គ្រឹះស្ថានសិក្សាឯកជនចំនួន ៤ ត្រូវបានរកឃើញថា មានការពាក់ព័ន្ធនឹងករណីគណៈប្រតិភូ នៃប្រទេសហុងគ្រី ហើយក្រសួងអប់រំ បានណែនាំឲ្យអនុវត្តវិធានការរបស់ក្រសួងសុខាភិបាល ដោយផ្អាកដំណើរការសិក្សាក្នុងថ្នាក់រៀនតាមការចាំបាច់ តែត្រូវបន្តការសិក្សាតាមអនឡាញរយៈពេល ១៤ថ្ងៃ ។
នេះបើយោងតាមការបញ្ជាក់របស់លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ។
បើតាម លោក រស់ សុវាចា គ្រឹះស្ថានសិក្សាទី១ មានបុគ្គលិក ១រូប បានប៉ះពាល់ជាមួយ គណៈប្រតិភូនៃប្រទេសហុងគ្រី។ គ្រឹះស្ថានសិក្សាទី២ មានសិស្ស ២ រូប ដែលមានមាតាបិតា បានប៉ះពាល់ជាមួយ គណៈប្រតិភូ នៃប្រទេសហុងគ្រី។ គ្រឹះស្ថានសិក្សាទី៣ មានសិស្ស ២ រូប ដែលមានមាតាបិតា បានប៉ះពាល់ជាមួយ គណៈប្រតិភូ នៃប្រទេសហុងគ្រី និងគ្រឹះស្ថានសិក្សាទី៤ មានសិស្ស ២ រូប មានមាតាបិតា បានប៉ះពាល់ជាមួយគណៈប្រតិភូនៃប្រទេសហុងគ្រី។
កាលពីថ្ងៃទី៤ វិច្ឆិកា ក្រសួងអប់រំ ក៏បានចេញសេចក្តីជូនដំណឹងមួយ ដោយអំពាវនាវដល់ គ្រឹះស្ថានសិក្សា មាតាបិតា និងសិស្សានុសិស្ស អនុវត្តវិធានការមួយចំនួន ដូចជាៈ គ្រឹះស្ថានសិក្សាណា ដែលមានបុគ្គលិក បានចូលរួម និងប្រាស្រ័យទាក់ទង ផ្ទាល់នឹងគណៈប្រតិភូ របស់ប្រទេសហុងគ្រី ត្រូវផ្អាកដំណើរការសិក្សា ក្នុងរយៈពេល ១៤ ថ្ងៃ ចាប់ពីថ្ងៃជូនដំណឹងនេះតទៅ និងត្រូវបន្តការបង្រៀន និងរៀនតាមរយៈប្រព័ន្ធអនឡាញ។ បុគ្គលិក និងអ្នកពាក់ព័ន្ធទាំងនោះ ត្រូវធ្វើចត្តាឡីស័ក ដោយខ្លួនឯង ១៤ ថ្ងៃ។
សាស្ត្រាចារ្យ បុគ្គលិកអប់រំ សិស្សានុសិស្ស និងនិស្សិត ដែលមានការជាប់ពាក់ព័ន្ធនឹងគណៈប្រតិភូ របស់ប្រទេសហុងគ្រី ត្រូវរាយការណ៍មក ក្រសួងអប់រំ យុវជន និងកីឡា តាមរយៈទូរសព្ទលេខ ០១២ ៣៣៥ ៩៩៩ នៅត្រឹមថ្ងៃទី៥ ខែវិច្ឆិកា ឆ្នាំ២០២០។
គួរបញ្ជាក់ លោក ភីធើ ស៊ីចាតូ (Péter Szijjártó) រដ្ឋមន្ត្រីការបរទេស និងពាណិជ្ជកម្ម នៃប្រទេសហុងគ្រីនិងគណៈប្រតិភូអមដំណើរ បានមកបំពេញទស្សនកិច្ចផ្លូវការនៅកម្ពុជារយៈពេលមួយថ្ងៃកាលពីថ្ងៃទី០៣ វិច្ឆិកា ហើយគណៈប្រតិភូដឹកនាំដោយលោកប្រមុខការទូតខាងលើ បានអញ្ជើញចាកចេញពីកម្ពុជាកាលពីល្ងាចថ្ងៃទី០៣ វិច្ឆិកាដដែលនោះ ដើម្បីបន្តដំណើរបំពេញទស្សនកិច្ចផ្លូវការនៅទីក្រុងបាងកកប្រទេសថៃ ប៉ុន្តែពេលទៅដល់ក្រុងបាងកក ត្រូវបានរដ្ឋមន្ត្រីក្រសួងសុខាភិបាលថៃប្រកាសថា លោក ភីធើ ស៊ីចាតូ ឆ្លងមេរោគកូវីដ១៩ ។
ក្រោយទទួលបានព័ត៌មាននេះ ភ្លាមៗរាជរដ្ឋាភិបាលកម្ពុជា បានប្រកាសឲ្យមន្ត្រីគ្រប់លំដាប់ថ្នាក់ដែលមានការពាក់ព័ន្ឋនឹងលោកប្រមុខការទូតហុងគ្រី និង គណៈប្រតិភូ ត្រូវធ្វើចត្តាឡីស័កដោយដាក់នៅដាច់ដោយឡែកពីក្រុមគ្រួសាររយៈពេល១៤ថ្ងៃ ហើយដែលមានទល់នឹងម៉ោង៧ព្រឹកថ្ងៃទី០៦ វិច្ឆិកា ២០២០នេះ មានអ្នកពាក់ព័ន្ឋរហូតដល់៨៤០នាក់ ហើយដែលអ្នកពាក់ព័ន្ឋទាំងអស់នេះ ក្រោយធ្វើតេស្ត ត្រូវក្រសួងសុខាភិបាលប្រកាសថា ពុំមានផ្ទុកមេរោគកូវីដ១៩នោះទេ តែត្រូវបន្តធ្វើចត្តាឡីស័កនិងធ្វើតេស្តរកមេរោគ៣ដងទៀត គឺនៅថ្ងៃទី០៩ . ១៤ និងថ្ងៃទី១៨ វិច្ឆិកា ៕
