រាជធានីភ្នំពេញ ៖ យើងបានដឹងហើយថា កម្មវិធី TikTok គឺជាកម្មវិធីដ៏ពេញនិយមមួយសម្រាប់ថត និងចែកចាយវីដេអូឃ្លីបខ្លីៗជារបៀបច្រៀងតាម (lip-syncing video) មិនត្រឹមតែ នៅក្រៅប្រទេសនោះទេ ថែមទាំងមាននៅក្នុងប្រទេសកម្ពុជាយើងផងដែរ ជាពិសេសក្នុងចំណោមក្មេងៗ ដែលមិនទាន់គ្រប់អាយុ។
បើតោងតាមប្រភពពីនាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ បានអោយដឹងថា ដោយសារតែហេតុផលទាំងនេះហើយ បានជាក្រុមអ្នកគាំពារកុមារ មានការព្រួយបារម្ភជាមួយនឹងកម្មវិធីនេះ ក៏ព្រោះតែកម្មវិធីនេះ ពុំមានគោលការណ៍ ក្នុងការការពារឯកជនភាពរបស់កុមារ ។
កាលពីឆ្នាំកន្លងទៅ ក្រុមហ៊ុន Musical.ly ដែលជាក្រុមហ៊ុន TikTok បានទិញ និងបញ្ចូលជាក្រុមហ៊ុនតែមួយនោះ ត្រូវបានរកឃើញថា បានបំពានលើច្បាប់ឯកជនភាពរបស់កុមារ នៅលើប្រព័ន្ធអ៊ីនធឺណេត ព្រោះបានទាញយកទិន្នន័យដូចជា ឈ្មោះ អ៊ីមែល វីដេអូ និងព័ត៌មានផ្ទាល់ខ្លួនផ្សេងៗទៀតពីអ្នកប្រើប្រាស់ដែលមានវ័យតិចជាង១៣ឆ្នាំ ដោយមិនមានការឯកភាពពីអាណាព្យាបាលរបស់ពួកគេ ។
ជាងនេះទៅទៀតគេក៏បានរកឃើញថា ប្រូហ្វាល់របស់អ្នកប្រើប្រាស់ត្រូវបានដាក់ឱ្យឃើញជាសាធារណៈ ដែលជាហេតុនាំឱ្យមនុស្សពេញវ័យមួយចំនួន បានប្រើកម្មវិធីនេះ ដើម្បីធ្វើការផ្ញើសារទាក់ទងទៅក្មេងៗទាំងនោះ ។
ក្រុមហ៊ុន TikTok បានយល់ព្រមធ្វើកំណែកំហុសឆ្គងទាំងនោះ ប៉ុន្តែគិតមកដល់ពេលនេះ ក្រុមហ៊ុននៅមិនទាន់ធ្វើការកែប្រែទៅលើកម្មវិធីរបស់ខ្លួននៅឡើយទេ។
នាយកដ្ឋានប្រឆាំងបទល្មើសបច្ចេកវិទ្យា ក្រសួងមហាផ្ទៃ សូមណែនាំដល់អាណាព្យាបាល ឱ្យមានការប្រុងប្រយ័ត្នចំពោះកូនៗរបស់ខ្លួនក្នុងការប្រើប្រាស់កម្មវិធីនៅតាមបណ្តាញសង្គមផ្សេងៗ ជាពិសេសកម្មវិធី TikTok សូមមានការណែនាំពួកគាត់កុំឱ្យប្រើប្រាស់កម្មវិធីទាំងនោះច្រើនពេក និងតាមដានពីសកម្មភាពរបស់ពួកគាត់ឱ្យបានជាប់លាប់ ព្រោះវានាំឱ្យខាតពេលវេលារៀនសូត្រ និងអាចនាំមកនូវផល់ប៉ះពាល់ផ្សេងៗទៀតផង ៕