ឡោមព័ទ្ឋជាង១០ម៉ោង ទើបចាប់បានមេគ្រឿងញៀនដែលមានគ្នាតែម្នាក់

ទីបំផុត​ទៅ សមត្ថកិច្ច​ខេត្តកណ្តាល​បាន​ចាប់​បាន​ខ្លួន​បុរស​ម្នាក់​ដែល​សមត្ថកិច្ច​អះអាង​ថា​ជា​មេខ្លោង​ជួញដូរ​គ្រឿងញៀន បន្ទាប់​ពី​បាន​ឡោម​ព័​ទ្ឋ​ប្រើ​ពេល​ជាង​១០​ម៉ោង​នោះ​រួច​មក ។​

​ការ​ឃាត់ខ្លួន​មេខ្លោង​ជួញដូរ​គ្រឿងញៀន​ខាងលើ បាន​ធ្វើ​ឡើង​នៅ​ម៉ោង​ជិត​២​រំលង​អធ្រាត្រ​ឈាន​ចូល​ថ្ងៃ​ទី​១១ វិច្ឆិកា ២០២០ នៅ​ចំណុច​ភូមិ​ថ្កុ​ល ឃុំ​ត្រើយ​ស្លា ស្រុក​ស្អាង ខេត្តកណ្ដាល ។​

​ការ​ឡោម​ព័​ទ្ឋ​និង​ឈាន​ទៅ​ចាប់ខ្លួន​មេខ្លោង​ជួញដូរ​នេះ​ដែរ បាន​ធ្វើ​ឡើង​ក្រោយ​ពេល​ដែល​ឧក្រិដ្ឋជន​ជួញដូរ​គ្រឿងញៀន​បាន​ប្រើ​កាំភ្លើង AK 47 បាញ់​មក​លើ​សមត្ថកិច្ច​១​គ្រាប់​កាលពី​ម៉ោង​ប្រមាណ​៣​និង​៣០​នាទី​រសៀល​ថ្ងៃ​ទី​១០ វិច្ឆិកា ២០២០ ។​

​លោក​ឧត្តមសេនីយ៍ទោ ឈឿ​ន សុចិត្ត ស្នងការ​នគរបាល​ខេត្តកណ្ដាល បាន​ឲ្យ​ដឹង​កាលពី​រសៀល​ថ្ងៃ​ម្សិលមិញ​ថា ជនសង្ស័យ​ត្រូវ​បាន​កម្លាំង​របស់​លោក​ធ្វើការ​ឡោម​ព័ទ្ធ ខណៈ​ជនល្មើស​បាន​លាក់ខ្លួន​នៅ​ក្នុង​ទីតាំង​ខាងលើ ព្រមទាំង​បាន​បាញ់​ចំនួន ១​គ្រាប់ សំដៅ​មក​លើ​សមត្ថកិច្ច​។​

​លោកស្នងការ​បន្ត​ថា លោក​បាន​បញ្ជា​ឲ្យ​កម្លាំង​ធ្វើការ​ដកខ្លួន​ចេញពី​ទីតាំង​ជនសង្ស័យ​លាក់ខ្លួន​នោះ​សិន ដើម្បី​រក​វិធានការ​ឱ្យ​ជនសង្ស័យ ចាក​ចេញពី​កន្លែង​នោះ ឈាន​ទៅ​ដល់​ការ​ឃាត់ខ្លួន​។​

​លោក​បន្ត​ថា ពេល​នេះ​លោក ក៏​បាន​បញ្ជូន​កម្លាំង​ខាង​ព្រហ្មទណ្ឌ​នៅ​ខេត្ត សហការ​ជាមួយ​និង​នគរបាល​ស្រុក​ស្អាង និង​កម្លាំង​អន្តរាគមន៍ ចុះ​ទៅ​កាន់​ទីនោះ ក្នុង​ប្រតិបត្តិការ​បង្ក្រាប​បទល្មើស​គ្រឿងញៀន ជាមួយនឹង​ការ​ប្រុង​ប្រយ័ត្ន​ខ្ពស់ ទោះ បន្ទាប់​ពី​យើង​ដឹង​ថា​ជនសង្ស័យ​នាំ​យក​មក​ជាមួយ​នូវ​កាំភ្លើង​អាកា ថែម​ទាំង​បាន​បាញ់​សំដៅ​មក​លើ​សមត្ថកិច្ច​ចំនួន ១​គ្រាប់ ប៉ុន្តែ​សំណាងល្អ​មិន​មាន​កងកម្លាំង​ណា​ម្នាក់​រង​គ្រោះ​ពី​ការ​បាញ់​នោះ​ទេ​។​

