បុរសខ្មែរអ៊ិស្លាមម្នាក់ បានត្រូវនគរបាលជំនាញអះអាងថា ស្លាប់ដោយសារត្រូវនឹងវត្ថុរឹងលើផ្នែកក្បាលធ្ងន់ធ្ងរ បន្ទាប់ពីបុរសនោះ ត្រូវពលរដ្ឋមានគ្នាពី៣០ទៅ៤០នាក់ដៃកាន់ដុំថ្ម និងដំបងឈើដេញគប់ ក្រោយពេលជននោះ ត្រូវគេចោទថាបានលួចចេកពងមាន់២ស្ទង។
ហេតុការណ៍លួចចេក២ស្ទងដេញគប់បណ្តាលឲ្យស្លាប់នេះ បានកើតឡើងកាលពីម៉ោងជិត៣រសៀលថ្ងៃទី១៨ វិច្ឆិកា ២០២០ នៅចំណុចមាត់ស្រះមួយកន្លែង ស្ថិតក្នុងភូមិកំពង់ព្រីង សង្កាត់សិត្បូ ក្រុងតាខ្មៅ ខេត្តកណ្តាល។
បើតាមនគរបាលមូលដ្ឋាន ជនសង្ស័យជាចោរក្លាយជាជនរងគ្រោះ ឈ្មោះ យ៉េប សុខក្រី អាយុ៣២ឆ្នាំ ជាអ្នកនេសាទ ស្នាក់នៅលើទូក ក្នុងសង្កាត់កោះអន្លង់ចិន ក្រុងតាខ្មៅ ខេត្តកណ្តាល ។
សមត្ថកិច្ចនិងសាក្សីបានអះអាងថា នៅវេលាកើតហេតុខាងលើ បុរសខ្មែរអ៊ីស្លាមរូបនោះ បានលួចចេកពងមាន់ របស់ប្រជាពលរដ្ឋចំនួន ២ស្ទង ខណៈនោះ ក៏ផ្អើលដល់ប្រជាពលរដ្ឋជិតខាង ដែលមានគ្នាពី ៣០ ទៅ ៤០ នាក់ ខ្លះមានកាន់ដុំថ្ម ខ្លះកាន់ដំបងឈើ បាននាំគ្នារត់ដេញគប់ និងវាយជនសង្ស័យ ដោយបានស្រែក«ចោរៗ » ពេលនោះ ជនសង្ស័យ បានរត់ហែលឆ្លងទឹកទន្លេ មកខាងក្រោយរោងចក្រ ហ្គោលហ្វែម ចូលក្នុងទឹកស្រះ។
បន្ទាប់ពីដេញគប់នោះរួចមក ប្រជាពលរដ្ឋបានរាយការណ៍ទៅសមត្ថកិច្ច តែនៅពេលកម្លាំងទៅដល់ឃើញ ជនសង្ស័យ បានដេកស្លាប់នៅជាប់មាត់ស្រះបាត់ទៅហើយ ដោយមានរបួសស្នាមរយះក្បាល ហូរឈាម ។
កំហឹងដែលកើតចេញពីការធ្លាប់បាត់បង់ដោយសារចោរលួចជារឿងមួយ តែសំខាន់ប្រទេសមានច្បាប់ គួរតែចាប់ជនសង្ស័យប្រគល់ឲ្យសមត្ថកិច្ច បើសិនជាករណីបទល្មើសជាក់ស្តែង ព្រោះរាល់បទល្មើសជាក់ស្តែង ពលរដ្ឋដែលជួបផ្ទាល់មានសិទ្ឋិត្រឹមតែចាប់ប្រគល់ឲ្យនគបាលយុត្តិធ៌មតែប៉ុណ្ណោះ ។
ករណីសម្លាប់ក្រៅរង្វង់ច្បាប់ គួរតែត្រូវបានកាត់បន្ថយ ឬ បិទបញ្ចប់ ជៀសវាងករណីខាងលើជនសង្ស័យជាចោរក្លាយជាជនរងគ្រោះ ឯពលរដ្ឋគប់ចោរក្លាយជាជនល្មើស ៕