រាជធានីភ្នំពេញ ៖ វាជារឿងមួយកម្រកើតមានចំពោះស្ត្រីដែលទៅរៀនជំនាញបច្ចេកទេសដូចជា ជាងម៉ូតូ ជាងឡាន និងជាអគ្គិសនីជាដើម ព្រោះជំនាញទាំងនេះភាគច្រើគេសង្កេត ឃើញថាជារបស់បុរស ក៏ប៉ុន្តែសម័យនេះ បែរជាស្ត្រីចាប់អារម្មណ៍លើការសិក្សាជំនាញ ទាំងនេះទៅវិញ ។ ជាក់ស្ដែងថ្ងៃនេះយើង សូមលើកយកជំនាញមួយ គឺអគ្គិសនី ដែលមាន សិស្សស្រីរៀនជំនាញនេះ ហើយក៏បានប្រាប់ពីផលវិបាកក្នុងការស្វែងរកការងារ ។
កញ្ញា ចាន់ តារា ដែលជាសិស្សផ្នែកអគ្គិសនីនៃសាលាបច្ចេកទេសដុនបូស្កូ ខេត្តកែប បាននិយាយថា នាង គឺជានិស្សិតឆ្នាំទី២ ហើយកំពុងសិក្សាផ្នែកអគ្គិសនី ដែលជាផ្នែក មួយសុទ្ធតែប្រុសៗរៀនដោយមានស្រីតែពីរនាក់ប៉ុណ្ណោះ ។
កញ្ញាបាននិយាយទៀតថា៖ «ដោយសារតែស្រលាញ់ផ្នែកវិទ្យាសាស្ត្រពិត តាំងពីនៅវិទ្យាល័យមកម្ល៉េះ ហើយមិនមាន លទ្ធភាពសិក្សានៅសាកលវិទ្យាល័យ នាងខ្ញុំក៏សម្រេចចិត្តរៀនផ្នែកអគ្គិសនី នៅក្នុងសា លាបច្ចេកទេសដុនបូស្កូ ខេត្តកែបតែម្ដងទៅ» ។
កញ្ញាបន្តទៀតថា កាលនៅរៀន គឺនាងចូលចិត្តរៀនផ្នែកគីមី រូបវិទ្យា និងគណិតវិ ទ្យា ដែលជាមុខវិជ្ជាទាក់ទងនឹងជំនាញអគ្គិសនី ដូច្នេះហើយនាងក៏សម្រេចចិត្តដាក់ពាក្យ ចូលសិក្សាផ្នែកនេះតែម្ដង ។ ការសិក្សាផ្នែកនេះ បើនិយាយពីទ្រឹស្តី គឺមិនពិបាកទេ តែអ្វី ដែលពិបាក គឺនៅពេលអនុវត្តន៍ ដោយសារតែជំនាញនេះត្រូវការឡើងតភ្លើង តអំពូល ហើយត្រូវឡើងជាន់ជណ្ដើរទៀតផង ដែលការងារនេះមនុស្សស្រីពិតជាពិបាកក្នុងការរៀន ក៏ប៉ុន្តែដោយសារតែការតាំងចិត្តរបស់នាង នាងជិតនឹងបញ្ចប់ការសិក្សា ហើយចេញរកការ ងារធ្វើនៅខាងក្រៅហើយផងដែរ ។
ចាន់ តារា បន្ថែមថា ឧបសគ្គប្រាកដជាមាន ក៏ប៉ុន្តែការតាំងចិត្តនិងប្រឹងប្រែងដើម្បី គោលដៅ គឺជាអ្វីដែលមនុស្សម្នាក់ៗត្រូវធ្វើឱ្យបាន ។ ខ្ញុំបានតាំងចិត្តរួចហើយ ទោះបីជា មានបញ្ហាលំបាកយ៉ាងណាក៏ដោយ គឺត្រូវតែជំនះវាឱ្យបាន ហើយអ្វីដែលមនុស្សប្រុសធ្វើ បាន មនុស្សស្រីក៏អាចធ្វើបានដែរ ត្រឹមតែរៀនជំនាញបច្ចេកទេសវាមិនពិបាកនោះទេ សម្រាប់មនុស្សស្រី ព្រោះថាជំនាញនេះ វាកំពុងមានទីផ្សារ គ្រាន់តែទីផ្សារភាគច្រើនសំដៅ លើមនុស្សប្រុស ។