​បើ​តាម​សមត្ថកិច្ច​មេខ្លោង​គ្រឿងញៀន ឈ្មោះ លៀន ទិ​ត្យ មាន​ប្រ​ព​ន្ឋ​និង​កូន រស់នៅ​ក្នុងភូមិ​-​ឃុំ​ខាងលើ ។​សេចក្តីរាយការណ៍​បញ្ជាក់​ថា ក្នុង​ប្រតិបត្តិការ​នេះ ទាំង​អភិបាល​នៃ​គណៈ​អភិបាលខេត្ត​កណ្ដាល លោក​ឧត្តមសេនីយ៍ទោ ឈឿ​ន សុចិត្ត និង​អភិបាលស្រុក​ស្អាង បាន​ប្រើ​វិធានការ​លួងលោម​ឱ្យ​ជនសង្ស័យ ចូលខ្លួន​សារភាព ជាមួយនឹង​ការ​លើកទឹកចិត្ត ដោយ​មិន​ចាប់កំហុស ឬ​ផ្ដន្ទាទោស ដែល​ជា​វិធានការ​ឲ្យ​ជនសង្ស័យ​ចូលខ្លួន​ឲ្យ​សមត្ថកិច្ច​ចាប់ខ្លួន​។​

​បន្ទាប់​ពី​មាន​ករណី ផ្ទុះអាវុធ​ជា​ច្រើន​គ្រាប់ បង្ក​ឡើង​ដោយ​ជនសង្ស័យ មេខ្លោង​គ្រឿងញៀន បាញ់​ជា​ច្រើន​គ្រាប់ ដោយ​កាំភ្លើង​AK មក​លើ​សមត្ថកិច្ច​នោះ លោក​ឧត្តមសេនីយ៍ទោ ឈឿ​ន សុចិត្ត បាន​ប្រើ​យុទ្ធសាស្ត្រ ឲ្យ​កម្លាំង​ធ្វើការ​ដកថយ និង​វិធានការ​ការពារ​ខ្លួន​។ ដំណាក់​ការ​ដំបូង បាន​រំដោះ​ប្រពន្ធ​ជនសង្ស័យ ពី​ទីតាំង​កន្លែង​ពួក​គេ​លាក់ខ្លួន ដើម្បី​បញ្ចៀស​ពី​ការ​យកប្រពន្ធ​ធ្វើ​ជា​ចំណាប់ខ្មាំង​គំរាម​លើ​សមត្ថកិច្ច​ក្នុង​ប្រតិបត្តិការ​។​

​លោក​ផ្កាយ​២​វ័យក្មេង ឈឿ​ន សុចិត្ត បាន​ថ្លែងប្រាប់​«​នគរ​ដ្រេ​ហ្គ​ន​» ថា​បន្ទាប់​ពី​រំដោះ​និង​ឃាត់ខ្លួន​ប្រពន្ធ​ជនសង្ស័យ​ជា​មេខ្លោង​គ្រឿងញៀន​នោះ​រួច​មក សមត្ថកិច្ច​ក៍រក​វិធី​ឱ្យ កូន​ជនសង្ស័យ​ចាក​ចេញពីផ្ទះ​មេខ្លោង​គ្រឿងញៀន​លាក់ខ្លួន ដោយ​ជម្លៀស​កូន​ជនសង្ស័យ​ចេញពី​ទីតាំង​កន្លែង​កើតហេតុ ទៅ​កាន់​ផ្ទះ​របស់​ឪពុក​ម្ដាយ​ជនសង្ស័យ​។ ក្នុង​ដំណាក់កាល​នេះ ជនសង្ស័យ បាន​ប្រើ​អាវុធ​បាញ់​ជា​ច្រើន​គ្រាប់ មក​លើ​សមត្ថកិច្ច និង​បាន​ដុត​ផ្ទះ​ដើម្បី​ជា​ការ​បំភ័ន្ត​សមត្ថកិច្ច​ហើយ​គេចខ្លួន ។​

