និង​ស្រុក​កោះធំ​]​។ យើង​បាន​ជជែក​គ្នា​ហើយ ថា​ក្រោយ​ពី​កូ​វី​ដ គេ​នឹង​រុះរើ​»​។

កាលពី​ចុងខែ​សីហា ឆ្នាំ​២០២០ ស្នងការ​នគរបាល​ខេត្តកណ្ដាល បាន​រាយការណ៍​ថា វៀតណាម បាន​សាងសង់​ជម្រក​រឹង​មាំ​ធ្វើ​ពី​ឈើ​សសរថ្ម កម្ពស់​៣​ម៉ែត្រ ទំហំ​៥​ម៉ែត្រ​គុណ​នឹង​៤​ម៉ែត្រ ដំបូល​ប្រក់​ស័ង្កសី ស្ថិត​នៅ​ចម្ងាយ​ប្រមាណ​១២០​ម៉ែត្រ ពី​ខ្សែបន្ទាត់​ព្រំដែន​កម្ពុជា​-​វៀតណាម​ដែល​មិន​ទាន់​ឯកភាព​គ្នា​។

ប្រធាន​គណៈកម្មាធិការ​ទទួល​បន្ទុក​កិច្ចការ​ព្រំដែន​កម្ពុជា លោក វ៉ា គឹ​ម​ហុង ប្រាប់​ថា គណៈកម្មាធិការ​មិន​ទាន់​សម្រេច​ថា នឹង​ចុះ​ទៅ​ពិនិត្យ​មើល​ទីតាំង​ដែល​ភាគី​វៀតណាម​សង់​សំណង់​រឹង​នោះ​នៅឡើយ ដោយសារ គណៈកម្មាធិការ​រង់ចាំ​របាយការណ៍​ពី​អាជ្ញាធរ​ខេត្តកណ្តាល​សិន​ ។

លោក​ថា​៖ «​ទាល់​[​តែ​]​ខ្ញុំ​ជួយ​មើល​ហើយ ពិចារណា​ហើយ បាន​យើង​សម្រេច​ថា យើង​បញ្ជូន​ទៅ​ធ្វើការ​តវ៉ា​ជាមួយ​ក្រសួងការបរទេស [​ចាំ​មើល​] លទ្ធផល​ដែល​យើង​រក​ឃើញ លទ្ធផល​ដែល​យើង​វិភាគ​នូវ​របាយ​ការណ៍​ដែល​យើង​ទទួល​បាន​ពី​អាជ្ញាធរ​ដែនដី​»​។

លោក វ៉ា គឹ​ម​ហុង បានបញ្ជាក់​ប្រាប់ VOD ទៀត​ថា កម្ពុជា​សម្រេច​ជ្រើសរើស​យក​វិធីសាស្ត្រ​ចរចា​ជាមួយ​ភាគី​វៀតណាម ដោយ​យល់​ថា រឿង​សង់​សំណង់​រឹង​នេះ​មិនធំ​ដូច​ករណី​រឿង​ប្រាសាទព្រះវិហារ​ដែល​តម្រូវ​ឱ្យ​កម្ពុជា​ប្ដឹង​ទៅ​តុលាការ​អន្តរជាតិ​នោះ​ទេ​។

លោក​ថា​៖ «​អ្នក​ដែល​និយាយ​ស្នើ​ទៅ​ប្ដឹង​តុលាការអន្តរជាតិ វា​ទាល់តែ​កិច្ចការ​ហ្នឹង​វា​ធំដុំ​ណាស់ វា​គ្រាន់តែ​តង់​មួយ ប្ដឹង​ទៅ​តុលាការអន្តរជាតិ ឬ​ក៏​សំណង់​ផុត​ទឹក ប្ដឹង​ទៅ​តុលាការអន្តរជាតិ​ទេ​។ បើ​អ៊ីចឹង តុលាការអន្តរជាតិ​ងាប់​ហើយ គ្មាន​ពេល​សម្រាក​ទេ គ្រប់​តែ​ប្រទេស​គ្រាន់តែ​ធ្វើ​តង់​មួយ​ប្ដឹង​ទៅ​តុលាការអន្តរជាតិ​។ ប្រទេស​ទាល់តែ​បញ្ហា​ធំ ដូច​នៅ​ប្រាសាទព្រះវិហារ អាហ្នឹង [​រឿង​បោះ​តង់​] រឿង​កំប៉ិកកំប៉ុក យើង​យក​ទៅ​បឹ្ត​ង​តុលាការអន្តរជាតិ​។ ខ្ញុំ​ថា កំប៉ិកកំប៉ុក អា​អ្នកវិភាគ​ថា ខ្ញុំ​មិន​យកចិត្តទុកដាក់​ទៀត ប៉ុន្តែ​មិនមែន​ទេ រឿង​តុលាការអន្តរជាតិ​ទាល់តែ​បញ្ហា​ហ្នឹង​វា​ធំ​»​។

គណៈកម្មាធិការ​ទទួល​បន្ទុក​កិច្ចការ​ព្រំដែន​កម្ពុជា បាន​បញ្ជាក់​កាលពី​ខែមិថុនា ឆ្នាំ​២០២០ ថា ចាប់តាំងពី​ផ្ទុះ​ជំងឺ​កូ​វី​ដ​១៩​មក ភាគី​វៀតណាម​បាន​បោះ​តង់​នៅ​តាម​បណ្តោយ​ព្រំដែន​កម្ពុជា​-​វៀតណាម ទាំង​តំបន់​មិន​ទាន់​ឯកភាព​​និង​តំបន់​ឯកភាព​គ្នា​រួច មាន​ចំនួន​២៥៦​ទីតាំង​។

កម្ពុជា​-​វៀតណាម មាន​ព្រំប្រទល់​ជាប់​គ្នា​ប្រវែង​១ ២៧០​គីឡូម៉ែត្រ ដែល​បច្ចុប្បន្ន​ភាគី​ទាំង​ពីរ​បាន​ព្រមព្រៀង​គ្នា​បោះបង្គោល​ព្រំដែន ដើម្បី​កំណត់​ខ្សែបន្ទាត់​ព្រំដែន​បាន​៨៤​ភាគរយ​ហើយ នៅ​សល់​១៦​ភាគរយ​ទៀត នៅ​មិន​ទាន់​ឯកភាព​គ្នា​នៅឡើយ​៕