រាជធានីភ្នំពេញ ៖ អ្នកនាងកែវ ចាន់និមល ដែលទស្សនិកជនសរសើរថា ជាដៃគូពិធីករដ៏សក្ដិសមជាមួយលោកជា វិបុល បាត់មុខច្រើនសប្ដាហ៍មកហើយ នៅតែលោកជា វិបុល ។ តើអ្នកនាងនិមល លាឈប់ពីការងារ ឬយ៉ាងណា ?
នាពេល ថ្មីៗនេះ ដោយមិនអាចចាត់ទុកថា ជាការណ៍ពិត ឬយ៉ាងណានោះទេ ប្រភពសុំមិនបញ្ចេញឈ្មោះមួយឲ្យដឹងថា ពិធីការិនី កែវ ចាន់និមល បាត់មុខពីកម្មវិធីដែលនាងធ្លាប់បម្រើការនៅទូរទស្សន៍ហង្សមាស អាចមកពីមានរឿងពាក់ព័ន្ឋជាមួយលោកជា វិបុល ជាដៃគូពិធីករ គឺដូចអ្វីដែលជាពាក្យចចាមអារ៉ាមស្នេហានាពេលកន្លងមក ។ រឿងនេះអ្នកទាំងពីរបានបដិសេដរួចហើយ តែប្រភពថា ភាពស្និទ្ធស្នាលរបស់ពិធីករ ពិធីការិនីទាំងពីរនេះវានាំឲ្យកើតជាអ្វីដូចពាក្យចចាមអារ៉ាមនោះ ។
ប្រភពដដែលថា ទំនោរចិត្តរវាងពិធីករទាំងពីរ គឺសាងពីអនុស្សាវរីយ៍ជាច្រើននៅលើវេទិកា និងដំណើរវែងឆ្ងាយពេលទៅបំពេញការងារតាមបណ្ដាខេត្ត ។ ទំនងភាពស្និទ្ធស្នាល ចំអន់គ្នាអាចធ្វើឲ្យឈានហួសពីមិត្តភាព ។ មានការលេចឮថា អ្នកនាង គង់ សុជាតិ ជាភរិយាលោកជា វិបុល ក៏យកចិត្តទុកដាក់ចំណុចនេះដែរ ។
គួរឲ្យចាប់អារម្មណ៍ថែមទៀត ដោយទស្សនិកជនកត់សម្គាល់ឃើញថា មួយរយៈចុងក្រោយនេះ អ្នកនាង កែវ ចាន់និមល និងលោក ជា វិបុល ដែលធ្លាប់ចាប់ដៃគូគ្នាក្នុងកម្មវិធីជាច្រើននោះ ស្រាប់តែនៅឃើញតែលោក វិបុល ជាមួយដៃគូថ្មី មានកញ្ញា ថន លក្ខិណា ប៉ែន ស្រីពេជ្រ និងអ្នកនាង គង់ សុជាតិ ។
ទស្សនិកជនរឹតតែឆ្ងល់ថែមទៀត ដ្បិតកម្មវិធីដែលអ្នកនាង កែវ ចាន់និមល កាន់កន្លងមកជាមួយលោកវិបុលនោះ ស្រាប់តែជំនួសដោយអ្នកនាងគង់ សុជាតិ ទៅវិញ ។
មុនពេលអ្នកនាង គង់ សុជាតិ ទៅបំពេញការងារនៅទូរទស្សន៍ហង្សមាស ជាមួយលោក ជា វិបុល ធ្លាប់លេចឮពាក្យចចាមអារ៉ាមថា លោកវិបុល និងអ្នកនាងនិមល លាក់លួចស្នេហ៍នឹងគ្នា ។ ទោះជាយ៉ាងណាក្ដីពួកគេ បដិសេដថា វាមិនពិតទេ ដ្បិតសុទ្ឋតែមានប្តី មានប្រពន្ឋ រៀងៗខ្លួន ។
បច្ចុប្បន្នតំណែងពិធីការិនីរបស់ កែវ ចាន់និមល បានធ្លាក់ទៅលើអ្នកនាង គង់ សុជាតិ វិញ និងបង្កើតជាការងឿងឆ្ងល់ ។ អ្នកខ្លះសន្និដ្ឋានថា ថ្នាក់ដឹកនាំទូរទស្សន៍ បំបែកអ្នកនាងនិមល ពីលោកវិបុល ។ ការបំបែកនេះ ព្រោះមិនចង់ឱ្យមានរឿងអាស្រូវស្នេហា កើតឡើងដូចពាក្យចចាមអារ៉ាម ។
មានការលេចឮដែរថា អ្នកនាង កែវ ចាន់និមល នៅបំពេញការងារដដែល តែអាចអាក់អន់ចិត្តបាត់បង់កម្មវិធីធំៗ ។
ទោះជាយ៉ាងណាក្ដីគេដឹងថា អំឡុងពេលនេះអ្នកនាង កែវ ចាន់និមល បានចេញទៅអាមេរិកមួយរយៈ ដូច្នេះហើយវាអាចជាមូលហេតុ ដែលនាំឲ្យបាត់មុខនាងពីកម្មវិធីទូរទស្សន៍ ។ ធម្មតាកាលណានាងអវត្តមាន ត្រូវតែមានអ្នកជំនួស ទម្រាំនាងត្រឡប់មកវិញ ។
ចម្ងល់ទស្សនិកជនចំពោះការបាត់មុខអ្នកនាង កែវ ចាន់និមល ពីកម្មវិធីទូរទស្សន៍នេះ មិនទាន់រកបានការបញ្ជាក់ពីរូបនាងទេ ក្រៅតែព័ត៌មានដែលមិនទាន់ច្បាស់លាស់នាពេលនេះ ៕