​ក្រោយ​ដុត​ផ្ទះ​រួច ជនសង្ស័យ​បាន​មក​សំងំ​លាក់ខ្លួន​ក្នុងផ្ទះ​ឪពុក​ម្ដាយ​របស់​គេ ។ បន្ទាប់​ពី​បាន​ទទួល​ព័ត៌មាន ជាមួយនឹង​ការ​ស្រាវជ្រាវ​ដោយ​យកចិត្តទុកដាក់​បំផុត​ពី​លោក​ឧត្តមសេនីយ៍ទោ ឈឿ​ន សុចិត្ត ជនសង្ស័យ​ជា​មេខ្លោង​គ្រឿងញៀន ក៏​ត្រូវ​បាន​ឃាត់ខ្លួន​នៅ​ម៉ោង​ជិត​២​រំលង​អធ្រាត្រ ឈាន​ចូល​ថ្ងៃ​ទី​១១ វិច្ឆិកា ដោយ​លោក គង់ សោ​ភ័​ណ្ឌ អភិបាលខេត្ត​កណ្ដាល និង​អភិបាលស្រុក​ស្អាង បាន​ទូរ​សព្ទ​ទៅ​កាន់​ជនសង្ស័យ ឲ្យ​ប្រគល់​អាវុធ​មក​ឲ្យ​អាជ្ញាធរ​និង​សមត្ថកិច្ច ជាមួយនឹង​ការ​ធានា មិន​ឃាត់ខ្លួន មិន​ធ្វើការ​ផ្ដន្ទាទោស ហើយ​អ្វី​ដែល​ជនសង្ស័យ​បាន​បាញ់​មក​លើ​សមត្ថកិច្ច ក៏​មិន​ឱ្យ​មានការ​ជាប់​ទោសទណ្ឌ​។​

​ចំពោះ​ការ​ដុត​ផ្ទះ​ក៏​អាជ្ញាធរ​និង​សមត្ថកិច្ច ធានា​ជួសជុល​ធ្វើ​ថ្មី​វិញ​។ ក្នុង​នោះ​ក៏​ឱ្យ​ជនសង្ស័យ​ប្រគល់​អាវុធ និង​ចូល​សារភាព ផ្ដល់​ជា​រង្វាន់​លើកទឹកចិត្ត​ចំនួន ៥០០​ដុល្លារ​។ ដោយឡែក​ប្រពន្ធ​ជនសង្ស័យ ដែល​សមត្ថកិច្ច​រំដោះ​យក​និង​ឃាត់ខ្លួន ក៏​បាន​ព្យាយាម​ទូរស័ព្ទ ទៅ​កាន់​ប្ដី​ដែល​ជា​ជនសង្ស័យ អោយ​ចូល​សារភាព និង​បញ្ឈប់​សកម្មភាព ការ​ប្រើប្រាស់​អាវុធ​បាញ់​មក​លើ​សមត្ថកិច្ច​។​

​ទីបំផុត ជនសង្ស័យ​ជា​មេខ្លោង​គ្រឿងញៀន ត្រូវ​បាន​សមត្ថកិច្ច​ឃាត់ខ្លួន បាន​ដោយ​ជោគជ័យ និង​នាំ​ខ្លួន​មក​កាន់ ស្នងការ​នគរបាល​ខេត្តកណ្ដាល ទាំង កណ្ដាលអធ្រាត្រ ដើម្បី​ធ្វើ​កំណត់ហេតុ ស្ដាប់​ចម្លើយ និង​បន្ត​ធ្វើការ​ស៊ើបអង្កេត​ស្រាវជ្រាវ​រក​ក្រុម​ជនសង្ស័យ​ដែល​បាន​ពាក់ព័ន្ធ​ក្នុង​បទល្មើស​គ្រឿងញៀន​ថែម​ទៀត​៕