រាជធានីភ្នំពេញ ៖ នៅតាមភោជនីយដ្ឋាន និងអាហារដ្ឋានមួយចំនួន ខ្វះការប្រុងប្រយ័ត្ន ទាំងម្ចាស់ភោជនីយដ្ឋាន និងភ្ញៀវ ដោយពុំបានអនុវត្តន៍តាមការណែនាំរបស់ក្រសួងសុខាភិបាលឡើយ ។ ក្នុងករណីម្ចាស់ភោជនីយដ្ឋាន និងអាហារដ្ឋាន មិនអនុវត្តន៍តាមការណែនាំនេះ រដ្ឋបាលរាជធានីភ្នំពេញ នឹងបិទអាជីវកម្ម ភោជនីយដ្ឋាន និងអាហារដ្ឋានជាបណ្តោះអាសន្ន ។
យោងតាមសេចក្តីជូនដំណឹងរបស់ឯកឧត្តម ឃួង ស្រេង អភិបាលរាជធានីភ្នំពេញ ចុះថ្ងៃទី១៨ ខែឧសភា ឆ្នាំ២០២០នេះ បានឱ្យដឹងថា រដ្ឋបាលរាជធានីភ្នំពេញ សូមជម្រាបជូនដំណឹងដល់ម្ចាស់ភោជនីយដ្ឋាន និងអាហារដ្ឋានទាំងអស់ ក្នុងរាជធានីភ្នំពេញ ឲ្យបានជ្រាបថា ក្រោយពីមានការព្យាបាលអ្នកជំងឺកូវីដិ១៩ ជាសះស្បើយអស់នៅក្នុងកម្ពុជា រដ្ឋបាលរាជធានីភ្នំពេញ សង្កេតឃើញថា ប្រជាពលរដ្ឋមិនមានការភ័យខ្លាច និងបាត់ការប្រុងប្រយ័ត្ន ចំពោះជំងឺកូវីដ១៩ ហើយនៅតាមភោជនីយដ្ឋាន និងអាហារដ្ឋានមួយចំនួនខ្ចះការប្រុងប្រយ័ត្ន ទាំងម្ចាស់ភោជនីយដ្ឋាន និងភ្ញៀវ ដោយពុំបានអនុវត្តតាមការណែនាំរបស់ក្រសួងសុខាភិបាល ។
ដើម្បីចូលរួមបង្ការ និងទប់ស្កាត់ ការរីករាលដាលនៃជំងឺកូវីដ-១៩ ឱ្យកាន់តែមានប្រសិទ្ធ ភាពថែមទៀត រដ្ឋបាលរាជធានីភ្នំពេញ សូមធ្វើការណែនាំដល់ម្ចាស់ភោជនីយដ្ឋាន និង អាហារដ្ឋានទាំងអស់ឱ្យមានការប្រុងប្រយ័ត្នដូចតទៅ ៖
១-ម្ចាស់អាជីវកម្មភោជនីយដ្ឋាន និង អាហារដ្ឋានទាំងអស់នៅរាជធានីភ្នំពេញ ត្រូវគោរពឱ្យបានត្រឹមត្រូវ តាមការណែនាំរបស់ ក្រសួងសុខាភិបាល ស្តីពីការផែនការទប់ស្កាត់ការរីករាលដាលនៃជំងឺកូវីដ-១៩។
២-ត្រូវរៀប ចំឱ្យមានទឹកអាល់កុល ឬជែល សម្រាប់លាងដៃនៅមុខច្រកចេញចូល និងត្រូវចាត់តាំង បុគ្គលិកធ្វើការវាស់កំដៅជូនភ្ញៀវទាំងអស់ មុននឹងអនុញ្ញាតឱ្យភ្ញៀវចូលក្នុងភោជនីយដ្ឋាន និង អាហារដ្ឋាន។
៣-ត្រូវរក្សាគម្លាតសង្គមឱ្យបានត្រឹមត្រូវទៅតាមការណែនាំរបស់ក្រសួងសុខា ភិបាល។
ក្នុងសេចក្តីជូនដំណឹងដដែលបានសង្កត់ធ្ងន់ថា «ក្នុងករណី ម្ចាស់ភោជនីយដ្ឋាន និងអាហារដ្ឋាន មិនអនុវត្តន៍តាមការណែនាំនេះ រដ្ឋបាលរាជធានីភ្នំពេញ នឹងបិទអាជីវកម្ម ភោជនីយដ្ឋាន និងអាហារដ្ឋានជាបណ្តោះអាសន្ន» ៕
