លោក អ៊ួង អាន ប្រធានក្រុមហ៊ុន ប៉ា កូ អ៊ីមផត អិចផត (PA KO IMPORT EXPORT CO , LTD) មានទីស្នាក់ការ ស្ថិតនៅផ្ទះលេខ៣១ ផ្លូវលេខ១០៧ សង្កាត់បឹងទំពុន ខណ្ឌមានជ័យ រាជធានីភ្នំពេញ បានបញ្ឈប់ស្ត្រីម្នាក់មានតួនាទីជាអ្នកគ្រប់គ្រងក្រុមហ៊ុន ក្រោយសម្រាលកូនបាន១៣ថ្ងៃ ដោយមិនមានមូលហេតុច្បាស់លាស់ ទោះបីមានច្បាប់មាតុភាពរយៈពេល៣ខែក៏ដោយ ។
ក្រោយការបញ្ឈប់ដោយអយុត្តិធម៌ , ស្ត្រីរូបនេះ បានប្តឹងទៅក្រសួងការងារ និង តុលាការ រហូតចេញសាលក្រមស្ថាពរ ដោយសម្រេចអោយក្រុមហ៊ុន ប៉ា កូ សងប្រាក់ដល់ស្ត្រីរូបនេះ តាមច្បាប់ តែប្រធានក្រុមហ៊ុន មិនអនុវត្តតាមច្បាប់នេះឡើយ ។
ស្ត្រីរងគ្រោះដោយអំពើអយុត្តិធម៌ នេះ មានឈ្មោះ សន ស៊ីម៉ា អាយុ៣២ឆ្នាំ ថ្លែងប្រាប់ CPC NEWS នៅថ្ងៃទី៣ ខែវិច្ឆិកា ឆ្នាំ២០២០ នេះ ថា រហូតមកទល់ពេលនេះ លោក អ៊ួង អាន ប្រធានក្រុមហ៊ុន ប៉ា កូ អ៊ីមផត អិចផត (PA KO IMPORT EXPORT CO , LTD) មិនទាន់បានសងសំណង តាមរយៈការសម្រេចជាស្ថាពររបស់សាលាដំបូងរាជធានីភ្នំពេញ ឡើយ ។
ដោយសារតែប្រធានក្រុមហ៊ុនរូបនេះ មិនអនុវត្តតាមការសម្រេចរបស់តុលាការ នេះហើយ ទើបលោកស្រី សូមអោយខាងសារព័ត៌មាន ជួយផ្សាយរឿងអយុត្តិធម៌ នេះ ជូនដល់មហាជន ក៏ដូចជាស្ថាប័នពាក់ព័ន្ធអោយជួយរកយុត្តិធម៌ ផង ។
ក្នុងសាលក្រម កាលពីថ្ងៃទី១០ ខែមិថុនា ឆ្នាំ២០២០ កន្លងទៅ លោក ធ្ធាំ ប៊ុណ្ណា ចៅក្រមសាលាដំបូងរាជធានីភ្នំពេញ បានសម្រេចអោយចុងចម្លើយ គឺ លោក អ៊ួង អាន ប្រធានក្រុមហ៊ុន ប៉ា កូ អ៊ីមផត អិចផត (PA KO IMPORT EXPORT CO , LTD) ទូទាត់ប្រាក់ដូចខាងក្រោម ៖
ក.ប្រាក់ជួសការជូនដំណឹងចំនួន១ខែស្មើនឹង២.៥០០ដុល្លារអាមេរិក ។
ខ.ប្រាក់ដំណាច់អតីតភាពការងាររយៈពេល២ឆ្នាំ (២០១៨និង២០១៩) ស្មើនឹង២.៥០០ដុល្លារអាមេរិក ។
គ.សោហ៊ុយជំងឺចិត្ត ស្មើនឹង២.៥០០ដុល្លារអាមេរិក ។
ឃ.ប្រាក់ជួសការឈប់ប្រចាំឆ្នាំដែលនៅសល់ចំនួន១៣ថ្ងៃ ស្មើនឹង១.០៨៣ដុល្លារអាមេរិក ។
២.ប្រាក់ខែ៥០% ដែលក្រុមហ៊ុនសន្យា ថា នឹងបើកមកអោយចំនួន៣ខែ អំឡុងពេលលំហែមាតុភាព ដែលនៅសល់ចំនួន២ខែនិង១៥ថ្ងៃ ស្មើនឹង៣.១២៥ដុល្លារអាមេរិក ។
៣.ប្រាក់ខែទី១៣ តាមគោលការណ៍ក្រុមហ៊ុន ស្មើនឹង២.៥០០ដុល្លារអាមេរិក ។
៤.សំណងជំងឺចិត្តដែលធ្វើអោយប៉ះពាល់សតិអារម្មណ៍ ផ្លូវកាយផ្លូវចិត្ត និង ប៉ះពាល់ដល់កិត្តិយស កេរ្តិ៍ឈ្មោះជាប្រាក់ចំនួន១០លានរៀល ។
លុះដល់ថ្ងៃទី៩ ខែកញ្ញា ឆ្នាំ២០២០ លោក លី វ៉ាន់ហេង ក្រឡាបញ្ជីសាលាដំបូងរាជធានីភ្នំពេញ បានធ្វើលិខិតបញ្ជាក់អំពីសាលក្រមរដ្ឋប្បវេណី បានចូលជាស្ថាពរ ។
ស្ត្រីរងគ្រោះ សន ស៊ីម៉ា សង្កត់ធ្ងន់ថា «ប្រធានក្រុមហ៊ុនរូបនេះមិនមែនមិនមានលុយសងលោកស្រី ទេ តែគេមិនព្រមសង តែម្តង គេមិនខ្លាចច្បាប់ ឡើយ» ដោយលោកស្រី បន្ថែមទៀត ថា «អ្វីដែលខ្ញុំមិនសុខចិត្តគឺគាត់មើលងាយអ្នកក្រ ហើយគាត់អាងតែគាត់មានលុយគាត់ហ៊ានបំពានច្បាប់»៕
ប្រភព ៖ CPC