សមាជិកក្រុមប្រឹក្សាខេត្តមណ្ឌលគិរី លោក ម៉ៅ ធនារក្ស និងដែលគេស្គាល់ថាត្រូវជាបងប្រុសបង្កើត លោក ម៉ៅ ធនិន្ទ អភិបាលខេត្តពោធិសាត់ រងការចោទថាបានរំលោភយកដីអ្នកចម្រៀងល្បីឈ្មោះ លោក ព្រាប សុវត្ថិ ។
នេះបើយោងតាម លោក ហេង ឡុង ប្រធានសមាគមសិល្បៈស្ម័គ្រចិត្តជួយសង្គម បានអះអាងនិងបង្ហោះនៅលើបណ្តាញសង្គមហ្វេសប៊ុកនៅថ្ងៃទី២៤ វិច្ឆិកា ២០២០នេះ ។
បើតាមលោក ហេង ឡុង ដីលោក ព្រាប សុវត្ថិ ដែលត្រូវលោក ម៉ៅ ធនារក្ស កំពុងរំលោភយកនោះ ស្ថិតនៅភូមិពូទ្រូ សង្កាត់សែនមនោរម្យ ស្រុកអូររាំង ខេត្តមណ្ឌលគីរី ។
សំណុំរឿងដីធ្លីខាងលើនេះ ត្រូវបានលោក ហេង ឡុង បង្ហោះនៅលើបណ្តាញសង្គម Facebook នារសៀលថ្ងៃអង្គារនេះមានខ្លឹមសារដូចតទៅ៖ «នៅថ្ងៃទី២៥ ខែមិថុនា ឆ្នាំ២០១៨ ឈ្មោះ ផូ សំណាង (ជាម្តាយលោក ព្រាប សុវត្ថិ) តំណាងឱ្យលោក ព្រាប សុវត្ថិ បានទិញដីពីប្រជាពលរដ្ឋម្ចាស់ដើមចំនួន៥ម្ចាស់ មានទំហំសរុបជាង១៩ហិកតា មានទីតាំងនៅភូមិពូទ្រូ សង្កាត់សែនមនោរម្យ ស្រុកអូររាំង ខេត្តមណ្ឌលគីរី (មានឯកសារកាន់កាប់របស់ម្ចាស់ដើម) ហើយក្រោយពីការទិញលក់ម្ចាស់ដើមទាំង៥នាក់នោះ បានផ្ទេរសិទ្ធិកាន់កាប់ជូន លោកស្រី ផូ សំណាង ដោយមានការចុះហត្ថលេខាទទួលស្គាល់លើលិខិតផ្ទេរសិទ្ធិនោះ ដោយលោកមេភូមិពូទ្រូ លោកចៅសង្កាត់សែនមនោរម្យ ហើយចុងក្រោយគឺដោយលោក នង ទណ្ណារី ជាអភិបាលស្រុក (មានឯកសារលិខិតផ្ទេរសិទ្ធិ) ផងដែរ។
ក្រោយពីការទិញលក់រួចរាល់ហើយ លោកស្រី ផូ សំណាង បានចូលកាប់កាប់ដោយសាធារណ: ដោយសុច្ចរិត និងបានសាងសង់របងព្រំដីផងដែរ។ ស្រាប់តែនៅថ្ងៃទី១៥ និង ថ្ងៃទី១៦ ខែវិច្ឆិកា ឆ្នាំ២០២០ កន្លងទៅនេះ ឈ្មោះ ម៉ៅ ធនារក្ស ដែលត្រូវបានគេស្គាល់ថា ជាសមាជិកក្រុមប្រឹក្សាខេត្តមណ្ឌលគីរី បានបញ្ជាកូនចៅរបស់ខ្លួន ឲ្យទៅវាយកំទេចរបង និងឈូសឆាយលើដីរបស់លោកស្រី ផូ សំណាង ក្នុងបំណងរំលោភយកដីតែម្តង។
ករណីនេះឈ្មោះផូ សំណាង បានដាក់ពាក្យបណ្តឹង សុំដីការក្សាការពារ ទៅសាលាដំបូងខេត្តមណ្ឌលគីរី កាលពីថ្ងៃទី២០ ខែវិច្ឆិកា ឆ្នាំ២០២០ រួចហើយ តែរហូតមកដល់ពេលនេះ ភាគីជនរងគ្រោះ មិនទាន់បានទទួលចំណាត់ការពីសាលាដំបូង លើពាក្យបណ្តឹងសុំដីការក្សាការពារនោះនៅឡើយទេ។»។
ជុំវិញការចោទប្រកាន់ពីសំណាក់លោក ហេង ឡុង ខាងលើនេះ នៅល្ងាចថ្ងៃអង្គារដដែលនេះ «អង្រុត» មិនអាចរកការសុំអត្ថាធិប្បាយដើម្បីបំភ្លឺតបបានទេពីលោក ម៉ៅ ធនារក្ស សមាជិកក្រុមប្រឹក្សាខេត្តមណ្ឌលគិរី ៕
