បុរសម្នាក់ ត្រូវបានសមត្ថកិច្ចមូលដ្ឋានឃាត់ខ្លួន កាលពីម៉ោងប្រមាណ២រសៀលថ្ងៃទី០២ វិច្ឆិកា ២០២០នេះ ក្រោយជននេះបានដើរបិណ្ឌបាត្រខុសម៉ោងពេល ។
ជនដែលបន្លំធ្វើជាសង្ឃនោះ ត្រូវសមត្ថកិច្ចប្រាប់ថា ឈ្មោះ អ៊ិន ទេព ហៅសាយ អាយុ៣០ឆ្នាំ មុខរបរ និងស្នាក់នៅមិនពិតប្រាកដ មានស្រុកកំណើតនៅសង្កាត់ផ្សារដើមគរ ខណ្ឌទួលគោក ។
បើតាមប៉ូលិសមូលដ្ឋានបានស្រង់សម្តីពលរដ្ឋមុនពេលឃាត់ខ្លួនឲ្យដឹងថា មានបុរសម្នាក់សង្ស័យបន្លំជាព្រះសង្ឃស្លៀកពាក់ និងដើរបិណ្ឌបាត្រតាមផ្ទះប្រជាពលរដ្ឋ ដោយប្រាប់ថា មានបុណ្យផ្កានៅវត្តឆ្ងាយខ្វះខាត លុយសាងសង់ ហើយពលរដ្ឋសង្ស័យថាជាជនឆបោកក៍ប្តឹងទៅសមត្ថកិច្ចឃាត់ខ្លួនតែម្តង។
ជននេះ បានប្រាប់ប៉ូលិសថា គាត់មិនមែនព្រះសង្ឃពិតប្រាកដទេ គ្រាន់តែអត់លុយចាយ គ្មានកន្លែងស្នាក់នៅ ក៏បន្លំទៅទិញស្បង់លោកនៅផ្សារស្ទឹងមានជ័យមួយឈុតតំលៃ៩ម៉ឺនរៀល ហើយដើរបិណ្ឌបាត្របានរយៈពេល៣ដងហើយ ក្នុង១ថ្ងៃដើរបិណ្ឌបាត្របានលុយ៥ទៅ៧ម៉ឺនរៀល តែដើរបិណ្ឌបាត្រលើកទី៣ បានលុយតែ៩ពាន់រៀល ក៏ត្រូវនគរបាលឃាត់អប់រំតែម្ដងទៅ ។
បើតាម FN ក្រោយឃាត់ខ្លួន មន្ត្រីបានធ្វើការអប់រំ និងដោះស្បង់ចេញឲ្យស្លៀកពាក់ខោអាវធម្មតាវិញ និងណែនាំបញ្ឈប់ការប្រព្រឹត្តអំពើបំផ្លាញសាសនាព្រះពុទ្ធ និងឲ្យកែប្រែខ្លួនធ្វើជាមនុស្សល្អឡើងវិញ និងបានបញ្ជូនបន្តទៅកាន់អធិការដ្ឋានខណ្ឌចំការមនចាត់ការតាមនីតិវិធីច្បាប់៕
