ទីបំផុតទៅសាលដំបូងរាជធានីភ្នំពេញបានប្រកាសសាលក្រមផ្តន្ទាទោសលោក នួន ប៉ុក អតីតប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ ដាក់ពន្ឋនាគារចំនួន៧ឆ្នាំនិងពិន័យប្រាក់បង់ចូលថវិការដ្ឋចំនួន១០០លានរៀល ថែមទាំងរឹបអូសអចលនទ្រព្យចំនួន៣កន្លែង ទុកជាសម្បត្តិរដ្ឋ ។
លោក នួន ប៉ុក អង្គភាពប្រឆាំងអំពើពុករលួយ (ACU) ឃាត់ខ្លួនកាលពីថ្ងៃទី០១ មីនា ២០២០ដោយជាប់សង្ស័យជាប់ពាក់ព័ន្ឋនឹងអំពើពុករលួយ ដែលប្រព្រឹត្តអំឡុងពេលលោកកាន់តំណែងពីថ្ងៃទី២៣ មីនា ២០១៦ រហូតមកទល់នឹងការចាប់ខ្លួន ។
៣ថ្ងៃក្រោយពីការចាប់ខ្លួន ពោលគឺនៅថ្ងៃទី០៤ មីនា អង្គភាពប្រឆាំងអំពើពុករលួយ ក៍បានបញ្ជូនសំណុំរឿងលោក នួន ប៉ុក ទៅកាន់សាលាដំបូងរាជធានីភ្នំពេញ និងត្រូវបានតំណាងអយ្យការចោទប្រកាន់៣បទល្មើសគឺ បទរំលោភអំណាច បំពានធនធានធម្មជាតិ និងបទចោទផ្តល់ឯកសារក្លែងក្លាយដល់អាជ្ញាធរពាក់ព័ន្ធ ។
ប្រភពពីសាលាដំបូងរាជធានីភ្នំពេញបានបញ្ជាក់ដែរថា នៅក្រោយពេលដែលចៅក្រមប្រកាសផ្តន្ទាទោសកាលពីថ្ងៃទី១៧ វិច្ឆិកា ២០២០ គេឃើញលោក នួន ប៉ុកស្រក់ទឹកភ្នែកនៅមុខបន្ទប់សវនាការ មុនពេលអនុរក្សពន្ឋនាគារបនាំខ្លួនអតីតប្រធានមន្ទីរសុរិយោដីដែលកាន់តំណែងកន្លែងខ្លាញ់រូបនេះទៅកាន់ពន្ឋនាគារ ។
ក្រោយពីឃើញលោក នួន ប៉ុក ស្រក់ទឹកភ្នែក ក៍ធ្វើឲ្យគេនឹកដល់បទចម្រៀងមួយបទដែលច្រៀងដោយលោក ព្រាប សុវត្ថិ មានចំណងជើងថា «ស្រក់ទឹកភ្នែក មិនមែនគ្មានបញ្ហា» ៕
