គិតត្រឹមម៉ោង១១យប់ថ្ងៃទី០៣ វិច្ឆិកា ២០២០ ក្រសួងសុខាភិបាលបានស្រាវជ្រាវរកឃើញអ្នកប៉ះពាល់លោកភីធើ ស៊ីចាតូ (Péter Szijjártó) រដ្ឋមន្ត្រីការបរទេស និងពាណិជ្ជកម្ម នៃប្រទេសហុងគ្រី ចំនួន ៦២៨នាក់ និងត្រូវបានធ្វើតេស្តនៅវិទ្យាស្ថានប៉ាស្ទ័រកម្ពុជា ជាលទ្ឋផលគឺពុំមានផ្ទុកមេរោគកូវីដ១៩ឡើយ ។
យ៉ាងណា បើតាមសេចក្តីជូនព័ត៌មានរបស់ក្រសួងសុខាភិបាលដែលចេញផ្សាយនៅប៉ុន្មាននាទីមុននេះ បានបញ្ជាក់ថា ក្រសួងនិងបន្តស្រាវជ្រាវនិងជម្រាបជូនសាធារណជន នៅពេលទទួលបានលទ្ឋផលវិភាគវត្ថុសំណាកជាបន្តបន្ទាប់ទៀត ។
ជាមួយគ្នានេះដែរ ក្រសួងសុខាភិបាលក៍បានបញ្ជាក់ថា ថ្ងៃនេះពុំមានអ្នកឆ្លងមេរោគកូវីដ១៩នោះទេ មានតែជាសះស្បើយចំនួន៣នាក់ ។
គិតត្រឹមម៉ោង៧ព្រឹកថ្ងៃទី០៥ វិច្ឆិកា ២០២០ នៅកម្ពុជាមានអ្នកឆ្លងកូវីដ១៩សរុប ២៩២នាក់(ស្រី៦០នាក់) ក្នុងនោះករណីជាសះស្បើយចំនួន ២៨៦នាក់(ស្រី៥៧នាក់) និង អ្នកដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត មានចំនួន៦នាក់ (បុរសខ្មែរ៣នាក់ ស្ត្រីខ្មែរ២នាក់ និងស្ត្រីជនជាតិបារាំង០១នាក់) ៕
