ជំពាក់លុយគេមិនសង បងស័ក្តិ៥ គំរាមគេទៀត

បុរស​ម្នាក់​ដែល​ត្រូវ​គេ​ឃើញ​នៅ​លើ​បណ្តាញ​សង្គម​ហ្វេ​ស​ប៊ុ​ក បាន​គ្រង​ឯកសណ្ឋាន​ជា​មន្ត្រី​នគរបាល​និង​មាន​ឋានន្តរស័ក្តិ​វរៈសេនីយ៍ឯក​(​ស័ក្តិ​៥) ត្រូវ​បាន​គណនី​ហ្វេ​ស​ប៊ុ​ក​ឈ្មោះ Try SeangHai ចោទប្រកាន់​ថា បាន​ជំពាក់​លុយ​ខ្លួន​៣០០​ដុល្លារ មិន​សង ។​

​យ៉ាងណា គណនី​ដដែល​មិន​បាន​បញ្ជាក់​អំពី​ឈ្មោះ និង តួនាទី​របស់​មន្ត្រី​នគរបាល​ខាងលើ​នេះ​ទេ គ្រាន់តែ​នៅ​លើ​សារ​ឆ្លើយឆ្លង​គ្នា​អំពី​ការ​ខ្ចីប្រាក់ គេ​ឃើញ​មន្ត្រី​នគរបាល​នោះ ប្រើ​គណនី​ឈ្មោះ ភុំ ទូច តែ​ប៉ុណ្ណោះ ។​

​បើ​តាម​គណនី​ឈ្មោះ Try SeangHai មន្ត្រី​នគរបាល​ដែល​ប្រើ​គណនី​ឈ្មោះ ភុំ ទូច នោះ មិន​ត្រឹមតែ​មិន​សង​ប្រាក់ ៣០០​ដុល្លារ​នោះ​ទេ ថែម​ទាំង​គំរាម​អ្នក​ឲ្យ​លុយ​ខ្ចី​(​ម្ចាស់បំណុល​)​និង​ប្រើ​ពាក្យពេចន៍​អសុរោះ​នោះ​ថែម​ទៀត ។​

​ជុំវិញ​ការ​ចោទប្រកាន់​របស់​គណនី​ខាងលើ​និង​បាន​បង្ហោះ​នៅ​លើ​បណ្តាញ​សង្គម​ហ្វេ​ស​ប៊ុ​ក​កាលពី​ថ្ងៃ​ទី​០៨ វិច្ឆិកា​ម្សិលមិញ​នេះ នៅ​ម៉ោង​១២​និង​៣៣​នាទី​ថ្ងៃត្រង់ ថ្ងៃ​ទី​០៩ វិច្ឆិកា ២០២០ «​អង្រុត​» មិន​អាច​រក​ការ​ឆ្លើយ​បំភ្លឺ​តប​បាន​ទេពី​ម្ចាស់​គណនី​ឈ្មោះ ភុំ ទូច ដែល​គណនី​ឈ្មោះ Try SeangHai ចោទ​ថា​បាន​ខ្ចី​លុយ​៣០០​ដុល្លារ​មិន​សង​ហើយ ថែម​ទាំង​ជេរ​និង​គំរាម​ថែម​ទៀត ៕