លោក ទ្រី សីហា នាយកសាលា និងជាគ្រូជំនាញអគ្គិសនីផងដែរ នោះបានឱ្យដឹងថា និយាយឱ្យមែនទែនទៅ សិស្សស្រីគាត់មានបញ្ហានៅពេលចុះអនុវត្តន៍ការងារជាក់ស្ដែង ព្រោះត្រូវការឡើងដំបូលផ្ទះ ឡើងបង្គោលភ្លើង និងត្រូវតខ្សែភ្លើងជាក់ស្ដែង ។ ប៉ុន្តែបើនិ យាយពីទ្រឹស្តីវិញ ឃើញថាសិស្សប្រុស និងសិស្សស្រី មានការប្រកួតប្រជែងគ្នា ហើយពេ លខ្លះសិស្សស្រីមានសមត្ថភាពខ្លាំងជាងសិស្សប្រុសផង ។
លោកបន្តទៀតថា ចំណែកទីផ្សារការងារខាងក្រៅ សិស្សស្រី ក៏ពិបាកស្វែងរកការ ងារធ្វើដែរ គឺដាក់ពាក្យ ១០កន្លែង គេទទួលតែ ១ ឬ ២ កន្លែងប៉ុណ្ណោះ ព្រោះនិយោជកគិត ថា វាមិនមែនជាការងារខាងស្រីដែលត្រូវធ្វើ ក៏ប៉ុន្តែបើសិនមានការជ្រើសរើសបុគ្គលិកពី អគ្គិសនីកម្ពុជា សិស្សស្រីអាចមានអាទិភាព ជាក់ស្ដែងមានសិស្សស្រីម្នាក់ហើយបានជាប់ បម្រើការងារនៅអគ្គិសនីកម្ពុជា ជាអ្នកត្រួតពិនិត្យផ្នែកប្រតិបត្តិករ ( Operator ) និងមិនត្រូវ ចេញ ទៅប្រឡូកនៅក្នុងការងារជាក់ស្ដែងនោះទេ ។
លោកបន្ថែមថា សាលាបច្ចេកទេសដុនបូស្កូ តែងតែលើកទឹកចិត្តដល់សិស្សស្រី ឱ្យ ចូលរៀនជំនាញបច្ចេកទេស ហើយឱ្យតែសិស្សស្រីដាក់ពាក្យចូលរៀន គឺនឹងទទួល ដើម្បី លើកកម្ពស់សមភាពយែនឌ័រនៅកម្ពុជា ។ គិតមកដល់បច្ចុប្បន្ននេះ សាលាបច្ចេកទេសដុន បូស្កូខេត្តកែប បានបណ្ដុះបណ្ដាលសិស្សស្រីជំនាញបច្ចេកអគ្គិសនីចំនួន ១០នាក់ហើយ ដោយបានបញ្ចប់ការសិក្សា ៥នាក់ និងកំពុងសិក្សា ៥នាក់ទៀត ។
បើតាមមន្ត្រីជាន់ខ្ពស់នៃក្រសួងការងារ និងបណ្ដុះបណ្ដាល វិជ្ជាជីវៈបានឱ្យដឹងថា បច្ចុប្បន្ននេះជំនាញបច្ចេកទេសពិតជាមានតម្រូវការខ្ពស់នៅក្នុងប្រទេសកម្ពុជា និងបានជំ រុញឱ្យសិស្សានុសិស្សគួរចាប់អារម្មណ៍លើជំនាញបច្ចេកទេស ។ ថ្វីត្បិតតែវា ពិបាក និងត្រូវ ធ្វើការនៅខាងក្រៅពិតមែន តែជំនាញនេះ វាផ្ដល់អត្ថប្រយោជន៍ និងចំណូលខ្ពស់សម្រាប់ អ្នកដែលចេះពិតប្រាកដ ៕ កែសម្រួលដោយ ៖ សុឃាក់
