ចៅក្រមជំនុំជម្រះសាលាដំបូងរាជធានីភ្នំពេញ លោក កើត សាំង បានសម្រេចប្រកាសសាលក្រមផ្តន្ទាទោសភ្នាក់ងារកត់កន្ទុយលេខឲ្យគេ ឬ ភាសាមួយទៀតគេហៅកូនកញ្ច្រែងចំនួន២នាក់ ដោយផ្តន្ទាទោសក្នុងម្នាក់ដាក់ពន្ឋនាគារចំនួន១ឆ្នាំ និងពិន័យជាប្រាក់៥លានរៀល តែទោសនេះត្រូវព្យួរ ។
ការផ្តន្ទាទោសពីសំណាក់លោកចៅក្រមខាងលើ បានធ្វើឡើងបន្ទាប់ពីតំណាងអយ្យការ លោកព្រះរាជអាជ្ញារង ស៊ិត វណ្ណៈ បានសម្រេចចោទប្រកាន់ជនសង្ស័យ២នាក់ ដែលជាភ្នាក់ងារធ្វើការឲ្យថៅកែជនជាតិវៀតណាមឈ្មោះ ប៊ុន ធឿន មានសញ្ញាសម្គាល់ C56 រួចបញ្ជូនជនត្រូវចោទនិងសំណុំរឿងទៅជំនុំជម្រះផ្ទាល់ ។
មេឆ្នោតជនជាតិវៀតណាម ដែលមានសញ្ញាសម្គាល់ C56 ឈ្មោះ ប៊ុនធឿន មិនត្រូវបានតុលាការផ្តន្ទាទោសនោះទេ តែតុលាការបែរជាផ្តន្ទាទោសភ្នាក់ងារ២នាក់ នៃឆ្នោតវៀតណាម នេះ ដាក់ពន្ធនាគារម្នាក់ៗ១ឆ្នាំ តែទោសនេះត្រូវព្យួរ ។
តាមប្រភពព័ត៌មាន បានបង្ហើបប្រាប់ CPC NEWS ថា នៅថ្ងៃទី៧ ខែវិច្ឆិកា ឆ្នាំ២០២០ នេះ លោក ស៊ិត វណ្ណៈ ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចចោទប្រកាន់ជនសង្ស័យ២នាក់ ជាភ្នាក់ងារនៃឆ្នោតវៀតណាមដែលមានសញ្ញាសម្គាល់ C56 របស់ថៅកែឈ្មោះ ប៊ុនធឿន ពីបទភ្នាក់ងារល្បែងស៊ីសង រួចបញ្ជូនជនត្រូវចោទនិងសំណុំរឿងទៅជំនុំជម្រះផ្ទាល់ ។
ប្រភពពីសាលាដំបូងបានបញ្ជាក់ថា ភ្នាក់ងារទាំង២នាក់នោះ ម្នាក់ឈ្មោះ ធុយ ស៊ីត្រៃ អាយុ២១ឆ្នាំ និង ឈ្មោះ សេង សុខភី អាយុ២៥ឆ្នាំ តែក្រោយប្រកាសសាលក្រមនោះរួចមក ក៍បានដោះលែងវិញ(ទោសព្យួរ)។
គួរបញ្ជាក់ដែរថា ភ្នាក់ងារឆ្នោតទាំង២នាក់ខាងលើ ត្រូវបានសមត្ថកិច្ចខណ្ឌដង្កោបង្ក្រាបកាលពីវេលាថ្ងៃត្រង់ ថ្ងៃទី០៥ វិច្ឆិកា ២០២០ នៅចំណុចមុខផ្ទះជួលគ្មានលេខ ផ្លូវបេតុង សាលាកសិកម្មចំការដូង ភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ។
ក្រុមអ្នកតាមដាននិងមជ្ឈដ្ឋានមួយចំនួនដែលដឹងសំណុំរឿងនេះ បានលើកឡើងជាចម្ងល់ថា ហេតុអ្វីបានជាតុលាការមិនចោទប្រកាន់និងផ្តន្ទាទោសមេឆ្នោតជាជនជាតិវៀតណាមឈ្មោះ ប៊ុន ធឿន បែរជាមកចោទប្រកាន់និងផ្តន្ទាទោសកូនឈ្នួលទៅវិញ ឬមួយ ប៊ុន ធឿន ជាជនជាតិយួននេះមានបារមីខ្ពស់ ខុសពីតួអង្គ ប៊ុន ធឿន និង នាង វិធាវី ក្នុងរឿង«ផ្កាស្រពោន» របស់អ្នកនិពន្ឋល្បីឈ្មោះ លោក នូ ហាច ដែលនិពន្ឋកាលពីឆ្នាំ១៩៣៨ ? ។
ជុំវិញការលើកឡើងរបស់មជ្ឈដ្ឋានមួយចំនួនខាងលើនេះដែរ នៅយប់ថ្ងៃទី០៧ វិច្ឆិកា ២០២០ «អង្រុត» មិនអាចរកការសុំអត្ថាធិប្បាយបានទេពីលោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ ៕
