ជនសង្ស័យ២នាក់ ត្រូវបាននគរបាលមូលដ្ឋានឃាត់ខ្លួន បន្ទាប់ពីធ្វើសកម្មភាពបំផ្លិចបំផ្លាញរូបសំណាកជាច្រើននៅក្នុងវត្តលើភ្នំបាសិទ្ឋ ។
ជនសង្ស័យដែលត្រូវកងកម្លាំងនគរបាលឃាត់ខ្លួនបន្ទាប់ពីធ្វើសកម្មភាពចំណុចលើភ្នំបាសិទ្ធ ក្នុងបរិវេណ វត្តបាសិទ្ធត្រៃយត្រឹង្ស ភូមិតាពិជ ឃុំ ឈ្វាំង ស្រុក ពញាឮ ខេត្ត កណ្តាលនៅព្រឹកថ្ងៃទី១៧ វិច្ឆិកា ២០២០នេះ ឈ្មោះ គង់ សំណាង ភេទ ប្រុស អាយុ៣៩ឆ្នាំជនជាតិ ខ្មែរ មុខរបរ មិនពិតប្រាកដ មានស្រុកកំណើតភូមិ បាក់រនាស់ ឃុំ សង្ឃ័ ស្រុកស្វាយទាប ខេត្តស្វាយរៀង ទីលំនៅបច្ចុប្បន្នស្នាក់នៅភូមិ ព្រៃពង្រ សង្កាត់ ពញាពន់ ខណ្ឌព្រែកព្នៅ រាជធានីភ្នំពេញ ជាជនដៃដល់ និង ឈ្មោះប៊ិន សុភា ភេទប្រុស អាយុ ៣៩ឆ្នាំជនជាតិ ខ្មែរ មុខរបរ រត់តាក់
ស៊ី មានទីលំនៅភូមិ ត្រពាំងស្វាយ សង្កាត់ គោកឃ្លៀង ខណ្ឌ សែនសុខ រាជធានី ភ្នំពេញ(អ្នកបើកបរ)។
បើតាមរបាយការណ៍របស់ប៉ូលិសនៃអធិការនគរបាលស្រុកពញាឮ បានរៀបរាប់ថា មុនពេលកើតហេតុ ជនសង្ស័យទាំង០២នាក់ បានជិះរថយន្តម៉ាក LUXUS ពណ៌ ប្រផេះ ផលិតឆ្នាំ ២០០៣ ពាក់ផ្លាកលេខ ភ្នំពេញ 2AV9845 មកឈប់លើភ្នំបាសិទ្ធត្រៃយត្រឹង្ស ត្រង់បរិវេណវត្ត ហើយក្នុងនោះមានជនសង្ស័យម្នាក់ឈ្មោះ
គង់ សំណាង បានបើកទ្វារចេញពីក្នុងរថយន្តរត់សំដៅទៅលើព្រះវិហារ លើភ្នំវត្តបាសិទ្ធត្រៃយត្រឹង្ស រួចធ្វើសកម្មភាព ធាក់ទ្វារព្រះវិហារ បណ្តាលឲ្យបាក់របាទ្វារ បន្ទាប់មកជនសង្ស័យ បានរត់ចុះពីលើព្រះវិហារ មកធ្វើ
សកម្មភាព វាយបំផ្លិចបំផ្លាញរូបសំណាក់ ព្រះនាងទេពប្រណម្យ(០៤) និង ខ្ទមអ្នកតា (០១ )រួចចុះតាមជណ្តើរ
ទាញបំបាក់បង្គោលសូឡា និង ធាក់ក្បាលនាគ(០២) បំបាក់ចោល បន្ទាប់មកជនសង្ស័យបានរត់ចូលទៅក្នុងប្រាសាទស្រីគ្រប់លក្ខ័ វាយបំផ្លិចបំផ្លាញរូបសំណាក់ក្នុងប្រាសាទរួមមាន៖ រូបសំណាកស្រីគ្រប់លក្ខ័ (០១) រូបសំណាកព្រះនាងពៅ (០១) រួបសំណាកកុមារពេជ្រ(០១) រូបសំណាកព្រះអង្គចេក(០១ )និងគ្រឿងសម្ភារ ដូចជាបាយសីផ្កាភ្ញីបោះបោកចោលហើយជនសង្ស័យ បានវាយផើងផ្កា និង ពាងទឹកបែកអស់(០២) ដែល
នៅក្បែរប្រាសាទ ។
មកទល់នឹងម៉ោង៦និង៣០នាទីល្ងាចថ្ងៃអង្គារដដែលនេះ គេនៅមិនទាន់ដឹងពីមូលហេតុដែលជនសង្ស័យទាំង២នាក់ខាងលើ វាយកម្ទេចរូបសំណាកជាច្រើននោះនៅឡើយទេ ។
នៅពេលនេះ ជនសង្ស័យទាំង២នាក់ រួមទាំងវត្ថុតាងរួមមានរថយន្តម៉ាក LEXUS ពណ៌ ប្រផេះផលិតឆ្នាំ២០០៣ ផ្លាកលេខ2AV.9545 សោរថយន្ត០១ កូនសោរ ០២ និង ទូរសព្ទ័០១គ្រឿងម៉ាក iPhone ត្រូវនគរបាលកំពុងរៀបចំសំណុំរឿងបញ្ជូនទៅសាលាដំបូងចាត់ការតាមច្បាប់ ៕
