មិនជឿថា សមត្ថកិច្ចរកម្ចាស់រថយន្តស៊េរីទំនើបស្លាកលេខ ន.ប 2-5553 មិនឃើញ ?

យុវជន​ម្នាក់​បាន​ស្លាប់​ភ្លាម​ៗ​នៅ​កន្លែង​កើតហេតុ ដោយសារ​ជិះ​ម៉ូតូ​បុក​គ្នា​ជាមួយ​រថយន្ត​ស៊េរី​ទំនើប​មួយ​គ្រឿង ម៉ាក​ឡង់​គ្រី​ស័​រ ស្លាក​លេខ​ន​.​ប ហើយ​ក្រោយ​កើតហេតុ​អ្នកបើកបរ​រថយន្ត​បាន​រត់គេច​ខ្លួន​បាត់ បន្សល់​ទុក​រថយន្ត ។​

​គ្រោះថ្នាក់​ចរាចរណ៍​ដែល​បណ្តាល​ឲ្យ​មនុស្ស​ស្លាប់​នេះ បាន​កើតឡើង​កាលពី​យប់​ថ្ងៃ​ទី​៣១ តុលា ២០២០ នៅ​លើ​កំណាត់​ផ្លូវជាតិ​លេខ​១ ចំណុច​ភូមិ​-​ឃុំ​គគីរ ស្រុក​កៀនស្វាយ ខេត្តកណ្តាល ។​

​បើ​តាម​ប៉ូលិស​មូលដ្ឋាន​បាន​ឲ្យ​ដឹង​ថា ជន​រង​គ្រោះ​ដែល​ស្លាប់​ឈ្មោះ ស៊ិ​ញ ឆ​ស៊ិ​ង អាយុ​២៤​ឆ្នាំ ជនជាតិ​ខ្មែរ មាន​ទីលំនៅ​ភូមិ​អូរ​បែក​ក្អម សង្កាត់​អូរ​បែក​ក្អម ខណ្ឌ​សែន​សុខ រាជធានី​ភ្នំពេញ ជិះ​ម៉ូតូ​ម៉ាក​ហុងដា CBR ពណ៌​ខ្មៅ ពាក់​ផ្លា​ក​លេខ ភ្នំពេញ​1HU.1424 ក្នុង​គោលដៅ​ពី​ភ្នំពេញ​ទៅ​អ្នក​លឿង ។​

​ចំណែក អ្នកបើកបរ​រថយន្ត​មិន​ទាន់​ស្គាល់​អត្តសញ្ញាណ​នៅឡើយ​ទេ បើកបរ​រថយន្ត​ម៉ាក​ឡង់​គ្រី​ស័​រ ពណ៌​ស ផ្លា​ក​លេខ នគរបាល 2-5553 ទិស​ដៅ​ពី​អ្នក​លឿង​ទៅ​ភ្នំពេញ ។​

​ក្រោយ​កើតហេតុ អ្នកបើកបរ​រថយន្ត​បាន​គេចខ្លួន​បាន​ស្រមោល បន្សល់​ទុក​រថយន្ត ហើយ​នៅ​ពេល​នេះ សមត្ថកិច្ច​កំពុង​ស្រាវជ្រាវ​ដើម្បី​ឈាន​ទៅ​ចាប់ខ្លួន​អ្នកបើកបរ​រថយន្ត​ឲ្យ​ទទួលខុសត្រូវ​ចំពោះ​មុខ​ច្បាប់ ។​

​នេះ​សំណាង​ហើយ​ដែល​អ្នកបើកបរ​រថយន្ត​មិន​ចុះ​បិត​ស្លាក​លេខ​រួច​បើក​រត់ ដូច​ករណី​លោក​ផ្កាយ​៣​ម្នាក់ បើករថយន្ត Luxus 570 ពណ៌​ខ្មៅ ពាក់​ស្លាក​លេខ ភ្នំពេញ ២BK-៧៧៩៩ បុក​ម៉ូតូ​កាលពី​ម៉ោង​ជិត​១២​ថ្ងៃត្រង់​ថ្ងៃ​ទី​១៦ តុលា ២០២០ ចំណុច​ផ្លូវ​លេខ​៣៣១ កែង​ផ្លូវ ៥៧៤ ស្ថិត​នៅ​ប៉ែក​ខាងលិច វិទ្យាល័យ​ឥន្ទ្រ​ទេវី ក្នុង​សង្កាត់​បឹង​កក់​ទី​២ ខណ្ឌទួលគោក រាជធានី​ភ្នំពេញ ហើយ​ក្រោយ​បង្កហេតុ​បាន​បិត​ស្លាក​លេខ​បើក​រត់​ដោយ​សមត្ថកិច្ច​មូលដ្ឋាន​មិន​ហ៊ាន​ឃាត់​ព្រោះ​ជា​មេ​របស់​ខ្លួន ទុក​តែ​កូនចៅ​ឲ្យ​នៅ​រង់ចាំ​ដោះស្រាយ​នៅ​កន្លែង​កើត​ហេតុ​៕