លោក ភោ សុផានិត ដែលគេស្គាល់ថាជាអតីតពិធីករទូរទស្សន៍ប៉ុស្តិ៍លេខ៣ ត្រូវបានសមត្ថកិច្ចចាប់ខ្លួនតាមដីកាពាក់ព័ន្ឋការចែកសែកស្អុយ (សែកគ្មានលុយ) ។
ប្រភពបន្តថា លោក ភោ សុផានិត ត្រូវបានកងកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញឃាត់ខ្លួនកាលពីម៉ោង៧យប់ថ្ងៃទី១៦ វិច្ឆិកា ២០២០ នៅចំណុចហាងកាហ្វេអាម៉ាហ្សូន ផ្លូវព្រះមុន្នីវង្ស សង្កាត់ស្រះចក ខណ្ឌដូនពេញ ។
យ៉ាងណា សមត្ថកិច្ចមិនទាន់បញ្ជាក់អំពីថាតើលោក ភោ សុផានិត បានចែកសែកស្អុយមានទឹកប្រាក់ប៉ុន្មាន ហើយប្រគល់ឲ្យភាគីណា និង ពាក់ព័ន្ឋនឹងការរកស៊ីជួញដូរអ្វីនោះទេ គ្រាន់តែបញ្ជាក់ថាអតីតពិធីករទូរទស្សន៍ប៉ុស្តិ៍លេខ៣ អាយុ៤៤ឆ្នាំ ជាពាណិជ្ជករ មានទីលំនៅបច្ចុប្បន្នផ្ទះគ្មានលេខ ផ្លូវបេតុង ភូមិត្រពាំងថ្លឹង សង្កាត់ចោមចៅ២ ខណ្ឌពោធិសែនជ័យ
រូបនេះ ត្រូវបានលោក វ៉ាន់ សែនវិសុទ្ធ ចៅក្រមស៊ើបសួរសាលាដំបូងរាជធានីភ្នំពេញដីកាបង្គាប់ឲ្យនាំខ្លួនលេខ១៣០០«ឃ១»ដ.ច.ន ចុះថ្ងៃទី ២៩ ខែ កញ្ញា ឆ្នាំ២០២០ ពីបទ មិនបំពេញកាតព្វកិច្ចចំពោះឧបករណ៍ដែលអាចជួញដូរបាន ប្រព្រឹត្តនៅរាជធានីភ្នំពេញ កាលពីថ្ងៃទី១៦ ខែមិថុនា ឆ្នាំ២០២០ ។
លោក ភោ សុផានិត ត្រូវបានកងកម្លាំងជំនាញកំពុងឃុំខ្លួនបណ្តោះអាសន្នដើម្បីកសាងសំណុំរឿងបញ្ជូនបន្តទៅសាលាដំបូងរាជធានីភ្នំពេញ ចាត់ការតាមនីតិវិធីច្បាប់៕
